2021-yil yakuni boʻyicha tumanda barcha toifadagi xoʻjaliklarda 171,5 ming bosh qoramollar bor

Amudaryo tuman Veterinariya va chorvachilikni rivojlantirish boʻlimi tomonidan chorvachilikka ixtisoslashgan fermer xoʻjaliklari va aholi ixtiyoridagi qoramollar hamda boshqa uy hayvonlarining turli mavsumiy kasalliklarga chalinish holatlarining oldini olishga qaratilgan rejaviy chora-tadbirlar amalga oshirilmoqda.

Ayni paytda tuman veterinariya va chorvachilikni rivojlantirish boʻlimida 28 nafar malakali mutaxassislar faoliyat olib borishmoqda. Hududlardagi viterinariya boʻlinmalarida 18 nafar veterinariya mutaxassislari ish yuritishmoqda. Oʻtgan 2021-yil davomida boʻlim tomonidan Qoraqalpogʻiston Respublikasi Veterinariya va chorvachilikni rivojlantirish qoʻmitasi tomonidan belgilangan reja-tadbirlari asosida chorva mollarini kasalliklarga qarshi emlash ishlari olib borildi. Xususan, 50 ming 950 bosh yirik shoxli, 12 ming 787 bosh mayda shoxli qoramollar brutsellyoz kasalligiga, 177 ming 35 bosh mayda shoxli, 108 ming 810 bosh yirik shoxli qoramollar, 2 ming 576 bosh eshak kuydirgi kasalligiga hamda 77 ming 185 bosh yirik shoxli va 23 ming 630-mayda shoxli qoramollar oqsil kasalligiga qarshi emlandi.

Qishloq xoʻjaligi hayvonlarini har xil parazitar kasalliklarga qarshi choʻmiltirish boʻyicha samarali ishlar olib borilib, 162 ming 342 bosh yirik shoxli va 1 ming 148 bosh mayda shoxli mollarda choʻmiltirish va terisini tozalash ishlari amalga oshirildi.

Tumanida 2021-yil barcha toifadagi xoʻjaliklarda 171,5 ming bosh qoramollar mavjud boʻlib, shundan 49,1 ming boshi sigirlardan iborat. Xususan, chorvachilik xoʻjaliklarida hozirgi vaqtda jami 4,1 ming bosh qoramollar mavjud boʻlib, shundan 1,7 ming boshi sigirlardir.

Oʻtgan yilda tumanimizda nasldorlikni oshirish boʻyicha olib borilayotgan ishlar natijasida nasldor mollarni koʻpaytirish, naslini yaxshilash, samaradorligini oshirish, iqlim sharoitiga moslashtirishga alohida eʼtibor qaratildi. Amalga oshirilishi rejalashtirilgan chorvachilik loyihalari hisobidan chet davlatlardan mahalliy sharoitga moslashuvchan 485 bosh naslli qoramollar olib kelinib, parvarishi yoʻlga qoʻyildi. Natijada tumanimizda yil davomida chorvachilik mahsulotlari ishlab chiqarish salmogʻi oshdi, barcha toifadagi chorvachilik xoʻjaliklarida tirik vaznda 10.1 tonna goʻsht, 35,3 tonna sut mahsulotlari yetishtirildi.

Ozuqabop ekinlarini joylashtirish, chorvachilik ozuqa bazasini mustahkamlash hamda yerlardan samarali foydalanish maqsadida oʻtgan 2021-yilda chorvachilik xoʻjaliklariga ajratilgan 1 ming 514 gektar asosiy maydonlarga, jumladan, 482 gektarga beda pichani uchun, 361 gektarga koʻk massa uchun, 252 gektar yerga silos uchun makkajoʻxori, 168 gektar oq joʻxori, 85 gektar yerga xashaki lavlagi ekinlari turlari ekildi.

Chorvachilik xoʻjaliklari tomonidan 2021-yilda ekilgan ozuqabop ekin maydonlarida belgilangan agrotexnik tadbirlarni oʻz vaqtida amalga oshirish hisobiga jami 10280 tonna ozuqa birligi yaratilib, 2276 tonna beda pichani, 982 tonna beda koʻk oʻt massasi, 396 tonna xashaki lavlagi, 979 tonna oq joʻxori doni, 733 tonna oq joʻxori poyasi, 4915 tonna silos uchun yashil makkajoʻxori poyasi yetishtirilib, bu ozuqabop ekinlarning asosiy qismi takroriy ekin sifatida ekildi. Shuningdek, “Polvonvoy ovuli” masʼuliyati cheklangan jamiyati tomonidan 1,5 tonna ozuqabop mahsulot yetishtirishga moʻljallangan zamonaviy gidroponika tsexi ishga tushirilib, qoramollarning ozuqa bazasini mustahkamlash imkoni yaratildi.

Amudaryo tuman Veterinariya va chorvachilikni rivojlantirish boʻlimi xodimlari iqtisodiyotimiz rivoji va xalqimiz farovonligiga hissa qoʻshish yoʻlida samarali mehnat qilmoqdalar.

Robiya YOʻLDOShEVA.