OʻzLiDeP tuman Kengashi apparati rahbari tadbirkorlar faoliyati bilan tanishdi

Tadbirkorlar va ishbilarmonlar harakati – Oʻzbekiston Liberal demokratik partiyasi Amudaryo tumani Kengashi tomonidan partiya elektoratini qoʻllab-quvvatlash, partiyaning maqsad va vazifalarini keng jamoatchilikka yetkazish, ayni kundagi olib borayotgan faoliyati haqida xabardor qilish maqsadida bir qancha ishlar amalga oshirilmoqda.

Joriy yilning 2-fevralida partiya tuman Kengashi apparat rahbari Madamin Kazakov Qilichboy ovulida boʻldi va ovul fuqarolar yigʻini raisi Bahrom Qodirov bilan hududdagi tadbirkorlik subʼektlari bilan uchrashdi, tadbirkorlar uchun yaratilayotgan imkoniyatlar haqida maʼlumot berib, ularning muammo va takliflarini tingladi.

Dastlab masʼullar tadbirkor Joʻshqin Jumamurodovning ishlari bilan tanishdilar. U shifer, tunukafon mahsulotlari ishlab chiqarish bilan birga maishiy texnikalar bilan savdo qiluvchi doʻkon faoliyatini ham yoʻlga qoʻygan, yaʼni oʻzlari ishlab chiqargan mahsulotlarni oʻz doʻkonlarida sotadilar. Bu bilan tadbirkor 8 nafar hamqishlogʻini ish bilan taʼminladi.

Hududdagi yana bir tadbirkor Dilbar Begmurodova non va non mahsulotlari ishlab chiqarish bilan  shugʻullanadi. Ovuldagi barcha oshxonalar, maktabgacha taʼlim tashkilotlari, aholini issiq va xushtaʼm non, buxanka, patir kabi nonlar va non mahsulotlari bilan taʼminlayotgan tadbirkorning ham, u jalb etgan yordamchilarning ham qoʻli-qoʻliga tegmaydi. Buyurtmalar ham shunga yarasha boʻlayapti.

Nonvoyxona faoliyati bilan tanishgan masʼullar tadbirkorga faoliyatini kengaytirishi mumkinligi, buning uchun imtiyozli kreditlar mavjudligi, tadbirkorlik qilib xalqimizning koriga yarab kelayotganlar uchun yaratilayotgan imkoniyatlar haqida tushuntirdilar, partiyaning tuman Kengashi ularni doimo qoʻllab-quvvatlashini bildirdilar.

Hududdagi yana bir tadbirkor Qoʻchqorboy Norimov oʻz tomorqasida issiqxona tashkil etib, qishda ham yoz neʼmatlarini yetishtirayapti. Oʻzbekiston Liberal demokratik partiyasi tuman Kengashi apparat rahbari Madamin Kazakov, ovul fuqarolar yigʻini raisi Bahrom Qodirovlar issiqxonada ayni kunda barra piyoz yetishtirilib, bozorlarimizga  chiqarilayotgani, bu bilan tomorqachi el dasturxoni toʻkinligiga munosib hissa qoʻshayotganini taʼkidlashdi.

Yetishtirilgan hosil sotib boʻlingach, oʻrniga hozirda uy sharoitida ekib qoʻyilgan ertagi sabzavotlar koʻchirib oʻtqaziladi va parvarish qilinadi. Issiqxona faoliyati bilan tanishgan odam agar xohish boʻlsa, mehnat qilinsa, issiqxona ulkan daromad manba ekanligini anglaydi. Chunki issiqxonada yetishtiriladigan bodring, pomidor, bulgʻor qalampiri kabi ertagi ekinlar koʻchatlariga doimo xaridor topiladi. Bu bilan tadbirkor oʻz oilasi farovonligini taʼminlabgina qolmay, bozorlarimiz toʻkinligiga ham munosib hissa qoʻshadi.

Tadbirkor – yurtimizga madadkor, degan ibora bejiz aytilmagan. Oʻz mehnatlari bilan oʻzlarining turmushini obod etib, yurtimiz taraqqiyotiga ham munosib hissa qoʻshayotgan ishbilarmonlar tumanimizda koʻp. Ularga munosib sharoitlar yaratish, qoʻllab-quvvatlash, yanada ulkan marralarga ragʻbatlantirishda tadbirkorlar va ishbilarmonlar harakati Oʻzbekiston Liberal demokratik partiyasi tuman Kengashi doimo bosh-qosh boʻlmoqda.

Oygul Rajabova