QUTURISh KASALLIGINING OLDINI OLISh BOʻYIChA MAXSUS TAKTIK-OʻQUV MAShQI OʻTKAZILDI

Quturish kasalligining oldini olish maqsadida tuman Favqulodda vaziyatlar boʻlimi tomonidan maxsus taktik-oʻquv mashqi tashkil etildi.

Joriy yilning 14-fevral kuni Amudaryo tumani hokimi – Fuqaro muhofazasi boshligʻining tegishli qarori asosida Boʻz yop ovuli hududida oʻtkazilgan maxsus-taktik oʻquv mashqiga jami 74 ta shaxsiy tarkib va 10 ta texnika jalb qilindi. Hududda quturish kasalligi boʻyicha favqulodda vaziyat sodir boʻlganda tuman Favqulodda vaziyatlarning oldini olish va ularni bartaraf etish davlat quyi tizimining hamkorlikdagi harakatlari amaliy tarzda koʻrsatib berildi.

Maxsus taktik oʻquv mashqi 4 ta bosqichda oʻtkazildi. Birinchi bosqichda Boʻz yop ovul fuqarolar yigʻini binosi oldida tegishli Favqulodda vaziyatlar davlat quyi tizimi tarkibidagi xizmatchilar, kerakli kuch-vositalarning shayligi koʻrikdan oʻtkazildi. Har bir xizmat tomonidan oʻz funktsional vazifalaridan kelib chiqqan holda amalga oshirilishi lozim boʻlgan tadbirlarga aniqlik kiritib olindi.

Oʻquv mashq tadbirining ikkinchi bosqichida fuqarolar yigʻini binosining majlislar zalida koʻrgazmali oʻquv-seminar oʻtkazildi.

Oʻquv-seminarda tuman Favqulodda vaziyatlar boʻlimining Favqulodda vaziyatlarning oldini olish va ularni bartaraf etish va fuqaro muhofazasi boʻlinmasi boshligʻi Bekzod Tajiboyev aholi oʻrtasida quturish kasalligining tarqalishi bilan bogʻliq favqulodda vaziyatlar yuzaga kelishi xavfi, ularning oldini olish va bartaraf etishda Favqulodda vaziyatlar davlat quyi tizimining ahamiyati toʻgʻrisida maʼruza qildi.

Shundan soʻng, tuman Sanitariya-epidemiologiya osoyishtalik va jamoat salomatligi boʻlimi epidemiolog-shifokori Gulshod Tajiboyeva Qoraqalpogʻiston Respublikasi hududida quturish kasalligining epidemiologiyasi, etiologiyasi hamda bu borada olib borilayotgan profilaktik tadbirlar toʻgʻrisida maʼlumot berdi.

Seminar davomida tuman Tibbiyot birlashmasining yuqumli kasalliklar boʻlimi shifokori Farhod Qoʻshmanovning “Quturish kasalligi patogenezi, klinikasi, davolash va profilaktika usullari” toʻgʻrisidagi, tuman Veterinariya va chorvachilikni rivojlantirish boʻlimi boshligʻi Alisher Matkarimovning “Qoraqalpogʻiston Respublikasi hududida quturish kasalligi boʻyicha mavjud epizootik vaziyat hamda uni oldini olish borasida olib borilayotgan epizootiyaga qarshi tadbirlar” toʻgʻrisidagi maʼruzalari ham tinglandi. Maʼruzachilar quturish kasalligi tarqalishining oldini olish borasidagi chora-tadbirlar haqida keng toʻxtalib, kerakli tavsiyalarni berib oʻtdilar.

Tadbirning uchinchi bosqichida quturish kasalligiga gumon qilingan bemor aniqlanganda Favqulodda vaziyatlar davlat quyi tizimi xizmatlarining harakatlari amaliy ravishda koʻrsatib berildi.

Amaliy tarzda odamlarning hayvonlardan jabrlangan vaqtda hududdagi davolash profilaktika muassasalariga murojaat qilgani, jabrlanuvchiga birinchi yordam koʻrsatilgani, yaʼni jarohatlangan joy 20 foizli kir sovun eritmasi bilan yaxshilab ishqalab zararsizlantirilishi va oqar suvda yaxshilab yuvilishi, jarohat quritilib, atrofiga 5 foizli yod surkalishi koʻrsatildi. Shartli jabrlanuvchi rabiolog shifokorga vaktsinatsiya uchun yuborildi. Unga zarar yetkazgan hayvonning toifasiga qarab, davolash maqsadida vaktsinatsiya qilindi. Shundan soʻng, Sanitariya-epidemiologiya osoyishtalik va jamoat salomatligi boʻlimiga shoshilinch xabar berilib, Veterinariya boʻlimi ham xabardor etildi.

Ushbu bosqichda Tibbiyot birlashmasida yuqumli kasalliklar shifokori kasallikka gumon qilingan fuqaroni qabul qilish, quturish kasalligiga xos belgilarini aniqlash, bemorga tegishli tibbiy muolajalar qilish, holat boʻyicha kerakli joylarni xabardor qilishga doir amalga oshirgan harakatlar yuzasidan axborot berildi. Shuningdek, Sanitariya-epidemiologiya osoyishtalik va jamoat salomatligi boʻlimining epidemiologi tomonidan ham bemor jabrlangan hududda epidemiologik anamnez yigʻildi va hududda epidemiologik, epizootologik surishtirish ishlari oʻtkazildi.

Undan tashqari, it ovlash brigadasi tomonidan hududdagi daydi itlar tutib ketildi, tibbiyot va veterinariya xodimlari xonadonlarda sanitariya-targʻibot ishlarini olib borishdi. Veterinariya va chorvachilikni rivojlantirish boʻlimi xodimlari esa bemorga jabr keltirgan hayvonni va ushbu hududda saqlanayotgan boshqa uy hayvonlarini veterinar tekshiruvdan oʻtkazish, ularni 10 kunga nazoratga olish ishlarini bajarishdi.

Tartibga koʻra, Veterinariya va chorvachilikni rivojlantirish boʻlimi xodimlarining bemorga jabr keltirgan hayvon tekshiruvdan oʻtkazishi, unga quturish kasalligi tashxisi qoʻyilganda Obodonlashtirish boshqarmasining qarovsiz hayvonlarni tutish brigadasi hayvonni ushlashi va nazorat joyiga yetkazishi amalda batafsil koʻrsatib berildi.

Maxsus taktik-oʻquv mashqi yakuni boʻyicha fuqarolar yigʻini binosi majlislar zalida oʻtkazilgan yigʻilishda ishtirokchilarning kamchiliklari koʻrsatilib, kelgusida bunday kamchiliklarga yoʻl qoʻyilmasligi kerakligi tushuntirildi hamda fikr-mulohazalar almashildi.

Boʻlib oʻtgan ushbu maxsus taktik-oʻquv mashqi natijasiga koʻra tuman Favqulodda vaziyatlar davlat quyi tizimining funktsional va hududiy quyi tizimi xizmatlari favqulodda vaziyatlar yuzaga kelganda ularni bartaraf etishga tayyor, deb baholandi.

B.Tajiboyev, tuman FVBning boʻlinma boshligʻi.