“TAShABBUSLI BYuDJET” JARAYoNIDA IShTIROK ETING VA TAKLIFLARINGIZNI BILDIRING

Prezidentimizning 2021-yil 13-apreldagi “Byudjet jarayonida fuqarolarning faol ishtirokini taʼminlash boʻyicha qoʻshimcha chora-tadbirlar toʻgʻrisida”gi qaroriga va Oʻzbekiston Respublikasi Oliy Majlisi Senatining 2021-yil 22-apreldagi KQ-213-IV-sonli qarori bilan tasdiqlangan “Tuman (shahar) byudjetlari mablagʻlarini jamoatchilik fikri asosida shakllantirilgan tadbirlarga yoʻnaltirish tartibi toʻgʻrisida”gi Namunaviy nizomga asosan, joriy yilning fevral oyida “Tashabbusli byudjet” jarayonining birinchi bosqichi oʻtkazilishi rejalashtirilgan.

2022-yildan boshlab mamlakatimizning barcha tuman (shahar)larida tegishli byudjetlarning tasdiqlangan umumiy xarajatlarining 5 foizi jamoatchilik fikri asosida shakllantirilgan tadbirlarni moliyalashtirishga yoʻnaltiriladi. Shunga muvofiq Amudaryo tumanida 2022-yil uchun tasdiqlangan vaqtinchalik xarajatlar smetasida fuqarolar byudjeti joriy yildagi birinchi bosqichi uchun koʻzda tutilgan mablagʻlar, 2021-yil yakunlari boʻyicha shakllangan erkin qoldiq mablagʻlarining kamida 30 foiz qismi, 2021-yil III chorak yakunlari boʻyicha mahalliy byudjet daromadlar rejasining ortiqcha bajarilgan qismi mablagʻlarining 30 foiz qismi, 2021-yilda oʻtkazilgan tashabbusli byudjet jarayoni yakunlariga koʻra ishlarni amalga oshirish uchun hisob raqamlarga ajratilgan mablagʻlarning iqtisod qilingan qismi hisobidan jami 5 mlrd. 476 mln. 905 ming soʻm mablagʻlar joriy yildagi tashabbusli byudjet jarayonining birinchi bosqichi uchun shakllantirildi.

Ushbu mablagʻlar tumanimiz fuqarolarini qiynab kelayotgan jamoaviy muammolarni hal etishga qaratiladi. Yaʼni xiyobonlar, bolalar maydonchasi barpo etish, ichki yoʻllarni va ijtimoiy soha obʼektlarini taʼmirlash, ekologiyani yaxshilash, ichimlik va oqar suv bilan taʼminlash, koʻcha chiroqlarini oʻrnatish boʻyicha sizlar “Tashabbusli byudjet” jarayonida ishtirok etib, oʻz takliflaringizni bildirishlaringiz mumkin.

Oʻz hududlaringizning ijtimoiy va iqtisodiy rivojlanishi uchun 2022-yil 1-fevraldan 23-fevralgacha taklif kiritishingiz, 2022-yil 5-martdan 25-martga qadar ushbu takliflarga ovoz berishingiz mumkin.

Davlat byudjetining shakllanishi va hududlarning ijtimoiy-iqtisodiy rivojlanish loyihalarini ishlab chiqish jarayoniga aholini faol jalb etish va joylardagi dolzarb muammolarni hal etishda jamoatchilik ishtirokini kengaytirish maqsadida Moliya vazirligi tomonidan ishga tushirilgan “openbudget.uz” axborot portali ishga tushirilgan.

Imkoniyatdan foydalanib hududingiz obod, yoʻllaringiz ravon boʻlishini istasangiz marhamat – taklif yoʻllang, taklifingizni mahalladoshlaringiz ham qoʻllab-quvvatlasa, orzularingiz roʻyobga chiqadi.

Bu boʻyicha savollaringiz boʻlsa, 97 787 06 07, 61 515 31 90 telefon raqamlariga qoʻngʻiroq qiling.