IJRO SAMARADORLIGINI OShIRISh BORASIDA HAMKORLIK YaNADA KUChAYTIRILADI

Fuqarolik ishlari boʻyicha Amudaryo tuman sudi, Majburiy ijro byurosi tuman boʻlimi masʼullari, davlat ijrochilari ishtirokida oʻtkazilgan seminar davomida ish yuritishda “E-XSUD” tizimi va “MIB Portal” dasturi orqali maʼlumotlar almashinuvini yanada takomillashtirish, hamkorlikni mustahkamlash, xato-kamchiliklarni bartaraf qilib borish kabi masalalar muhokama etilgan edi. Shunga koʻra, Majburiy ijro byurosi tuman boʻlimi tomonidan oʻtgan davrda amalga oshirilgan ishlar muhokama etilib, kelgusida sud hujjatlarining ijrosini qonuniy muddatlarda toʻliq taʼminlash, fuqarolarning sudga boʻlgan ishonchini mustahkamlash va ularning manfaatlarini kafolatli himoya qilish borasida qatʼiy choralar, tegishli vazifalar belgilab olindi.

Taʼkidlash joizki, Majburiy ijro byurosining Amudaryo tumani boʻlimiga 2021-yil 31-dekabr holatiga oʻtgan yildan qoldiq bilan birga 128,4 mlrd. soʻmlik jami 16,4 ming ijro hujjatlari kelib tushgan va oʻtgan yil davomida 97,8 mlrd. soʻmlik 9 478 ta ijro hujjatlarining ijrosi tamomlangan. Shundan 58,4 mlrd. soʻmlik 6 533 ta ijro hujjatlari amalda undirilgan.

Fuqarolik ishlari boʻyicha sudlardan 26,4 mlrd. soʻmlik 6 866 ta ijro hujjatlari kelib tushgan boʻlsa, “Sud hujjatlari va boshqa organlar hujjatlarini ijro etish toʻgʻrisida”gi Oʻzbekiston Respublikasi Qonunining 8,24-moddalariga asosan 2,9 mlrd. soʻmlik 465 ta, yaʼni 6,7 foiz ijro hujjatlaridagi kamchiliklarni bartaraf qilish uchun ijroga qabul qilinmasdan qaytarilgan.

Misol tariqasida keltirib oʻtish oʻrinliki, Fuqarolik ishlari boʻyicha Amudaryo tumani sudining 2021-yil 24-dekabr kungi ijro hujjatiga koʻra qarzdor S.J. dan davlat foydasiga DSI foydasiga 2 mln. 393,6 ming soʻm soliq qarzi undirish toʻgʻrisidagi ijro hujjati “MIB Portal” dasturi orqali kelib tushgan va ushbu ijro hujjatining mazmuni, qaysi ish boʻyicha berilgan, qarzdor, undiruvchilar toʻgʻrisidagi maʼlumotlar yoʻqligi sababli, Qonunning 8,24-moddasiga asosan qaytarilgan.

Bundan tashqari, ushbu sudning 2021-yil 22-oktyabr kungi ijro hujjatiga koʻra, qarzdor Q.A. dan undiruvchi Oʻ.S. ning foydasiga 1,3 mln. soʻm undirish toʻgʻrisidagi ijro hujjati “MIB Portal” dasturi orqali kelib tushgan va ushbu ijro hujjatining PDF ilovasi dasturida yoʻqligi sababli Qonunning 8,24-moddalariga asosan qaytarilgan.

Shuni alohida taʼkidlash joiz, Byuro tomonidan ijro hujjatlarini asossiz qaytarish holatlari faoliyatda oʻrin olmagan boʻlib, endilikda ijro hujjatlarini yuborishga masʼul sud organi va Byuro xodimlari ish yuritishda “E-XSUD” tizimi va “MIB Portal” dasturi orqali maʼlumotlar almashinuvini yanada takomillashtirish, ortiqcha ovoragarchiliklarning oldini olish, hamkorlikni mustahkamlash, xato-kamchiliklarni bartaraf qilib borish boʻyicha tizimli choralar belgilandi.

Majburiy ijro byurosi Axborot xizmati.