“MIRZO ULUGʻBEK VORISLARI” TANLOVINING TUMAN BOSQIChI OʻTKAZILDI

Mamlakatimizning zukko, ilmli, maʼrifatli va intiluvchan yoshlari uchun oʻzligini namoyon etishlari uchun yana bir imkoniyat yaratildi.

“Isteʼdodli yoshlarni qoʻllab-quvvatlash, “Ulugʻbek jamgʻarmasi faoliyatiini rivojlantirish chora-tadbirlari toʻgʻrisida”gi hukumatimiz qaroriga muvofiq endilikda 2022-yildan boshlab, har yili “Mirzo Ulugʻbek vorislari” respublika tanlovi oʻtkaziladi.

Qarorda belgilanishicha, isteʼdodli yoshlarni qoʻllab-quvvatlash “Ulugʻbek” jamgʻarmasi, Innovatsion rivojlanish vazirligi, Yoshlar ishlari agentligi, Oliy va oʻrta maxsus taʼlim vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari hamkorligida tashkillashtirilib, ushbu tanlovda 16 yoshdan 25 yoshgacha boʻlga yoshlar ishtirok etishi mumkin.

Iqtidorli yoshlarni kashf qilish, ularning tashabbuslarini qoʻllab-quvvatlash borasida amalga oshirilayotgan ishlarni yanada jadallashtirish, ularni ilmiy-texnik faoliyatga keng jalb qilish, olis hududlarda istqomat qilayotgan yigit-qizlarning bilim, koʻnikma va malakasini oshirish, innovatsion gʻoyalarini amaliyotga tatbiq etish va hayotda oʻz oʻrinlarini topishiga koʻmaklashish maqsadida tashkil etilgan tanlovning ilk bosqichi Amudaryo tumanida shu yil 16-mart kuni boʻlib oʻtdi.

Tuman Madaniyat saroyida boʻlib oʻtgan tanlovda Qoraqalpogʻiston Respublikasi hududiy innovatsion rivojlanish boshqarmasi, “Yoshlar kelajagimiz” jamgʻarmasi Qoraqalpogʻiston Respublikasi filiali boshqarmasi, Oʻzbekiston Respublikasi Prezidenti huzuridagi Orolboʻyi xalqaro innovatsiya markazi, Yoshlar ishlari agentligi tuman boʻlimi masʼullari ishtirok etib, tanlovning saralash bosqichi, yaʼni testdan muvaffaqiyatli oʻtgan 10 nafar isteʼdodli yoshlarning innovatsion loyihalarini koʻrib chiqdilar.

Ushbu tanlovni oʻtkazish yuzasidan hukumatimiz qabul qilgan qarorda tanlovning birinchi bosqichi tuman va shaharlarda fevral-mart oylarida oʻtkazilishi, unda eng yuqori natijaga erishgan 5 nafardan nomzodlar 2-bosqichiga ishtirok etish huquqini qoʻlga kiritishi belgilangan.

Shunga muvofiq tumanimiz oʻtkazilgan tanlovda 5 nafar isteʼdodli yoshlar gʻolib deb topilib, keyingi bosqichga yoʻllanma berildi hamda maxsus sertifikat, bazaviy hisoblash miqdorining 5 baravari, yaʼni 1 million 350 ming soʻm pul mukofoti bilan taqdirlandilar.

Tanlov gʻoliblari endi shu yilning aprel oyida oʻtkaziladigan “Mirzo Ulugʻbek vorislari” tanlovining Qoraqalpogʻiston Respublikasi bosqichida ishtirok etib, oʻz intellektual salohiyatini sinovdan oʻtkazadilar.

Ushbu tanlovning ikkinchi bosqichi gʻoliblari bazaviy hisoblash miqdorining 10 baravari, Respublika bosqichi gʻoliblari esa 20 baravari miqdorida bir martalik pul mukofoti, diplom bilan taqdirlanadi.

Tanlovning ilk bosqichidan muvaffaqiyatli oʻtgan tumanimizning iqtidorli yoshlarining keyingi bosqichlarda ham gʻoliblikka erishishlarini tilab qolamiz.

O.RAJABOVA.