GULZOR MAHALLASIDA YaNGI ZAMONAVIY SAVDO VA XIZMAT KOʻRSATISh ShOXOBChASI IShGA TUShDI

Mamlakatimiz iqtisodiyotida kichik biznes va xususiy tadbirkorlikning oʻrni va mavqei tobora oshib bormoqda. Tadbirkorlik subʼektlarini har tomonlama qoʻllab-quvvatlash yuzasidan amalga oshirilayotgan keng koʻlamli chora-tadbirlar mulkdorlar safi ortib, ichki bozorni raqobatbardosh mahsulotlar bilan toʻldirib, yangi ish oʻrinlarini yaratish barobarida aholi daromadlarini koʻpaytirish va turmush farovonligini oshirishga xizmat qilayotir.

Muhtaram Yurtboshimiz tashabbusi bilan mamlakatimiz ovul va mahalla, shaharcha fuqarolar yigʻinida hokim yordamchilari faoliyati yoʻlga qoʻyilgani, ular aholi bilan yaqindan tanishib, turmushi sifatini yaxshilash, kambagʻallikni qisqartirish borasida koʻpgina xayrli ishlarni amalga oshirayotgani xalqimizning haqli eʼtirofiga sazovor boʻlmoqda.

Amudaryo tumanida ish boshlagan hokim yordamchilari ham oʻz hududlari aholisi hayoti bilan yaqindan tanishib, xatlovdan oʻtkazib, zarur hollarda amaliy yordamlar bermoqdalar.

Yaqinda Mangʻit shahrining Gulzor mahallasida tadbirkor Rasul Yangiboyev loyiha qiymati 2 milliard soʻmlik yangi, zamonaviy, uch qavatli savdo va aholiga xizmat koʻrsatish shoxobchasini ishga tushirdi. Bu mablagʻning 1 milliard soʻmi tadbirkorning oʻz mablagʻi, 1 milliard soʻm esa mahalladagi hokim yordamchisi Akbar Rajabov tomonidan berilgan tavsiyanoma asosida olingan imtiyozli bank kreditidir. Ushbu binoda “Har bir oila - tadbirkor” dasturi asosida hokim yordamchisi tavsiyanomasiga koʻra 33 million soʻm imtiyozli kredit olgan yana bir ayol Muyassar Abdullayeva tikuvchilik yoʻnalishida tadbirkorlik faoliyatini boshladi. Shoxobcha ishga tushirilishi natijasida bu yerda 8 ta yangi ish oʻrni yaratildi.

Mahalla fuqarolari orasida hokim yordamchisining yordami bilan banklarning imtiyozli krediti hisobiga tadbirkorlik faoliyatini boshlagan, oilasi iqtisodini yuksaltirishga intilayotganlar koʻp. Kam taʼminlangan oila roʻyxatida turgan Joʻrabek Sobirboyev, Sanobar Qoʻchqorov, Botir Saʼdullayevlar 33 million soʻmlik bank krediti hisobiga oʻz oilalarida nasldor qoʻylar parvarishlashni boshlashdi. Ozoda Habiyeva, Feruza Matkarimova, Madina Boltaboyevalar esa kredit mablagʻlari hisobiga zamonaviy tikuv mashinalari sotib olib tikuvchilik tsexi faoliyatini yoʻlga qoʻyishdi.

Joriy yil boshidan mahalladagi kam taʼminlangan oilalarning 4 tasiga subsidiya asosida issiqxonalar qurib berildi. Natijada 22 nafar ishsiz fuqarolar bandligi taʼminlanib, doimiy daromadga ega boʻldilar, 18 nafar ishsiz fuqarolar oʻz-oʻzini band qilishga erishdilar.

Shuningdek, “Mangit city” masʼuliyati cheklangan jamiyati 225 million soʻm imtiyozli bank krediti hisobiga avtomobillarga texnik xizmat koʻrsatish shoxobchasiga yangi zamonaviy uskunalar sotib olib, oʻz faoliyatini kengaytirdi.

Amalga oshirilayotgan buningdek saʼy-harakatlar yurtdoshlarimiz turmushi sifati oshishiga xizmat qilishi bilan ahamiyatlidir.

Oygul RAJABOVA.