QORAQALPOGʻISTONDA XIZMAT KOʻRSATGAN MADANIYaT XODIMI GULMIRZA NURMATOVNING 80YILLIK YuBILEYI KENG NIShONLANDI

Hayotda shunday insonlar boʻladiki, ularning faoliyati nafaqat oʻz jamoasi yutuqlariga, balki oʻsha soha rivojiga ham munosib hissa boʻlib qoʻshiladi. Uzoq yillar tumanimizdagi 9-sonli Bolalar musiqa va sanʼat maktabini, tuman Madaniyat boʻlimini mahorat bilan boshqargan, yoshligidan to nuroniy yoshigacha tumanimizda sanʼatni rivojlantirishga, yosh isteʼdodlarni izlab topish, ularning iqtidorini yuksaltirishga baxshida qilgan taniqli hofiz, bastakor, koʻplab yoshlarning ustozi Gulmirza Nurmatovni ana shunday insonlardan biri desak, mubolagʻa boʻlmaydi.

Gulmirza Nurmatov shu yilning 2-aprelida tabarruk 80 yoshini qarshi oldi. Shu munosabat bilan 1-aprel kuni tuman Madaniyat boʻlimida otaxon sanʼatkor bilan ijodiy uchrashuv boʻlib oʻtdi. Tadbirga soha xodimlari, Gulmirza Nurmatov bilan hammaslak boʻlib ishlab, ayni kunda keksalik nafaqasiga chiqqan qadrdonlari, shogirdlari, doʻstlari ishtirok etdilar.

Tadbirni tuman Madaniyat boʻlimi xodimi Oybek Begimov boshqarib bordi. Dastlab soʻzga chiqqan Gulmirza Nurmatovning sobiq hamkasbi Omonboy Hasanov yubilyarning hayoti, mehnat faoliyati va tumanimizda sanʼatni rivojlantirishdagi xizmatlari haqida batafsil maʼlumot berdi.

Taʼkidlanganidek, Gulmirza Nurmatovni yoshligidayoq ustoz sanʼatkorlar Nazir Nahimov, Usmon Ahmedov, Rajabboy Bobojonovlar oʻz saflariga chorlagan, turli tadbirlarda, kontsert dasturlarda birga qoʻshiqlar ijro etib, hamkorlikda mehnat qilishgan.

Gulmirza Nurmatov sohir ovoz bilan kuylagan qoʻshiqlari tumanimizgina emas, respublikamiz miqyosida koʻplab tomoshabinlarga manzur boʻlgan. U uzoq yillar 9-sonli Bolalar musiqa va sanʼat maktabiga, tuman Madaniyat boʻlimiga rahbarlik qilgan, sohadagi fidoyi xizmatlari tufayli “Qoraqalpogʻistonda xizmat koʻrsatgan madaniyat xodimi” unvoni bilan taqdirlangan.

Gulmirza Nurmatov tumanimiz miqyosida oʻtkaziladigan ommaviy bayram, sayllarda xor ijrochiligi, guruh raqslarini joriy etgan, tomoshagohda fon yaratishni olib kirgan.

Tadbirda Qorqalpogʻiston Respublikasi Madaniyat Vazirligining xalq ijodiyoti va badiiy havaskorlikni rivojlantirish sektori rahbari Nurmuhammad Jiyanboyev tabrigidan soʻng tuman hokimligi tashkiliy-kadrlash guruhi yetakchi mutaxassisi Ozod Almurodov, tuman Mahalla va oilani qoʻllab-quvvatlash boʻlimi boshligʻi oʻrinbosari Bahodir Boltaboyev, mehnat faxriysi Rustam Roʻzmetovlar yubilyarga tuman hokimligining sovgʻalarini topshirdilar va qutlugʻ 80 yoshi bilan qutladilar.

Aytish joizki, bir vaqtlar tumanimizda Hayitboy bolomonchi ismli kishining chalgan surnay, bolomon ohanglari odamlarga juda manzur boʻlgan. U kishining vafotidan soʻng bu asboblarni chaladigan odam qolmagani, biroq musiqa va sanʼat maktabida qiziquvchilar koʻpligini inobatga olib va sanʼatning ushbu turi yoʻqolib ketmasligi uchun shunchaki bir havaskor surnay chaluvchi kishini oʻqituvchi maktabga ishga olib, surnay sinfini ochgan va keyinchalik ushbu asbobni chaluvchi profissional kadrlar yetishib chiqishiga sababchi boʻlgan. Hozirgi 9-sonli va 21-sonli Bolalar musiqa va sanʼat maktablari ham aynan Gulmirza Nurmatovning saʼy-harakatlari bilan qurilgan. “Jayxun moʻʼjizalari” sahna tsirk jamoasi ham uning tashabbusi bilan tashkil etilgan.

Gulmirza Nurmatovning buningdek fidoyi xizmatlarini butun xalqimiz haqli ravishda eʼtirof etadi. Bu tadbirda ham yaqqol namoyon boʻldi.

Taʼlim faxriysi Ahmad Masharipov, tuman Madaniyat boʻlimida uzoq yillar kutubxonlar tarmogʻiga rahbarlik qilgan Gulchehra hoji opa Doʻsimbetova, taniqli hofiz Anvar Xudoyberganovlarning tabriklaridan soʻng tumanimiz sanʼatkorlari ijrosida Gulmirza Nurmatov kuy bastalagan qoʻshiqlar ijro qilindi.

Tadbir soʻngida Gulmirza Nurmatov oʻziga koʻrsatilayotgan hurmat-ehtirom uchun tashkilotchilarga, barcha ishtirokchilarga minnatdorchilik bildirdi.

Oygul RAJABOVA.