AMUDARYo TUMAN MAKTABGAChA TAʼLIM BOʻLIMIDA “KORRUPTsIYa – JAMIYaT KUShANDASI” MAVZUSIDA TADBIR BOʻLIB OʻTDI

Hozirgi kunda dunyo miqyosida insoniyat uchun hal etilishi lozim boʻlgan eng asosiy masalalardan biri korruptsiya muammosidir. Shu sababli korruptsiyaga qarshi kurashish hamda uning oldini olish maqsadida idora va tashkilotlarda huquqshunoslar ishtirokida korruptsiyaga qarshi kurashish va uning oldini olish mavzusida davra suhbatlari, ochiqlik va shaffoflikka asoslangan yigʻilishlar oʻtkazilib, bu boradagi muammolar atroflicha muhokama qilinmoqda.

Amudaryo tumani Maktabgacha taʼlim boʻlimida boʻlib oʻtgan tadbirda ham bu borada sohada amalga oshirilayotgan ishlar, yechimini kutayotgan muammolar atroflicha muhokama etildi.

Tadbirda Qoraqalpogʻiston Respublikasi Maktabgacha taʼlim vazirligining Korruptsiyaga qarshi kurashish komplaens nazoratni oshirish boʻyicha bosh mutaxassisi, Amudaryo tumani prokuraturasi, tuman Yuridik xizmat koʻrsatish markazi, shuningdek, tuman Maktabgacha taʼlim boʻlimining masʼul xodimlari hamda tumandagi maktabgacha taʼli tashkilotlari rahbarlari ishtirok etdilar.

Tadbirni Amudaryo tuman Maktabgacha taʼlim boʻlimi mudiri Saida Sodiqova ochdi va mamlakatimizda tobora dolzarb masalaga aylanib borayotgan korruptsiyaga qarshi kurashish va korruptsiyasiz jamiyat qurish maqsadida Respublikamizda olib borilayotgan ishlarga toʻxtaldi.

Tadbirda Maktabgacha taʼlim vazirligi tomonidan korruptsiyaga qarshi kurashish borasida Oʻzbekiston Respublikasi Qonunchilik bazasi va amalga oshirilayotgan ishlar yuzasidan masʼullar tomonidan keng tushuntirishlar berildi. Bu borada qabul qilingan qonunlarning mazmun-mohiyati yuzasidan Amudaryo tumani Adliya boʻlimi bosh maslahatchisi Jamshid Bekimbetov batafsil soʻz yuritdi.

Yigʻilishda Qoraqalpogʻiston Respublikasi Maktabgacha taʼlim vazirligi, Amudaryo tumani prokuraturasi masʼullari soʻzga chiqib, Korruptsiyaga qarshi kurashish boʻyicha soʻnggi ikki yil ichida qabul qilingan Prezident Farmon va Qarorlarining mazmun-mohiyati hamda ijrosini taʼminlash yuzasidan olib borilayotgan ishlar toʻgʻrisida maʼlumotlar berdi.

Jumladan, Prezident Farmonlari va Qarorlari asosida amalga oshirilgan nazorat tadbirlari jarayonida Qoraqalpogʻiston Respublikasida 2020-yilda 90 ta korruptsion jinoyatlar sodir etilgan boʻlsa, 2021-yil davomida 229 ta shu turdagi jinoyatlar aniqlangan. Bu koʻrsatkich ancha koʻpayganining asosiy sababi qurilish sohasidagi talon-tarojlik va qator huquqbuzarlik jinoyatlarining oʻsishi bilan bogʻliqligi taʼkidlandi.

Faqat joriy yilning oʻzida sodir qilingan korruptsion jinoyatlarning 69 tasi qurilish sohasiga taalluqli boʻlib, 2020-yilda Respublikadagi turli darajadagi lavozimli shaxslarning 54 nafari, turli soha xodimlarining 17 nafari, fuqarolarning 31 nafari va 2021-yil davomida lavozimli shaxslarning 202 nafari, turli soha xizmatchilarining 94 nafari, fuqarolarning 54 nafari korruptsiya bilan bogʻliq turli jinoyatlarni sodir qilganligi uchun jinoiy javobgarlikka tortilgan.

Shuningdek, masʼullar korruptsiya bilan bogʻliq jinoyatlarning 21 tasi Halq taʼlimi vazirligi sohasida, 22 tasi Maktabgacha taʼlim sohasida, 5 tasi Oliy va oʻrta maxsus taʼlim vazirligi sohasida, 54 tasi ishsiz fuqarolar tomonidan sodir etilganini qayd etishdi.

Tadbirda Maktabgacha taʼlim sohasida aniqlangan korruptsion holatga ham toʻxtalib oʻtildi, bu sohada jinoiy javobgarlikka tortilgan 15 nafar shaxslardan 3 nafari maktabgacha taʼlim sohasiga ishga kiritish uchun pora talab qilish, 12 nafari byudjet xarajatlarini talon-taroj qilish bilan bogʻliq jinoyatlarini sodir etishgan.

Tadbir ishtirokchilari tomonidan Respublikada amalga oshirilgan ishlar bilan bir qatorda, korruptsiyaga qarshi kurashish, oʻz yechimini kutib turgan masalalar va toʻliq foydalanilmagan imkoniyatlar bor ekanligi va kelajakda huquqni muhofaza qilish organlari bilan birgalikda Qoraqalpogʻiston Respublikasi hududida korruptsiyaning har qanday koʻrinishiga qatʼiy barham berish boʻyicha fikrlar bildirildi.

Bu kabi tadbirlarni oʻtkazishdan maqsad soha vakillarining huquqiy savodxonligini oʻstirish, va shu orqali korruptsiya kabi jamiyat kushandasiga qarshi ommaviy kurashishni yanada kuchaytirishdan iboratdir.

Robiya YOʻLDOShEVA.