Olmazor mahallasida tuman hokimining sayyor qabuli oʻtkazildi

Oʻzbekiston Respublikasi Prezidenti tomonidan mamlakatni jadal ijtimoiy-iqtisodiy rivojlantirish, aholi uchun munosib turmush sharoiti yaratish, shuningdek, aholining bunyodkorlik salohiyatini roʻyobga chiqarishga qaratilgan qator muhim davlat va hududiy dasturlar, qonun hujjatlari qabul qilindi.

Joylarda ishlarning haqiqiy ahvolini har tomonlama va chuqur oʻrganish, xalq bilan bevosita muloqotning sifat jihatdan yangi va samarali shakllarini joriy etish maqsadida sektor rahbarlari tomonidan oʻtkazilayotgan sayyor qabullar oʻzining ijobiy samarasini bermoqda.

Davlat va jamiyat oʻrtasidagi aloqalarni mustahkamlaydigan mazkur xalq bilan muloqot uslubi tobora oʻziga xos anʼanaga aylanib fuqarolar bilan bogʻliq muammolarning oʻz vaqtida yechim topishida muhim ahamiyat kasb etmoqda.

21-aprel kuni tumanimizning Olmazor mahallasi hududida joylashgan 82-sonli umumiy oʻrta taʼlim maktabi binosida tuman hokimi, 1-sektor rahbari Soʻltonboy Yoʻldashev, tuman Xalq qabulxonasi boʻlimi mudiri Erkin Rajabov hamda mutasaddi tashkilot masʼullari ishtirokida sayyor qabul boʻlib oʻtdi.

Unda tumanimizning Olmazor, Gulzor va Oybek mahallalarida istiqomat qiluvchi 60 dan ortiq faol va muammosi bor boʻlgan aholi vakillari qatnashib, oʻzini qiynayotgan masalalar bilan tuman hokimiga murojaat qilishdi.

Qabul davomida fuqarolardan oʻn beshdan ortiq turli mazmundagi murojaatlar kelib tushdi. Murojaatlardan toʻrttasi shu yerning oʻzida hal qilingan boʻlsa, baʼzilariga masʼullar biriktirilib muddatlar belgilandi.

Shu oʻrinda qayd etish lozimki, bugun har bir fuqaro uchun barcha davlat organlari va tashkilotlarning eshiklari ochiq. Davlat idoralari rahbarlari fuqarolarning murojaatlarini sokin kabinetlarda emas, balki ijtimoiy jarayonlar kechayotgan pallada joyiga borib, real holatni oʻrganmoqda.

 Tumanimizda bu kabi koʻplab sayyor qabullarning oʻtkazilishi natijasida fuqarolarning murojaatlari, mahallalarga biriktirilgan ishchi guruhlarning uyma-uy yurib aniqlagan muammolari, hududni ijtimoiy-iqtisodiy rivojlantirish yoʻlidagi toʻsiqlarni tezroq aniqlash va hal etish imkoniyatini bermoqda.

Shuningdek, ularning muntazam yoʻlga qoʻyilgani avvalgi sayyor qabul va uchrashuvlarda belgilangan topshiriq va vazifalar ijrosi ustidan nazoratni kuchaytirmoqda.

Muxtasar aytganda, sayyor qabullar aholi muammolarini joyida, tez va samarali hal etish imkonini berayotgani, hududlarda yillar davomida yigʻilib qolgan muammolarni aniqlash va bartaraf etilishida davlat organlari va tashkilotlari oldiga vazifalar qoʻyayotgani va ushbu vazifalarni toʻlaqonli bajarishga undayotgani bilan muhim ahamiyat kasb etmoqda.

Tuman hokimligining Axborot xizmati