“IJODKOR VA INTILUVChAN YoShLAR” ESTETIK FANLAR OYLIGI DOIRASIDA TANIQLI ShOIRLAR BILAN UChRAShDILAR

++ Joriy yilning 23-aprel sanasida Mangʻit shahridagi 55-sonli umumtaʼlim maktabida estetik fanlar oyligiga bagʻishlangan “Ijodkor va intiluvchan yoshlar” mavzusida adabiy-musiqiy tadbir boʻlib oʻtdi. Tadbirda mazkur maktabning ijodiy-madaniy masalalar boʻyicha targʻibotchisi Xonimjon Rajabova, Qoraqalpogʻiston Respublikasi Joʻqorgʻi Kengesi deputati, shoira Nazira Matyoqubova, maʼnaviyat fidoyilari shoir Tursunboy Abdullayev, shoir va yozuvchi Ahmad Nafasov, shoira Zulfiya Olloyorovalar hamda maktabning ijodkor oʻquvchi-yoshlari hamda oʻqituvchilar ishtirok etishdi.

Tadbirni maktabning maʼnaviy-maʼrifiy ishlar boʻyicha direktor oʻrinbosari Bahrom Hikmatullayev ochdi va maktab oʻquvchilari tomonidan amaliy fanlar boʻyicha erishilayotgan yutuqlar, toʻgaraklar faoliyati, shuningdek, besh muhim tashabbus doirasida amalga oshirilayotgan ishlar haqida qisqacha toʻxtalib oʻtdi.

Estetik fanlar oyligi munosabati bilan texnologiya, musiqa, tasviriy sanʼat chizmachilik fanlarining ahamiyati va boshqa fanlar bilan uzviy bogʻliqligini aks ettiruvchi vositalar bilan bezatilgan maktab foyesi va tadbir uchun tanlangan xonada oʻquvchilar qoʻl mehnati bilan yasalgan ijodkorlik namunalarini oʻzida mujassam etgan koʻrgazma namoyish etildi. Koʻrgazmadan joy olgan maktabning ijodkor oʻquvchi-yoshlari tomonidan tayyorlangan tikuvchilik, toʻquvchilik, shuningdek robototexnika, rassomchilik, sanʼat va kitobxonlik boʻyicha ijodiy ishlari namunalari tadbir ishtirokchilarida katta qiziqish uygʻotdi.

Tadbir davomida maktabning “Chevar qoʻllar” toʻgaragi aʼzolari tomonidan tayyorlangan va oʻquvchi-qizlar ijodkorlik qobiliyatini yanada oshirishga qaratilgan turli millatlarning hamda oʻzbek xalqining milliy liboslari, bolalar liboslari, toʻy va bazmlar, xalqimizning turli marosim liboslari namoyishi ham boʻlib oʻtdi. Milliyligimizni asrash, xalqimizning milliy-maʼnaviy merosidan faxrlanish, yoshlarimizning qiziquvchanligini oshirish, iqtidorlarini rivojlantirishga qaratilgan liboslar namoyishi nafaqat tadbir ishtirokchilari, balki har bir oʻquvchi-yoshning qalbida xalqimiz maʼnaviyati, milliy-madaniy qadriyatlaridan faxrlanish va hurmat tuygʻusini uygʻotdi.

Estetik fanlar oyligi doirasida oʻtkazilgan “Ijodkor va intiluvchan yoshlar” tadbirida Qoraqalpogʻiston Respublikasi Joʻqorgʻi Kengesi deputati, taniqli shoira Nazira Matyoqubova, Xonimjon Rajabova, Tursunboy Abdullayev, Ahmad Nafasov, Zulfiya Olloyorovalar ham soʻzga chiqishib, maktabning intiluvchan, ijodkor oʻquvchi-yoshlari tomonidan besh muhim tashabbus doirasida amalga oshirilayotgan ishlarga yuqori baho berdilar. Ayniqsa, oʻquvchilar tomonidan tayyorlangan tikuvchilik, toʻquvchilik, robototexnika, rassomlik, sanʼat, kitobxonlik yoʻnalishlari boʻyicha tayyorlangan ijodkorlik namunalari ularning yorqin kelajak sari dadil intilayotganlaridan dalolat ekanligini taʼkidladilar.

Shundan soʻng tadbir mehmonlari oʻz sheʼrlaridan oʻqib berdilar hamda maktab ijodkor yoshlarining sheʼrlarini maroq bilan tingladilar.

Tadbirda oʻquvchi-yoshlar tomonidan ijro etilgan dilrabo kuy va qoʻshiqlar barchaga koʻtarinki kayfiyat bagʻishladi.

Tadbir yakunida maktabning amaliy fanlar uslubbirlashma Kengashi aʼzosi, texnologiya fani oʻqituvchisi Shahnoza Qurbonboyeva, musiqa fani oʻqituvchisi Bahodir Atoyev, tasviriy sanʼat fani oʻqituvchisi Shokir Orazboyevlar amaliy fanlar oyligi doirasidagi barcha tadbirlarda faol ishtirok etgan oʻquvchi-yoshlarga minnatdorchilik bildirishib, oʻz sovgʻalarini taqdim etdilar.

Robiya YOʻLDOShEVA.