“KITOB – BIZNI BIRLAShTIRADI” TADBIRIDA YoSh IJODKORNING ILK ShEʼRLAR TOʻPLAMI TAQDIMOT ETILDI

Amudaryo tumani xalq taʼlimi boʻlimiga qarashli 3-sonli umumtaʼlim maktabida Prezidentimiz boshlab bergan 5 ta muhim tashabbus doirasida yoshlar kitobxonligini rivojlantirish, ijodkor yoshlarni yanada ragʻbatlantirish, ularning isteʼdodlarini yuzaga chiqarish, qoʻllab-quvvatlashga qaratilgan amaliy tadbirlar tufayli maktab oʻquvchilari orasidan alohida iqtidorga ega yosh ijodkorlar yetishib chiqmoqda. Bunda maktab kutubxonasi kutubxonachisi  Tozaxon Qdirniyozova tomonidan amalga oshirilayotgan maʼnaviy-maʼrifiy davra suhbatlari, taniqli shoir va yozuvchilar bilan uchrashuvlar, kitobxonlik targʻibotiga bagʻishlangan tadbirlar  muhim ahamiyat kasb etmoqda.

Joriy yilning 14-aprel sanasida maktab kutubxonasida oʻtkazilgan “Kitob bizni birlashtiradi” adabiy-musiqiy tadbirda ham maktab oʻquvchilari orasida ilmga intiluvchan, qalblari ijodkorlikka moyil havaskor-yoshlar, koʻpligiga ishonch hosil qildik. Xususan, Aynura Sarsenboyeva, Qamar Orinboyeva, Umida Otajonova, Dilshodbek Murodboyev, Nafisa Kazakboyeva, Janar Paraxatova, Albina Saparbayeva, Moldir Amanbayeva, Sandugash Dauletbayeva, Jazira Bazarboyeva, Ulugʻbek Sagʻinboyev, Yernazar Kalmuratov, Nurlan Nazarbayev kabi biri-biridan epchil, bilimdon va hozirjavob oʻquvchilar oʻzlarining chiqishlari bilan haqiqiy kitobxon ekanliklarini namoyish etdilar.

 “Kitob – bizni birlashtiradi” shiori ostida oʻtkazilgan tadbir davomida kitobxon oʻquvchilar oʻzbek, qoraqalpoq, qozoq, rus mumtoz va hozirgi zamon adabiyoti namoyondalari ijodidan namunalar oʻqidilar. Jahon adabiyotining durdona asarlari haqida oʻz fikrlari ushbu asarlardan olgan taassurotlari haqida toʻlqinlanib soʻzladilar.

Tadbirda maktab kutubxonasi kutubxonachisi Tozaxon Qdriniyazova Prezidentimizning besh muhim tashabbusi doirasida amalga oshirilayotgan kitobxonlik targʻibotiga bagʻishlangan tadbirlar haqida toʻxtalib, kitob mutolaasi tufayli bir-birlari bilan samimiy muloqot oʻrnatayotgan oʻquvchilar, ularning qiziqishlari, ijodiy izlanishlari haqida faxrlanib soʻz yuritdi.

Darvoqe, kitobxon yoshlardan Shahzoda Joʻlliboyeva, Muhabbat Orinbosarova, Navbahor Sarsenboyevalarning sheʼrlari tuman va Respublika matbuotida chop etilibgina qolmay, Shahzoda Joʻlliboyeva bilan Muhabbat Orinbasarovaning ilk sheʼriy toʻplamlari nashrdan chiqdi. Maktabning yana bir iqtidorli oʻquvchisi Navbahor Sarsenbayevaning sheʼrlar toʻplami va bir guruh ijodkor oʻquvchilar sheʼrlaridan iborat gala toʻplam nashrga tayyorlanmoqda.

Biz ijodiy jamoamiz bilan mazkur maktabda boʻlgan kunimiz “Kitob – bizni birlashtiradi” maʼnaviy-maʼrifiy tadbir davomida Muhabbat Orinbasarovaning “Haq niyetler” deb nomlangan ilk sheʼrlar va hikoyalar toʻplamining taqdimoti ham oʻtkazildi. Toshkent shahridagi “Muharrir” nashriyotida chop etilgan Muhabbat Orinbasarova qalamiga mansub mazkur kitobdan uning ona Vatan, doʻstlik, tinchlik, mehr-oqibatni tarannum etuvchi sheʼrlari va hikoyalari oʻrin olgan.

Kitob taqdimoti munosabati bilan tadbir mehmonlari – “Jayxun ilhomlari” NNT raisi, Oʻzbekiston Jurnalistlari ijodiy Uyushmasi aʼzosi, shoirOʻrozali Reyimov, Oʻzbekiston Yozuvchilar Uyushmasi aʼzosi, Qoraqalpogʻiston Respublikasida xizmat koʻrsatgan jurnalist, “Taraqqiyot koʻzgusi” gazetasi maxsus muxbiri Robiya Yoʻldoshevalar yosh ijodkor qiz Muhabbat Orinbasarovani katta sheʼriyat sari qoʻyayotgan ilk qadami bilan muborakbod etishib, yosh qalamkashga ijodiy parvozlar tiladilar. Shuningdek, Muhabbat Orinbasarovaning onasi va ustozi Almagul Bekmuratova, maʼnaviy-maʼrifiy ishlar boʻyicha maktab direktorining oʻrinbosari, Gulchehra Allambekova, ona tili va adabiyoti fani oʻqituvchisi Farida Yendirbayeva, qoraqalpoq tili fani oʻqituvchisi Julduzxan Turgʻanbayevalar oʻzlarining samimiy tilaklarini bildirdilar.

Boʻlib oʻtgan tadbir oʻquvchi-yoshlarning iqtidorlarini rivojlantirish orzu-intilishlarini qoʻllab-quvvatlashga qaratilgani bilan muhim ahamiyat kasb etdi.

R.ANAROV, M.ShOMURODOV lavhasi.