Toʻlqin ovulida hokim va yoshlar uchrashuvi boʻlib oʻtdi

Yoshlar muammolarini tinglash, ularning taklif va tashabbuslarini qoʻllab-quvvatlash borasida bugungi kunda yurtimizda keng koʻlamli amaliy ishlar olib borilmoqda. Shu jumladan, barcha darajadagi rahbarlar yoshlar sohasini oʻz kun tartibidagi bosh vazifa sifatida belgilagan holda, mamlakatimizning barcha hududlarida, mahalla va qishloqlarda yoshlar bilan sayyor qabul va uchrashuvlar tashkil etishib, ularning oʻz maqsad va intilishlari yoʻlidagi toʻsiqlarni bartaraf etishga koʻmaklashmoqdalar.

28-aprel kuni Amudaryo tumani Toʻlqin ovul fuqarolar yigʻinida istiqomat qiluvchi yoshlar bilan boʻlib oʻtgan “Hokim va yoshlar uchrashuvi” ham shu kabi maqsad va vazifalarga qaratildi.

Amudaryo tumani hokimi Sultonboy Yoʻldashev, tuman hokimi oʻrinbosari Mahmud Shermetov, tuman Xalq qabulxonasi boʻlimi mudiri Erkin Rajabov hamda mutasaddi tashkilot vakillari ishtirokida tashkil etilgan mazkur uchrashuvda 29 nafar yoshlar oʻz muammo va takliflari bilan ishtirok etishdi.

Uchrashuv avvalida tuman hokimi Sultonboy Yoʻldashev yoshlarga murojaat qilib tumanimizdagi yoshlarning intilishlari va tashabbuslarini qoʻllab-quvvatlash isteʼdod va salohiyatini namoyon etishi uchun zamonaviy sharoitlar yaratishga alohida eʼtibor qaratilayotganligini takidlandi.

Darhaqiqat, soʻnggi yillarda oʻsib kelayotgan avlodga oid davlat siyosatining huquqiy asoslari mustahkamlanib, yoshlar masalalariga alohida eʼtibor qaratib kelinmoqda. “Besh muhim tashabbus”ning har bir yoʻnalishini tumanda tizimli amalga oshirish boʻyicha vazifalar belgilandi.

Uchrashuv ochiq muloqot tarzida, rasmiyatchilikdan holi, koʻtarinki ruhda boʻlib oʻtdi. Yoshlar oʻzlarining qiziqishlari, oldiga qoʻygan rejalari haqida, duch kelayotgan muammo va toʻsiqlar haqida tuman hokimiga toʻgʻridan toʻgʻri murojaat qilib yoʻl-yoʻriq va koʻrsatmalar olishdi. Joyida hal qilish imkoni boʻlgan ogʻzaki murojaatlar shu yerning oʻzida qanoatlantirildi.

Shundan soʻng Oʻzbekiston Respublikasi Prezidentining Amudaryo tumanidagi Xalq qabulxonasi mudiri Erkin Rajabov soʻzga chiqib, yoshlarga boʻsh vaqtini mazmunli oʻtkazishlari lozimligini, kasb-hunar egallab bilim olishi kerakligini taʼkidladi. Shuningdek, ilm-maʼrifatning inson hayotidagi ahamiyati haqidagi fikrlarga toʻxtalib, bularning barchasi isbot talab qilmaydigan haqiqat ekanligini eʼtirof etdi.

Shundan soʻng yoshlarning muammolari va takliflari atroflicha tinglandi. Murojaatlar mazmuni asosan imtiyoli kredit ajratilishi, haydovchilik guvohnomasiga oʻqishda subsidiya ajratilishi boʻyicha boʻldi.

Murojaatlar belgilangan muddatda va sifatli amalga oshirilishi yuzasidan soha masʼullariga topshiriqlar berilib, muddatlar belgilandi.

Yoshlarining hayotiy qiziqishlarini oʻrganish, ularni qiynab kelayotgan muammolarni aniqlash va bartaraf etish yuzasidan amaliy yordam berish maqsadida oʻtkazilgan hokim va yoshlar uchrashuvi barcha yoshlar dilida oʻzgacha taassurot qoldirdi.

Tuman hokimligining Axborot xizmati