1-sonli maktab oʻquvchilari Xotira va qadrlash kunini keng nishonlashdi

Shu kunlarda mamlakatimizning barcha hududlarida boʻlgani kabi Amudaryo tumanida ham oʻz Vatani ozod, hur va obod boʻlishi uchun kurashgan insonlar xotirasiga bagʻishlab turli maʼnaviy-maʼrifiy tadbirlar oʻtkazilib, milliy qahramonlarimizning xotirasiga hurmat-ehtirom koʻrsatilmoqda. Oʻtganlarni, ularning xayrli ishlarini yodga olmoq, jasoratlari haqida bugungi yoshlarni xabardor qilmoq xalqimizga xos ezgu fazilatlardandir.

Ayniqsa Ikkinchi jahon urushida halok boʻlgan yurtdoshlarimizni xotirasini adabiylashtirish, olovli janggohlarda bemisl azob-uqubatlarni sabr-bardosh bilan yengib, elimizga omon qaytib, yarimjon holida ham yurtimiz ravnaqi uchun turli sohalarda mehnat qilgan urush qatnashchilarini esga olish ham ulkan tarbiya maktabidir. Chunki bugungiday dorilomon kunlar oʻz-oʻzidan kelmagan. Bugungi baxtiyor zamonamiz ota-bobolarimiz zahmatli mehnatlari, mashaqqatlari mevasidir.

Shu yilning 6-may sanasida tumanimizdagi 1-sonli umumiy oʻrta taʼlim maktabining 3-A sinfida tashkillashtirilgan “Xotira – muqaddas, qadr – ulugʻ” deb nomlangan tadbirda ham shu haqda batafsil soʻz bordi.

Tadbirga mazkur sinf oʻquvchilaridan tashqari maktab direktorining maʼnaviy-maʼrifiy ishlar boʻyicha oʻrinbosari Sanobar Murodova, ilmiy ishlar boʻyicha oʻrinbosari Shohida Jabborberganova, ijodiy-madaniy ishlar boʻyicha targʻibotchisi Zulfiya Ollayorova va fan oʻqituvchilari, tumanimizda joylashgan 92-02 harbiy qism xizmatchisi Sherzod Otaboyev, oʻquvchilarning ota-onalari ishtirok etdilar. Boshlovchilar oʻzbek va rus tillarida ishtirokchilarga salom berib, 9-may – Xotira va qadrlash kuniga bagʻishlangan tadbir boshlanishini eʼlon qildilar. Koʻngillarda faxr, joʻshqinlik uygʻotib davlatimiz madhiyasi yangradi.

3-A sinf rahbari, tadbir tashkilotchisi Gulnora Yoʻldosheva, 92-02 harbiy qism xizmatchisi Sherzod Otaboyev, maktab ijodiy-madaniy ishlar boʻyicha targʻibotchisi Zulfiya Ollayorovalar yurtimizda keng nishonlanayotgan 9-may – Xotira va qadrlash kuni bayrami mohiyati haqida, Ikkinchi jahon urushi, front orti mehnat faxriylariga koʻrsatilayotgan gʻamxoʻrliklar haqida gapirdilar. Achinarlisi, janggohlardan omon qaytib urushdan keyingi ogʻir tiklanish yillarida ham mardona mehnat qilgan insonlar safi tobora kamayib borayapti, oʻsha mashʼum urush qahramonlarining koʻpchiligi dunyodan oʻtib ketishdi. 1-sonli maktab hududida ham urush qatnashchilari bor edi.

Tadbirda oʻquvchilar davraga ularning portretlarini olib chiqishib, har biri haqida maʼlumotlar aytishdi. Urushni laʼnatlovchi, tinchlik-osoyishtalikni ulugʻlovchi sheʼrlar, qoʻshiqlar ijro etishdi.

Tadbir barchada ulkan taassurotlar qoldirdi, koʻngillarida bugungiday hur va baxtiyor zamonamizga, tinchlik-osoyishtaligimizga hurmat hissini yuksaltirdi, doimo ogoh va hushyor yashashga chorladi.

Oygul RAJABOVA.