Xalq deputatlari Amudaryo tuman Kengashining 49-sessiyasi toʻgʻrisida axborot

2022-yil 14-may kuni Xalq deputatlari Amudaryo tuman Kengashining 49-sessiyasi boʻlib oʻtdi.

Sessiya ishida tuman Kengashi deputatlari, sektorlar rahbarlari, hokim oʻrinbosarlari, hokimlik masʼul xodimlari, huquq-tartibot organlari, boʻlimlar, jamoat tashkilotlari rahbarlari hamda ommaviy axborot vositalari vakillari ishtirok etdi.

Sessiyani tuman hokimi, Xalq deputatlari tuman Kengashi raisi Sultonboy Yoʻldashev ochdi va olib bordi. Sessiya kotibligiga 15-“Xolimbeg” saylov okrugidan deputat Abdiqadir Tulovmuratov saylandi.

Sessiyada dastlab, “Oʻzbekiston Respublikasi Prezidentining 2021-yil 10-fevraldagi Farmonining ijrosi toʻgʻrisida tuman Adliya boʻlimi boshligʻi oʻrinbosari Moʻminjon Matyusupovning axboroti tinglandi.

Moʻminjon Matyusupov kun tartibidagi masala yuzasidan tumanda amalga oshirilayotgan ishlar yuzasidan axborot berib, qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirish boʻyicha oʻz tavsiyalarini berib oʻtdi.

Sessiya ishida Oʻzbekiston Respublikasi qishloq xoʻjaligini rivojlantirish boʻyicha 2020-2030-yillarga moʻljallangan strategiyaning tumandagi ijrosi boʻyicha tuman hokimi oʻrinbosari Islom Matkarimovning hisoboti tinglandi.

Hisobotda keltirilishicha, oziq-ovqat xavfsizligini taʼminlash maqsadida tumanda fermer xoʻjaliklarining yerdan foydalanishidagi past hosilli paxta va gʻalla ekinlaridan qisqartirilgan  yer maydonlari hisobidan fuqarolarga 10 sotixdan 1 gektargacha boʻlgan oʻlchamda jami 2 ming 242 gektar ekin maydonlarini 2022-2025-yillarda bosqichma-bosqich zaxiraga qaytarish rejalashtirilgan.

Shundan joriy yilda jami 897 gektar yer maydonlari ishsiz axoliga ajratib beriladi. Shuningdek, keyingi yillarda kuzatilayotgan suv tanqisligining oldini olish boʻyicha tumanda tomchilatib sugʻorish tizimlarini joriy qilish ishlari samarali tarzda amalga oshirilmoqda. Jumladan, 1 ming 67 gektar maydonda tomchilatib sugʻorish texnologiyalari joriy qilindi.

Sessiya ishida Oʻzbekiston Respublikasining “Davlat hokimiyati va boshqaruvi organlari faoliyatining ochiqligi toʻgʻrisida”gi Qonunining tumandagi ijrosi haqida tuman hokimligining Axborot xizmati rahbari Fotima Eshimbetovaning axboroti tinglandi.

Axborotda tumandagi korxona va tashkilotlar faoliyatining ochiqligini taʼminlash maqsadida tuman hokimligining rasmiy veb-saytiga joylashtirilgan maʼlumotlar haqida batafsil toʻxtab oʻtildi. Shuningdek, axborotda tumanning ijtimoiy-siyosiy hayotida roʻy berayotgan voqea va hodisalar ijtimoiy tarmoqlarda sifatli hamda tezkor yoritilib kelayotganligi taʼkidlandi.

Shundan soʻng, tuman tibbiyot birlashmasi boshligʻi Fahriddin Abdullayevning Muhtaram Prezidentimiz raisligida shu yil 5-may kuni tibbiyot sohasi xodimlari bilan oʻtkazilgan videoselektor yigʻilishida belgilab berilgan vazifalarning tumandagi ijrosi boʻyicha xisoboti tinglandi.

Taʼkidlangandek, tez tibbiy yordam boʻlimi samaradorligini oshirish hamda shifokorlarga munosib mehnat sharoitlarini yaratish borasida tumanda koʻplab islohatlar amalga oshirilmoqda. Jumladan, yaqinda Toʻlqin oilaviy shifokorlik punkti faoliyati yoʻlga qoʻyildi. Shuningdek, tumanning 11 ta chekka mahallalariga konteynerlar oʻrnatilmoqda.

Sessiya davomida tumanda xotin-qizlarni har taraflama qoʻllab-quvvatlash, ularning jamiyatdagi mavqeini yanada mustahkamlash va muammolarining hal etilishi yuzasidan koʻrilayotgan choralar toʻgʻrisida tuman hokimining oʻrinbosari Oila va xotin-qizlar boʻlimi boshligʻi Goʻzal Soburovaning xisoboti tinglandi.

Hisobotda “Ayollar daftari”da turuvchi kasbga oʻqitilgan, bandligi taʼminlangan shuningdek, ijtimoiy-iqtisodiy, psixologik yordam berilgan ayollar toʻgʻrisida batafsil maʼlumot berildi.

Shuningdek, sessiya ishida tuman mahalliy byudjeti mablagʻlarining 2022-yil 1-chorak davomida sarflanishi haqidagi masala ham koʻrib chiqildi. Mazkur masala yuzasidan tuman Moliya boʻlimi mudiri Ulugʻbek Bekniyazov hisobot berdi. Hisobotda keltirilishicha, 1-chorak davomida byudjet xarajatlari rejasiga kiritilgan oʻzgarishlardan keyin tuman mahalliy byudjetidagi mablagʻlar 65 mlrd. 711,4 mln soʻmni tashkil qilib, 1-chorak davomida byudjet mablagʻlari xarajatlari hisobidan jami 62 mlrd 810,6 mln soʻmlik mablagʻlar sarflangan.

Sessiya ishida aholidan kelib tushayotgan murojaatlar asosida hokim yordamchilari faoliyatining samaradorligini oʻrganish boʻyicha tuman Xalq qabulxonasi boʻlimi mudiri Erkin Rajabovning axboroti tinglandi.

Taʼkidlanganidek, koʻrib chiqilgan murojaatlarning 81,8 foizi qanoatlantirilgan, shundan 24,7 foizii jobiy hal qilingan boʻlsa, 57,1 foiz murojaatlarga huquqiy maslahat va tushuntirishllar berilgan. Shuningdek hokim yordamchilari tomonidan aholi bandligini taʼminlash, kasbga oʻqitish, aholining tadbirkorlik qobiliyatlarini qoʻllab-quvvatlash borasida amalga oshirilayotgan ishlar haqida maʼlumotlar berib oʻtildi.

Sessiya kun tartibida Qoraqalpogʻiston Respublikasi byudjetining erkin qoldiq mablagʻlari hisobidan tuman Obodonlashtirish boshqarmasiga hududlarda “Yashil makon” va “Yashil bogʻ” loyihalarini amalga oshirish, mevali va manzarali daraxt koʻchatlarini ekish uchun mablagʻ ajratish boʻyicha tuman hokimining birinchi oʻrinbosari Rashid Salayevning taklifi koʻrib chiqildi.

Sessiya kun tartibida Amudaryo tumani Xalq taʼlimi boʻlimiga qarashli maktablarda boʻshab qolgan direktorlik lavozimiga oʻtkazilgan tanlov yakunlari boʻyicha nomzodga kelishim berish toʻgʻrisidagi masala ham koʻrib chiqildi.

37-sonli umumiy oʻrta taʼlim maktabi direktori lavozimiga Gʻayrat Jumanazarov nomzod sifatida koʻrsatilgan. Sessiya davomida nomzodning kelgusi 3-yilga moʻljallangan dasturi tinglanib, ochiq ovoz berish jarayoni orqali Xalq deputatlari Amudaryo tuman Kengashining nomzodga kelishim berish toʻgʻrisidagi qarori qabul qilindi.

Shuningdek, sessiya ishida Kengash vakolatiga kiruvchi boshqa masalalar ham muhoka qilinib, ular yuzasidan ham tegishli qarorlar qabul qilindi. Shuning bilan sessiya oʻz ishini yakunladi.

Tuman hokimligining Axborot xizmati