Odam savdosi, majburiy mehnat hamda korruptsiyaga qarshi kurashish masalalariga bagʻishlangan yigʻilish boʻlib oʻtdi

Bugungi kunga kelib asrimizning jiddiy muammosiga aylangan odam savdosiga qarshi kurash xalqaro, mintaqaviy, koʻp va ikki tomonlama munosabatlarni talab etmoqda. Hozirga qadar jinoyatchilikning ushbu turiga qarshi kurashish va uning oldini olish maqsadida Birlashgan Millatlar Tashkilotining bir qator xalqaro tavsiyaviy va majburiy xarakterga ega hujjatlari qabul qilingan boʻlib, ular doirasida ushbu xavfga qarshi dunyo miqyosida tegishli chora-tadbirlar koʻrilmoqda.

Amudaryo tumanida ham ushbu illatlarga qarshi kurashish hamda jamoatchilik nazoratini kuchaytirish boʻyicha koʻplab samarali ishlar amalga oshirilmoqda.

13-may kuni Amudaryo tumani hokimligining majlislar zalida odam savdosi,  majburiy mehnat va korruptsiyaga qarshi kurashishga bagʻishlangan yigʻilish boʻlib oʻtdi.

Yigʻilishda Amudaryo tumani hokimi, Odam savdosiga va majburiy mehnatga qarshi kurashish boʻyicha Amudaryo tumani komissiyasi raisi Sultonboy Yoʻldashev, Qoraqalpogʻiston Respublikasi Odam savdosiga va majburiy mehnatga qarshi kurashish boʻyicha hududiy komissiyasi masʼul kotibi, Qoraqalpogʻiston Respublikasi Joʻqorgʻi Kengasi deputati Zuhra Reimova, hududiy komissiya aʼzolari hamda tuman komissiya aʼzolari, hokimlik masʼul xodimlari ishtirok etishdi. Yigʻilishni tuman hokimi Sultonboy Yoʻldashev ochdi va olib bordi.

Yigʻilishda Odam savdosiga va majburiy mehnatga qarshi kurashish boʻyicha Amudaryo tumani komissiyasi tomonidan amalga oshirilayotgan ishlar hamda Korruptsiyaga qarshi kurashish hududiy Kengashining 2022-yil birinchi yarim yillik ish rejasiga asosan tumanda amalga oshirilgan ishlar muhokama qilindi.

Yigʻilishda taʼkidlanganidek, korruptsiyaga qarshi kurashish Oʻzbekistonda davlat siyosatining eng ustuvor yoʻnalishiga aylanib ulgurdi. Buni soʻnggi yilllarda sohaga oid qabul qilingan normativ-huquqiy hujjatlar, korruptsiyani oldini olishga qaratilgan maʼmuriy islohotlar misolida ham koʻrish mumkin.

Yigʻilish davomida hududiy komissiya raisi Zuhra Reimova kun tartibidagi masalalar yuzasidan oʻz fikrlarini bildirib oʻtdi. Shuningdek, yigʻilish ishtirokchilariga Korruptsiyaga qarshi kurashish hududiy Kengashining 2022-yil birinchi yarim yillik ish rejasiga asosan amalga oshirilgan ishlar toʻgʻrisida maʼlumotlar berdi.

Jumladan, Korruptsiyaga qarshi kurashish boʻyicha hududiy Kengashlar oʻz hududida korruptsiyaga qarshi kurashish boʻyicha faoliyatni amalga oshiruvchi, sohaga oid davlat dasturlarining amalga oshirilishini taʼminlovchi va unda ishtirok etuvchi organlar hamda tashkilotlar faoliyatini muvofiqlashtiruvchi tuzilma hisoblanishi, tuzilma vazifasiga korruptsiyaga qarshi kurashish sohasidagi davlat dasturlarining amalga oshirilishini taʼminlash, sohadagi tashkilotlar faoliyatini muvofiqlashtirish, aholining huquqiy ongini yuksaltirish, korruptsiya holati va tendentsiyalariga doir axborotni yigʻish va tahlil qilish, aksilkorruptsiya choralari boʻyicha monitoring hamda sohadagi qonun hujjatlarini takomillashtirish boʻyicha takliflar berish kabi bir qancha vazifalar yuklatilgani, hamda ushbu rejalarga muvofiq  tumanlarda qanday ishlar tashkil qilinganligi toʻgʻrisida batafsil maʼlumotlar berib oʻtdi.

Yigʻilish yakunida kun tartibida koʻrib chiqilgan masalalar yuzasidan tegishli qarorlar qabul qilindi.

Tuman hokimligining Axborot xizmati