Qipchoq ovul fuqarolar yigʻinida hokim va yoshlar uchrashuvi boʻlib oʻtdi

Bugun mamlakatimizda yoshlar uchun yaratilayotgan sharoit va imkoniyatlar koʻlami tobora kengaymoqda. Mustaqil fikrlaydigan, zamonaviy ilm-fan va kasb-hunarlarni puxta egallagan, oʻz yurti va xalqiga fidoyi, ajdodlarimiz boshlab bergan ishni davom ettirishga qodir boʻlgan, har tomonlama sogʻlom va barkamol avlodni voyaga yetkazish davlatimiz va jamiyatimizning bosh maqsadidir. Shu maqsadda katta umid, orzu-maqsadlar bilan oʻz kelajagi sari shahdam harakat qilayotgan shijoatli yoshlarimizni qoʻllab-quvvatlash borasida tizimli ishlar qilinmoqda.

Amudaryo tumanining Qipchoq ovulida yoshlar ishtirokida oʻtkazilgan “Hokim va yoshlar uchrashuvi” ham shu maqsadga qaratilgani bilan ahamiyatlidir.

Uchrashuvda tuman hokimi Sultonboy Yoʻldashev, tuman Xalq qabulxonasi mudiri Erkin Rajabov, hokim oʻrinbosari Mahmud Shermetov hamda mutasaddi tashkilot vakillari hamda 40 dan ortiq faol yoshlar ishtirok etishdi.

Uchrashuv davomida tuman hokimi Sultonboy Yoʻldashev yoshlarni har tomonlama qoʻllab-quvvatlash, yosh avlodning huquq va erkinliklarini himoya qilish, ularga har tomonlama yordam koʻrsatish bugungi islohotlarning bosh mavzusi ekanligini taʼkidladi.

Shuningdek, mamlakatimizda yoshlarning yuksak marralarni egallashlari uchun yaratilayotgan shart-sharoitlar, cheksiz imkoniyatlar haqida toʻxtalib, yoshlarni oʻqib bilim olishga, shijoat bilan olgʻa intilishga hamda Vatan xizmatiga yaraydigan munosib farzand boʻlishga daʼvat qildi.

Uchrashuvda tuman Xalq qabulxonasi boʻlimi mudiri Erkin Rajabov yoshlardan kelib tushayotgan murojaatlar oʻtgan yilgiga qaraganda sezilarli darajada kamayganligini, hokim yordamchilari va yoshlar yetakchilari tomonidan muammolar joyida hal qilinayotganligini taʼkidladi.

Yigʻilish davomida tuman hokimi oʻrinbosari yoshlarga ota-bobolarimizdan kelayotgan “Uztoz-shogird” anʼanasini koʻproq davom ettirish kerakligini, yoshlarning koʻproq xunar oʻrganishlari lozimligini va buning uchun barcha shart-sharoitlar yaratilganligini aytib oʻtdi.

Shundan soʻng, uchrashuvga tashrif buyurgan yoshlarning muammo va takliflari tinglandi. Yoshlardan Mohira Jabbarbergenova, Iroda Bobojanovalar imtiyozli kredit ajratilishida amaliy yordam soʻrab murojaat qilishdi. Murojaatlar yuzasidan tegishli masʼullarga topshiriqlar berilib, yoshlarning talablari qanoatlantirildi.

Yigʻilishda ishtirok etgan yoshlar tuman hokimiga oʻz takliflari bilan ham murojaat qilishdi. Hokim bilan uchrashuv barcha yoshlarda oʻzgacha taassurot qoldirdi.

Bugun Oʻzbekistonda yuksak maʼnaviyatli avlod tarbiyalanmoqda. Bugungi yoshlarning ong-u shuuri, dunyoqarashi ham oʻzgargan. Yoshlarimiz orasida yangicha oʻylaydigan, innovatsion gʻoyalarini amalga tatbiq eta oladigan kuchlar borligi bizni quvontiradi. Mana shunday shijoatli va bilimli yoshlar safining kengayishi uchun esa har birimiz hissa qoʻshishimiz lozim. Zero, ertangi kun, mamlakatimiz kelajagi yoshlar qoʻlida.

Tuman hokimligining Axborot xizmati