3-sektor rahbariyati tomonidan Qizilcholi mahallasida sayyor qabul oʻtkazildi

Inson manfaati – eng oliy qadriyatdir. Mamlakatimizda amalga oshirilayotgan islohotlar negizida ayni maqsad ustuvor oʻringa qoʻyilayotgani joylardagi oʻzgarishlarda yaqqol sezilmoqda. Binobarin, odamlarni rozi qilish, ularning huquq va manfaatlari himoyasi yoʻlidagi saʼy-harakatlar amaliy natijasini bermoqda.

Ayniqsa, aholi muammolarini yechishning mutlaqo yangi, samarali tizimini yaratish maqsadida davlat organlari va korxona-tashkilot rahbarlarining xalq orasiga kirishini taʼminlaydigan sayyor qabullar odamlar hayotida muhim oʻrin tutmoqda. Buni Amudaryo tumanidagi sektor rahbarlari tomonidan oʻtkazib kelinayotgan sayyor qabullar misolida ham koʻrishimiz mumkin.

19-may kuni tumanning Qizilcholi mahallasi hududidagi 9-sonli umumiy oʻrta taʼlim maktabi binosida 3-sektor masʼullarining navbatdagi sayyor qabuli boʻlib oʻtdi.

Unda tuman 3-sektor rahbari, tuman Ichki ishlar boʻlimi boshligʻi Ulugʻbek Xudoyberganov, tuman Xalq qabulxonasi boʻlimi mudiri Erkin Rajabov hamda tegishli korxona va tashkilot masʼullari ishtirok etdi.

Dastlab, tuman Ichki ishlar boʻlimi boshligʻi Ulugʻbek Xudoyberganov tomonidan mahalla institutining ustunlari hisoblangan mahalla raisi, hokim yordamchisi, xotin-qizlar faoli va yoshlar yetakchisining faoliyat yoʻnalishlari tahlil qilindi.

Shuningdek, mazkur lavozim egalariga mahallalarda “xonadonbay” va “fuqarobay” ishlash boʻyicha tavsiyalar berib oʻtildi.

Shundan soʻng, tuman Xalq qabulxonasi boʻlimi mudiri Erkin Rajabov mahallalarda yangidan joriy qilingan hokim yordamchisi, yoshlar yetakchisi muammolarni joyida hal qilayotganligini eʼtirof etib, buning natijasida tuman Xalq qabulxonasiga kelib tushayotgan murojaatlar sezilarli darajada kamayganligini aytib oʻtdi. Shu barobarida Xalq qabulxonasiga kelib tushayotgan birorta ham murojaat hech qachon eʼtibodan chetda qolmasligini, iloji boricha ijobiy yechim topishini taʼkidladi.

Shuningdek, tumanimizda istiqomat qilayotgan har bir fuqaro uchun, tuman Xalq qabulxonasi eshiklari doimo ochiqligi, har bir fuqaro oʻz muammolari bilan bemalol murojaat qilishlari mumkinligini aytib oʻtdi.

Shundan soʻng, aholining muammo va takliflaridan iborat murojaatlari tinglandi.

Uchrashuv davomida aholidan kelib tushgan har bir murojaat atroflicha oʻrganilib, tegishli sohaviy tashkilot rahbarlariga murojaatlarni oʻz vaqtida, adolatli va xolis koʻrib chiqish yuzasidan aniq topshiriqlar berildi hamda ijrosi sektor rahbari tomonidan nazoratga olindi.

Bunday uchrashuvlarning oʻtkazilishi aholining turmush farovonligini yanada yaxshilash, eng muhimi muammolarni ijobiy hal etish orqali xalqni rozi qilish uchun xizmat qilishi bilan alohida ahamiyat kasb etadi.

Zero, xalq bilan muloqot, ularning dardu tashvishi bilan yashash eng asosiy maqsad boʻlib, uning roʻyobi yurtimiz ravnaqiga, uning yanada gullab-yashnashiga, fuqarolarning tinch, osuda, farovon hayot kechirishlarini taʼminlashga xizmat qilib kelmoqda.

Tuman hokimligining Axborot xizmati.