TOʻLQIN OVULIDA YaNGI OILAVIY ShIFOKORLIK PUNKTI ISh BOShLADI

Toʻlqin ovuli hududida yangidan Toʻlqin oilaviy shifokorlik punkti foydalanishga topshirildi.

Shu yil 19-may kuni boʻlib oʻtgan marosimda tuman hokimining birinchi oʻrinbosari Rashid Salayev, Oʻzbekiston Respublikasi Sogʻliqni saqlash vazirligining bosh onkologi Mirzogʻolib Tillashayxov, Qoraqalpogʻiston Respublikasi Sogʻliqni saqlash vaziri Murod Qurbanov, tuman Tibbiyot birlashma boshligʻi Faxriddin Abdullayev, ovul fuqarolar yigʻini masʼullari, faollari va tibbiyot xodimlari ishtirok etdilar.

Yigʻilishni tuman hokimining birinchi oʻrinbosari Rashid Salayev ochib berdi va mamlakatimizda tibbiyot sohasida amalga oshirilayotgan islohotlar samarasi oʻlaroq bugun, hattoki, eng chekka qishloqlarda ham shahar markazlaridagidan qolishmaydigan zamonaviy shifo maskanlari qad rostlayotgani, ularning moddiy-texnik bazasini mustahkamlash, tibbiy xizmat sifatini davr talablari darajasiga koʻtarishga alohida eʼtibor berilayotganini taʼkidlab oʻtdi.

Marosimda soʻzga chiqqanlar, ovul aholisi hududdagi tibbiyot muassasasi foydalanishga yaroqsiz boʻlib qolgani tufayli, shifokor xizmatiga ehtiyoj sezilganida tuman markaziga borishga toʻgʻri kelayotgani, bu keksa va yosh bolalar sogʻligini nazorat qilish, davolanishlarida qiyinchilik, noqulayliklar tugʻdirayotgani, tibbiyot maskanining qayta tashkil etilgani bu aholiga ayni muddao boʻlayotgani aytib oʻtishdi.

Taʼkidlanganidek, 2017-yilda Toʻlqin qishloq vrachlik punkti optimizatsiya qilinib, faoliyati toʻxtatilgan edi. Ammo aholining murojaatlari, tumandan olis hudud ekanligi inobatga olinib, oilaviy shifokorlik punkti sifatida faoliyati qayta yoʻlga qoʻyildi. Hozirda bu yerda 3 nafar shifokor va 12 nafar oʻrta tibbiyot xodimi aholiga malakali xizmat koʻrsatish uchun jalb etilgan.

Marosimda Qoraqalpogʻiston Respublikasi Sogʻliqni saqlash Vaziri Murod Qurbanov ham soʻzga chiqib, Prezidentimizning Farmonlari va videoselektor yigʻilishlarida belgilangan vazifalarning ijrosi sifatida Amudaryo tumanidagi Toʻlqin ovulida hamma shart-sharoitlarga ega oilaviy shifokorlik punkti yangidan ish boshlagani, ular malakali shifokorlar va tibbiyot xodimlari bilan taʼminlangani, bu esa oʻz navbatida aholining birlamchi tibbiy xizmat qamrovini va sifatini taʼminlanishini taʼkidlab oʻtdi. Shundan soʻng, ramziy tasma kesildi va barcha yigʻilganlar tibbiyot maskanida yaratilgan shart-sharoitlar bilan tanishib chiqdilar.

Tibbiyot maskanida aholi salomatligini mustahkamlashga qaratilgan barcha imkoniyatlar yetarli. Ayollar, bolalar va keksalar uchun alohida xonalar, shuningdek, stomatologiya boʻlimi, laboratoriya, kunduzgi statsionar ham mavjud. Yangi ish boshlagan oilaviy shifokorlik punkti zarur tibbiy asbob-anjomlar, jihozlar bilan taʼminlangan. Qolaversa, shifokorlarning samarali faoliyat yuritishi, shuningdek, tashrif buyuruvchilar uchun barcha sharoitlar yaratilgan.

Toʻlqin ovuli faollari va aholisi endilikda tibbiy xizmatdan foydalanish uchun tuman markaziga borib yurmasliklari, kuz-qishning sovugʻi, bahor oylaridagi yogʻingarchilikda aholi sarson boʻlmasligi, oʻz qishlogʻida yaqin masofada joylashgan tibbiyot maskanida profilaktik emlash, kunduzgi statsionarlarda davolanish imkoniyatiga ega boʻlganligini aytib, Prezidentimizga, Sogʻliqni saqlash Vazirligiga oʻz minnatdorchiligini bildirdilar.

Ozoda Xudoyberganova.