Oʻzbekiston Respublikasi Suv xoʻjaligi vaziri Shavkat Xamrayev Amudaryo tumaniga tashrif buyurdi

Amudaryo tumanidagi “Polvon ovul” fermer xoʻjaligi dalasida koʻrgazmali seminar boʻlib oʻtdi. Oʻzbekiston va Qoraqalpogʻiston Respublikalari Suv xoʻjaligi vazirligi, tuman hokimligi masʼullari, tizim tashkilotlari, klaster va fermer xoʻjaligi rahbarlari ishtirok etgan tadbirda irrigatsiya boʻlimlari tarkibida suv xoʻjaligining maxsus xizmatini tashkil etish masalalari muhokama etildi.

Seminarda Oʻzbekiston Respublikasi Suv xoʻjaligi vaziri Shavkat Xamrayev Prezidentimizning joriy yil 1-martdagi “Quyi boʻgʻinda suv resurslarini boshqarishni takomillashtirish hamda suv isteʼmolchilari orasidagi munosabatlarni tartibga solish chora-tadbirlari toʻgʻrisida”gi qarori hamda Oʻzbekiston Respublikasi Vazirlar Mahkamasining 19-apreldagi 196-son tegishli qarorining mazmun-mohiyati, mazkur hujjatlarga muvofiq, hududlarda suv resurslarini boshqarish va suv isteʼmolchilariga koʻrsatiladigan xizmatlar hamda maxsus xizmat xodimlari ishlarni toʻgʻri va sifatli tashkil etishlari uchun toʻlanadigan mablagʻ, qoʻyingki, ushbu yangi tizimning barcha bosqichlari va oldingi tizimdan farqi va samarali jihatlari haqida batafsil tushuntirib berdi. Seminarda qayd etilganidek, cuv xoʻjaligining maxsus xizmatida ishlovchilar miroblardir. Agarda hududda 10 ta fermer boʻlsa, ularga 1 nafar mirob tayinlanadi. U suvni hisobini yuritish uchun har bir fermerga alohida jurnal qoʻyib, har kunlik olgan suvni fermer bilan imzolashgan holda hisobini yuritib boradi. Buning uchun fermer suv olish quloqlarini suv oʻlchash imkonini beruvchi jihozlar oʻrnatishi kerak va undagi reyke koʻrsatkichi boʻyicha ertalab va kechqurun 2 marotaba suvning miqdori yozib boriladi.

Ushbu jurnalda agarda, navbatlab sugʻorish tashkil etilib, nechadir kun ushbu fermerga suv berilmasa, ular ham qayd etilib boriladi. Oyni oxirida dalolatnoma tuziladi. Shu tariqa olingan suv hisobi yuritib boriladi va yakunda ushbu hujjatlar asosida soliq idorasiga hisobot kiritilib, suv isteʼmolchisi olgan suvi boʻyicha soliqqa tortiladi. Darhaqiqat, suv isteʼmolchisi umumiy meʼyor boʻyicha emas, amalda olgan suvigagina soliq toʻlashning mexanizmi yaratilishi fermerlar uchun ham manfaatli, boʻladi.

Tadbirda Amudaryo tumanidagi maxsus xizmatga ishga qabul qilingan va suv isteʼmolchilari bilan shartnomalar tuzishda faollik koʻrsatgan maxsus xizmat sektor rahbari Ruslan Bekmuratovga motoroller kaliti topshirildi. Shuningdek, hududlardagi faol suvchilarga 10 ta velosiped berildi.

Vazir Shavkat Xamrayev velosipedlarni olayotgan suvchilar bilan suhbatlashib, ularning necha kilometr kanal va ariqlar boʻylab harakatlanishi bilan qiziqdi. Masʼullarga suvchi-miroblarning ishini toʻgʻri tashkil etish va sifatini oshirish maqsadida bu kabi trasportlarni koʻproq ajratish lozimligini taʼkidladi.

Tadbirda Qoraqalpogʻiston Respublikasi Suv xoʻjaligi vaziri Adilbek Reimbayev, tuman hokimining oʻrinbosari Rashid Salayev va boshqa masʼullar soʻzga chiqib, suv xoʻjaligida maxsus xizmat ishlarini tashkil etish boʻyicha belgilab berilgan vazifalarni hududlardagi masʼullar bilan birgalikda hal etish choralarini koʻrishlarini hamda bu borada tuman irrigatsiya boʻlimi rahbarlari oʻz ishlariga boʻlgan masʼuliyatini yanada oshirishlari lozimligi taʼkidlashdi.

Tadbirda fermer xoʻjaligi rahbarlari va suvchilar yangi tashkil qilinayotgan maxsus xizmat boʻyicha oʻzlarini qiziqtirgan savollariga batafsil javoblar oldi.

Tuman hokimligining Axborot xizmati.