BIR YILLIK MAJBURIY TAʼLIM MAKTAB YoShIDAGI BOLANING TAʼLIMGA TEZ MOSLAShShIShNI TAʼMINLAYDI

Yurtimizda bolalarni boshlangʻich taʼlimga majburiy bepul bir yillik tayyorlash boʻyicha dastlabki loyihaning ijobiy tajribasini boshqa hududlarda ham tatbiq etish, maktabgacha taʼlim tizimini yanada takomillashtirish, sogʻlom, faol, barkamol, ijtimoiy moslashtirilgan bolalarni tarbiyalash, kelgusida muvaffaqiyatli oʻquv faoliyati uchun shart-sharoitlarni shakllantirish va ularni boshlangʻich taʼlimga sifatli tayyorlash borasida tegishli chora-tadbirlar, samarali ishlar amalga oshirilmoqda.
Oʻzbekiston Respublikasi Prezidentining Oliy Majlisga yoʻllagan Murojaatnomasi ijrosini taʼminlash maqsadida Oʻzbekiston Respublikasi Vazirlar Mahkamasining 2020-yil 9-martdagi “Bolalarni boshlangʻich taʼlimga majburiy bir yillik tayyorlash tizimini yanada rivojlantirish chora-tadbirlari toʻgʻrisida” 132-sonli qarori qabul qilingan edi. Vazirlar Mahkamasining shu yil 9-fevraldagi “Vazirlar Mahkamasining “Bolalarni boshlangʻich taʼlimga majburiy bir yillik tayyorlash tizimini yanada rivojlantirish chora-tadbirlari toʻgʻrisida” 2020-yil 9-martdagi 132-son qaroriga oʻzgartirishlar va qoʻshimcha kiritish toʻgʻrisida”gi 66-son qarori ham qabul qilinib, oʻzgartirish va qoʻshimchalar kiritildi.
Unga  koʻra, tayyorlov guruhlarida oʻquv yili joriy yilning 2-sentyabridan keyingi yilning 31-mayigacha boʻlgan davrni, yozgi sogʻlomlashtirish davri joriy yilning 1-iyunidan 31-avgustigacha boʻlgan davrni oʻz ichiga oladi. Shuningdek, maktabgacha taʼlim tashkilotlariga qamrab olinmagan bolalarning mavjud kontingenti tegishli organlar tomonidan may va iyun oylarida oʻrganiladi. Ilgari bu iyun va iyul oylarida amalga oshirilardi. Endi tayyorlov guruhlariga kelgusi yilda 7 yoshga toʻladigan bolalar qabul qilinadi. Oldingi tahririda bu yosh tegishli yilning 1-sentyabrida 5 yosh-u 6 oyni tashkil qilardi.
Tumanimizda ham maktabgacha taʼlim bilan qamrab olinmagan bolalar uchun tayyorlov guruhlari shakllantirilib, tayyorlov guruhlarining oʻquv-tarbiya jarayoniga zamonaviy innovatsion pedagogik texnologiyalar, taʼlim va tarbiyaning samarali shakllari hamda usullari joriy etilmoqda. Tayyorlov guruhlari milliy madaniy-tarixiy qadriyatlarni aks ettiradigan va bolalikdan kitob oʻqishga qiziqishni oshiradigan oʻquv-metodik, didaktik materiallar, rivojlantiruvchi oʻyinlar hamda oʻyinchoqlar, badiiy adabiyotlar bilan taʼminlanmoqda. Ilgʻor xorijiy tajribani hisobga olgan holda, maktabgacha taʼlim bilan qamrab olinmagan bolalarning davlat talablariga muvofiq har tomonlama aqliy, axloqiy, estetik va jismoniy kamol topishi uchun shart-sharoitlar yaratish, tayyorlov guruhlarini tashkil etishda maktabgacha taʼlimning muqobil shakllarini keng joriy etish maqsadida tumanda 2020-21-yilda 10 ta guruhga 300 nafar bolalar qamrab olingan edi. 2021-2022 oʻquv i ham qamrov kengaytirilib, 5 ta guruhda 145 bola shu kungacha 445 nafar bolalar tayyorlov guruhlariga jalb etildi. Yangi 2022-2023 oʻquv yili uchun ham tayyorlov guruhlarini tashkil etish va ularga maktab yoshidagi bolalarni qamrab olish borasida tegishli chora-tadbirlar koʻrilmoqda.
Bir yillik majburiy tayyorlov tizimi maktabgacha taʼlim tashkilotlariga qamrab olinmagan bolalarni maktabga tayyorlash maqsadida joriy qilingan. Bolalarning bepul ravishda kuniga 3-4 soat atrofida taʼlim-tarbiya jarayoniga jalb etilishi bogʻchaga bormaydigan bolalar va ularning ota-onalari uchun yaxshi imkoniyat. Zero tayyorlov guruhlaridagi mashgʻulotlarda qatnashgan bola maktabga chiqqanda koʻp jihatdan tasavvuri kengaygani hisobiga taʼlim jarayoniga tez moslashadi.

Soliya Bobojonova, tuman MTB davlat va nodavlat maktabgacha taʼlim tashkilotlari

faoliyatini hamda oʻqitishning muqobil shakllarini tashkil etish shoʻʼbasi mudiri.