Umumtaʼlim maktabni oltin hamda kumush medallar bilan tugatgan oʻquvchilarni taqdirlash marosimi boʻlib oʻtdi
Bugungi kunda mamlakatimizning barcha joylarida boʻlgani singari Amudaryo tumanidagi umumiy oʻrta taʼlim maktablarida ham bitiruvchi sinf oʻquvchilari yakuniy imtihonlarni tamomlab, katta hayotga yoʻllanma olmoqdalar. Mustaqil hayotga qadam qoʻyayotgan 2 ming 582 nafar amudaryolik yoshlar mehribon ustozlari, qadrdon maktabi bilan xayrlashib, oliy taʼlim dargohlariga hujjat topshirishmoqda.
18-iyun kuni tuman hokimligi binosida 2021-2022 oʻquv yilida umumiy oʻrta taʼlim maktablarini oltin va kumush medallar bilan tamomlagan, hamda fanlar olimpiadasi va turli tanlovlarda muvafaqqiyatga erishgan oʻquvchilarni taqdirlash marosimi boʻlib oʻtdi.
Unda tuman hokimi Sultonboy Yoʻldashev, sektorlar rahbarlari, tuman hokimi oʻrinbosari Mahmud Shermetov, tuman Xalq taʼlimi boʻlimi masʼullari, maktab direktorlari hamda ota-onalar ishtirok etishdi.
Maʼlumot uchun, joriy oʻquv yilida Amudaryo tumani boʻyicha 15 nafar oʻquvchi maktabni oltin va 2 nafar oʻquvchi kumush medal bilan bitirdilar. Bundan tashqari, 5 nafar oʻquvchi ingliz tili boʻyicha xalqaro V2 va S1 sertifikatini qoʻlga kiritdi. Ular endilikda oliy taʼlim muassasalariga kirish test sinovlarida ingliz tili boʻyicha maksimal ballga ega boʻladilar va chet tili fanidan test sinovidan ozod etiladi.
Qolaversa, 7 nafar oʻquvchi asosiy fanlar olimpiadasining Qoraqalpogʻiston Respublikasi bosqichida muvaffaqiyatli qatnashib, gʻolib va sovrindolar safidan joy olishdi. Shundan 4 nafar oʻquvchi olimpiadaning Oʻzbekiston Respublikasi bosqichida munosib ishtirok etib, 2 nafari − Iroda Eshboyeva hamda Lobar Yoʻldashevalar Toshkent amaliy fanlar universitetiga imtihonlarsiz kirish boʻyicha sertifikatni qoʻlga kiritdilar.
Tadbir davomida tuman hokimi Sultonboy Yoʻldashev barcha bitiruvchilarni yetuklik shahodatnomasini olganliklari, voyaga yetib, mustaqil hayot sari qadam tashlash arafasida turgani bilan tabriklab, bitiruvchilarning Oliy taʼlim muassasalariga oʻqishga kirishiga yoki boshqada sohalarda yetuk mutaxassislar boʻlib, kelgusida yurtimizdagi zamonaviy klasterlar, fermer xoʻjaliklari, ishlab chiqarish korxonalari, davlat yoki xususiy sektorlarda ish boshlab, Vatanimiz ravnaqi, xalqimiz farovonligini oshirishga munosib hissa qoʻshishlariga tilakdoshlik bildirdi.
Shuningdek, tuman hokimi bilimdon oʻquvchilarning maktab direktorlariga, ularga taʼlim va tarbiya bergan fidoiy oʻqituvchilar hamda ota-onalarga minnatdorchilik bildirib, barkamol avlodni tarbiyalab, voyaga yetkazishlarida kuch-gʻayrat tiladi.
Shundan soʻng, oʻquvchilarga oltin hamda kumush medallar, zamonaviy rusumdagi planshet hamda telefonlar, badiiy kitoblar jamlanmasi tantanali tarzda topshirildi.
Oʻylaymizki, yoshlarimiz Prezidentimiz ishonch bildirganlaridek, mamlakatimizda yaratilgan imkoniyatlar asosida yetuk mutaxassislar boʻlib, Vatan ravnaqi uchun munosib hissa qoʻshadilar.
Tuman hokimligining Axborot xizmati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
