Tuman hokimligida Konstitutsiyaga oʻzgartish va qoʻshimchalar kiritish toʻgʻrisidagi Konstitutsiyaviy qonun loyihasi muhokama qilindi

Maʼlumki, ayni kunlarda mamlakatimizda Konstitutsiyaviy islohotlar jarayoni qizgʻin pallaga kirdi.

Oʻzbekiston Respublikasi Oliy Majlisi palatalari Kengashlarining Qoʻshma qarori bilan tuzilgan Konstitutsiyaviy komissiyaga oʻtgan bir oy davomida kelib tushgan 60 mingdan ortiq takliflar asosida Oʻzbekiston Respublikasi Oliy Majlisi Qonunchilik palatasining bir guruh deputatlari tomonidan, shuningdek Qoraqalpogʻiston Respublikasi Joʻqorgʻi Kengesi tomonidan tayyorlangan Oʻzbekiston Respublikasining Konstitutsiyasiga oʻzgartish va qoʻshimchalar kiritishga doir konstitutsiyaviy qonunlar loyihalari joriy yil 24-iyun kuni Qonunchilik palatasi tomonidan koʻrib chiqildi. Qonun loyihasi 25-iyun kuni umumxalq muhokamasiga qoʻyildi.

Mazkur Konstitutsiyaviy qonun loyihasi 25-iyun kuni Amudaryo tumani hokimligida oʻtkazilgan yigʻilishda muhokama qilindi. Yigʻilishni tuman hokimi Sultonboy Yoʻldoshev ochdi va olib bordi. Unda tuman hokimi oʻrinbosarlari, hokimlik masʼul xodimlari va mutaxassislari ishtirok etdi.

Tuman hokimi Sultonboy Yoʻldoshev “Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Konstitutsiyaviy qonuni loyihasi haqida batafsil maʼlumot berdi.

Taʼkidlanganidek, Konstitutsiyaviy qonun loyihasi Bosh qomusimizning 64 ta moddasiga 200 dan ortiq oʻzgartirishlar kiritishni nazarda tutadi. Bundan tashqari, 6 ta yangi modda bilan 16 ta yangi norma kiritilmoqda.

Ularning aksariyati mazmun-mohiyatiga koʻra, “inson – jamiyat – davlat”, “Yangi Oʻzbekiston – ijtimoiy davlat” degan tamoyillarni konstitutsiyaviy qoida sifatida muhrlashga, xalqparvar davlat barpo etishga, inson huquqlarining himoyasi va ijtimoiy muhofazasini kuchaytirishga, yoshlarning huquq va manfaatlarini toʻla taʼminlashga qaratilgan.

Yigʻilishda maʼnaviy-maʼrifiy ishlar samaradorligini oshirish, davlat tili qoidalariga rioya etilishini taʼminlash masalalari boʻyicha tuman hokimining maslahatchisi Ashirboy Qoʻshayev ishtirokchilarni Konstitutsiyaviy Qonun loyihasi boʻyicha taqdimot bilan tanishtirdi.

Qayd etilganidek, Oʻzbekiston Respublikasining Konstitutsiyasiga kiritilishi taklif qilinayotgan oʻzgartishlar sifatli va malakali tibbiy xizmatni tashkil etish, taʼlimni rivojlantirish, xususiy mulk daxlsizligini kafolatlash, fuqarolik jamiyati institutlarining maqomini va ekologik muhofaza kabi masalalarni konstitutsiyaviy darajada mustahkamlab qoʻyish bilan bogʻliq.

Shu bilan birga, qonun loyihasi davlat hokimiyati va boshqaruvi tizimini takomillashtirish, jumladan, parlament vakolatlarini kengaytirish, Prezidentlik institutini takomillashtirish, joylardagi vakillik va ijro hokimiyati organlarini ajratish, Qoraqalpogʻiston Respublikasini ijtimoiy-iqtisodiy, siyosiy jihatdan rivojlantirishning konstitutsiyaviy asoslarini yanada mustahkamlash masalalarini ham oʻz ichiga olgan.

Taʼkidlash lozimki, “Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi Konstitutsiyaviy qonun loyihasi umumxalq muhokamasi uchun “Xalq soʻzi” va “Narodnoye slovo” gazetalarida hamda Meningkonstitutsiyam.uz elektron platformasida eʼlon qilindi. Umumxalq muhokamasi 2022-yilning 5-iyuligacha davom etadi.

Shu oʻrinda yurtdoshlarimizdan qonun loyihasi yuzasidan fikr-mulohazalar hamda takliflar yoʻllab, faollik koʻrsatishlarini soʻrab qolamiz.

Sababi, oʻtkazilgan umumxalq muhokamasi natijasi umumlashtirilib, qonun loyihasi yanada takomillashtiriladi. Uning natijalariga koʻra “Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Konstitutsiyaviy qonuni loyihasi Oʻzbekiston Respublikasi referendumiga qoʻyiladi.

Fursatdan foydalanib, yurtimizda yashovchi barcha nuroniylar va yoshlarimizni, turli millat vakillari boʻlmish vatandoshlarimizni, oʻqituvchilar, tibbiyot xodimlari, tadbirkorlar, fuqarolik jamiyati institutlari vakillarini, umuman, jonajon Oʻzbekistonimiz taqdiriga befarq boʻlmagan barcha yurtdoshlarimizni umumxalq muhokamasida faol ishtirok etishga chorlab qolamiz.

Yurt kelajagi va Vatanimiz taqdiri Siz va bizning mazkur jarayondagi faol ishtirokimizga bogʻliq ekanini, ushbu oʻzgartish va qoʻshimchalar kelgusi taraqqiyotimiz uchun muhim ahamiyat kasb etishini unutmang!

Tuman hokimligining axborot xizmati