Tuman irrigatsiya boʻlimi jami 39 ming 463 gektar sugʻoriladigan yer maydonlarini suv bilan taʼminlash borasida tizimli ishlarni amalga oshirmoqda

Dalalarni, ekin maydonlarini sugʻorish uchun oqar suv yetkazib berishda, fermer xoʻjaliklarini suv bilan taʼminlashda tuman Irrigatsiya boʻlimining xizmatlari katta.

Oʻzbekison Respublikasi Prezidentining 2018-yil 17-apreldagi “Oʻzbekiston Respublikasi suv xoʻjaligi vazirligi faoliyatini tashkil etish chora-tadbirlari toʻgʻrisida”gi qaroriga asosan Qoraqalpogʻiston Respublikasi Suv xoʻjaligi vazirligining 2018-yil 11-iyuldagi 23-sonli buyrugʻi bilan Mangʻit-Nazarxan irrigatsiya tizimi boshqarmasi negizida Amudaryo tumani irrigatsiya boʻlimi qayta tashkil etildi.

Bugungi kunda tumandagi suv isteʼmolchilari Gurlan, Qilichboy, Qipchoq-Bosuv tarmoqlari va daryoda joylashgan nasos stantsiyalari orqali suv bilan taʼminlanmoqda. Shuningdek, irrigatsiya boʻlimlari tarkibida suv xoʻjaligining maxsus xizmati tashkil etilgani Tuman irrigatsiya boʻlimi uchun koʻplab qulaylik va yengilliklar yaratdi.

Maʼlumot oʻrnida aytish kerakki, suv xoʻjaligining maxsus xizmatida ishlovchilar miroblardir. Agarda hududda 10 ta fermer boʻlsa, ularga 1 nafar mirob tayinlanadi. U suvning hisobini yuritish uchun har bir fermerga alohida jurnal qoʻyib, fermerlar bilan imzolashgan holda har kunlik olgan suvning hisobini yuritib boradi.

Buning uchun fermer suv olish quloqlarini suv oʻlchash imkonini beruvchi jihozlar bilan taʼminlashi kerak va undagi koʻrsatkich boʻyicha ertalab va kechqurun 2 marotaba suvning miqdori yozib boriladi. Ushbu jurnalda agarda, navbatlab sugʻorish tashkil etilib, nechadir kun ushbu fermerga suv berilmasa, ular ham qayd etilib boriladi. Oyning oxirida esa dalolatnoma tuziladi.

Shu tariqa olingan suv hisobi yuritib boriladi va yakunda ushbu hujjatlar asosida soliq idorasiga hisobot kiritilib, suv isteʼmolchisi olgan suvi boʻyicha soliqqa tortiladi.

Darhaqiqat, suv isteʼmolchisi umumiy meʼyor boʻyicha emas, amalda olgan suvigagina soliq toʻlashi mexanizmi yaratilishi fermerlar uchun ham manfaatli, boʻldi.

Suv bilan taʼminlash, suvdan foydalanishni nazorat qilish Amudaryoning chap qirgʻogʻida Shixjamol, Qilichboy, Tosh yop, Mangʻit, Qipchoq boʻlimlari, Amudaryoning oʻng qirgʻogʻida Nazarxon boʻlimlari tomonidan amalga oshiriladi.

 Boʻlim hisobida 296,6 km uzunlikdagi xoʻjaliklararo kanallar, 122 ta gidrotexnik inshoot, 135 ta gidropost, 153 ta suv chiqarish nuqtalari, 5 ta ekskavator, 3 ta buldozer, 6 ta yer qazish kemasi mavjud.

Bugungi kunda boʻlimda 135 nafar ishchi xodimlar kechani kecha, kunduzni kunduz demay mehnat qilib, tumanning olis hududlarini ham oqar suv bilan muntazam taʼminlashga oʻz hissalarini qoʻshishmoqda.

Aytish kerakki, Amudaryo tumanida ichki xoʻjalik kanallari uzunligi 1 ming 342 km boʻlib, ularda 681 ta gidrotexnik inshoot, 510 ta gidropost, fermerlarning 1 ming 95 ta bosh suv olish quloqlari mavjud.

Amudaryo tumanining jami 39 ming 463 gektar sugʻoriladigan yer maydonlarini suv bilan taʼminlash borasida tizimli ishlarni tashkil qilib kelayotgan Amudaryo tumani irrigatsiya boʻlimi xodimlari faoliyatiga rivoj tilaymiz.

Tuman hokimligining Axborot xizmati