Amudaryo tumanidagi taʼlim maskanlarida yangi oʻquv yiliga tayyorgarlik qizgʻin davom etmoqda

Amudaryo tumanidagi Xalq taʼlimi boʻlimiga qarashli umumtaʼlim maktablarida taʼlim-tarbiya oluvchi 38 mingga yaqin oʻquvchilar yozgi taʼtil tugashi bilanoq, jonajon maktabi, ustozlari bagʻriga shoshadilar. Bugungi kunda tumandagi barcha umumtaʼlim muassasalarida yangi 2022-2023 oʻquv yiliga tayyorgarlik koʻrish jarayonlari qizgʻin surʼatlarda olib borilmoqda.

Bu boradagi ishlarni yanada jadallashtirish va yangi oʻquv yilini munosib tayyorgarlik bilan kutib olish maqsadida 1-avgust kuni Oq oltin ovuli hududida joylashgan 50- sonli hamda 7-sonli umumtaʼlim maktablarida koʻrgazmali seminar boʻlib oʻtdi.

Yangi oʻquv yiliga tayyorgarlik koʻrish, maktablarning texnik baʼzasini yaxshilash, pedagog kadrlarning salohiyatini oshirish masalalariga bagʻishlangan koʻrgazmali seminarda tuman Xalq taʼlimi boʻlimi mudiri Akmal Ismailov, boʻlim masʼullari hamda tumandagi 85 ta maktab direktorlari ishtirok etishdi.

Seminarda maktablarga kirish yoʻlaklarini tartibga keltirish, maktab binosi atroflarini begona oʻt-oʻlanlardan tozalab obodonlashtirish, daraxtlarni oqlash, daraxt va gullarga shakl berish, sport maydonchalarini tartibga keltirish, maktablarning ichki tozaligi taʼminlash, futbol, voleybol, basketbol maydonchalaridagi ustunlarni boʻyash, qozon va qozonxonalarni tartibga keltirish, taʼmirtalab parta, doska, shkaf umuman sinfxonalarni taʼmirlash, stullarni oʻquvchining yoshiga mos ravishda joylashtirish, koridor, sinf va laboratoriya xonalariga shiorlar, bannerlarni did va tartib bilan osish kabi masalalarga alohida eʼtibor qaratildi.

Yangi oʻquv yiliga tayyorgarlik ishlari 50- va 7- sonli umumtaʼlim maktablari bilan bir qatorda tumanning barcha olis hududlarida joylashgan umutaʼlim maktablarda ham jadal surʼatlarda olib borilmoqda.

Jumladan, Nazarxan ovuli hududidagi 3-sonli maktab rekonstruktsiya qilinib, joriy taʼmirlash ishlari yakunlanish arafasida. Shuningdek, 69-, 26-, 61, 51-, 46-, 78-, 18- sonli maktablarda ham qurilish-taʼmirlash ishlari jadal olib borilmoqda.

Undan tashqari, Kuyuk koʻpir ovuli hududida joylashgan 14-sonli umumtaʼlim maktabiga 180-oʻrinli, Tosh yop ovuli hududida joylashgan 76-sonli maktabga 360-oʻrinli, Oybek mahallasi hududida joylashgan 55-sonli maktabga 330-oʻrinli qoʻshimcha binolar qoʻrilmoqda. Quruvchilar joriy qurilish-taʼmirlash ishlarini yangi oʻquv yili boshlanish arafasida tugatib, oʻquvchilar uchun yangi sinfxonalarni tantanali razda topshirishni niyat qilishgan.

Shu oʻrinda aytish kerakki, oʻquvchilarning yaxshi bilim va tarbiya olishi maktabdagi sogʻlom muhit va yaratilgan shart-sharoitlarga ham bevosita bogʻliq.

Keng va yorugʻ sinfxonalarda malakali ustozlar tomonidan berilgan bilimni qunt bilan oʻzlashtirgan oʻquvchilar ishonamizki, Vatan taraqqiyotiga munosib hissa qoʻshadigan barkamol avlod boʻlib voyaga yetishadi.

Tuman hokimligining Axborot xizmati.