Xalq deputatlari Amudaryo tuman Kengashining 51-sessiyasi toʻgʻrisida axborot

2022-yil 6-avgust kuni Xalq deputatlari Amudaryo tuman Kengashining navbatdagi 51-sessiyasi boʻlib oʻtdi. Sessiya ishida tuman Kengashi deputatlari, sektorlar rahbarlari, hokim oʻrinbosarlari, hokimlik masʼul xodimlari, huquq-tartibot organlari hamda ommaviy axborot vositalari vakillari ishtirok etdi.

Sessiya kun tartibidagi dastlabki masala − Oʻzbekiston Respublikasi Prezidentining “Hududlarni kompleks ijtimoiy-iqtisodiy rivojlantirish boʻyicha sektorlar faoliyatini yanada takomillashtirishga doir qoʻshimcha chora-tadbirlar toʻgʻrisida”gi qarorining ijrosi boʻyicha tumandagi sektorlar rahbarlarining hisoboti tinglandi.

2-sektor rahbari, tuman prokurori Aziz Roʻzmetovning hisobotida keltirilishicha, 2-sektor hududida 17 ta ovul va mahalla fuqarolar yigʻini mavjud boʻlib, joriy yilning 6 oyi davomida sektor hududida belgilangan rejaga asosan sektor rahbari hamda halq qabulxonasi bilan birgalikda 25 ta sayyor qabul, 23 ta yoshlar bilan uchrashuv oʻtkazilgan. Shuningdek, 1 ming 252 nafar mehnatga layoqatli ishsizlar borligi aniqlanib, ularni tadbirkorlikka jalb qilish, yer ajratish, hunarmandchilik faoliyatini yoʻlga qoʻyish, issiqxona tashkil qilish, qoramolchilik va asalarichilikka jalb qilish orqali bandligi taʼminlangan. Sektor hududida yashovchi ehtiyojmand aholiga 984 mln. soʻmlik dori-darmon, oziq-ovqat va boshqa amaliy yordamlar berilgan.

Shuningdek, “Ayollar daftari”ga kiritilgan, 1 nafar ayolga yangi uy qurib berilayotgan boʻlsa, 1 nafar ayolning uyi taʼmirlab berilmoqda.

3-sektor rahbari, tuman Ichki ishlar boʻlimi boshligʻi Muxammetali Xojamuratovning hisobotida qayd etilganilek, sektor hududida 2022-yilning dastlabki 6 oyi davomida “Saxovat va koʻmak” jamgʻarmasi doirasida “Temir daftar”dagi oilalarga jami 635,7 mln.soʻmlik turli xildagi yordam koʻrsatilgan.

Qolaversa, mahallalarning infratuzilmasini yaxshilash borasida ham koʻplab ishlar amalga oshirilmoqda. Jumladan, “Tashabbusli byudjet” loyihasi doirasida Tor yop mahallasining Dehqonbirlik koʻchasi hamda Tor yop-Qilichboy avtomobil yoʻli taʼmirlanmoqda. “Ayollar daftari”ga kiritilgan ayollarning 230 nafari ish bilan taʼminlandi. 88 nafar ayol-qizlarga tadbirkorlik faoliyatini yoʻlga qoʻyishlari uchun yordamlar va 155 nafar ayol-qizlarga tibbiy muolajalar koʻrsatildi. “Temir daftar”dagi oilalarga jami 635,7 mln.soʻmlik turli xildagi yordam koʻrsatildi.

4-sektor vakili, Amudaryo tumani Davlat soliq inspektsiyasi boʻlim boshligʻi Azim Yusupovning hisobotida qayd etilganidek, oʻtgan 6 oy davomida sektor hududidagi Beruniy va Boʻston mahallalarining har birida 25 nafar bolaga moʻljallangan oilaviy nodavlat maktabgacha taʼlim tashkilotlari yangidan barpo etildi.

 Undan tashqari, sektor hududidagi ovul va mahallalarda istiqomat qiluvchi 49 nafar fuqarolar reablitatsiya-texnik vositalari va kreslo-aravachalar bilan taʼminlandi.

Sessiya ishida sektorlar va tashkilotlar rahbarlarining aholi murojaatlari va muammolari bilan ishlash holati yuzasidan tuman Xalq qabulxonasi boʻlimi mudiri Erkin Rajabovning axboroti tinglandi.

Qabulxonaga 2022-yilning 30-iyun sanasiga qadar jismoniy va yuridik shaxslar tomonidan jami 905 ta masala boʻyicha murojaatlar kelib tushgan. Ushbu mkrojaatlarning 31,4 foizi yaʼni, 284 tasi ijobiy hal etilgan boʻlsa, 603 ta murojaatga huquqiy tushuntirishlar berilgan.

Shundan keyin sessiyada tuman Ichki ishlar boʻlimi boshligʻi, podpolkovnik Muxammetali Xojamuratovning “Amudaryo tumanida 2022-yilning 2-choragida huquqbuzarliklarning oldini olish va ularning profilaktikasi holati toʻgʻrisida”gi masala yuzasidan hisoboti tinglandi.

Hisobotda tuman xududida profilaktika inspektorlari tomonidan joriy yilning 6 oyi yakuniga koʻra jami 471 ta shaxslar profilaktik hisobga olingan boʻlib, ularga biriktirilgan murabbiylar bilan hamkorlikda muntazam ravishda profilaktik ishlar amalga oshirilib kelinayotgani aytib oʻtildi.

Sessiya ishida Oʻzbekiston Respublikasi bosh prokuraturasi huzuridagi Majburiy ijro byurosi Qoraqalpogʻiston Respublikasi Amudaryo tumani boʻlimi boshligʻi, adliya kichik maslahatchisi Mirtemir Davletmuratovning joriy yilning 6 oyi davomida Byuro tomonidan amalga oshirilgan ishlar boʻyicha bildirishnomasi tinglandi.

Qayd qilinganidek, Byuroning ish yurituvidagi 70 mlrd. 34 mln. soʻmlik 15 ming 491 ta ijro hujjatlaridan 27 mlrd. 304 mln. soʻm mablagʻ amalda undirilgan.

Shuningdek, sessiya ishida tuman mahalliy byudjeti mablagʻlarining 6 oy davomida sarflanishi toʻgʻrisida tuman Moliya boʻlimi boshligʻi Ulugʻbek Bekniyazov hisobot berdi.

Taʼkidlanganidek, 2022-yil 6 oyi davomida byudjet xarajatlari rejasi kiritilgan oʻzgarishlardan keyin jami 141. mlrd 783 mln. 988 ming soʻmni tashkil qilib, 2022-yil 6 oyi davomida byudjet mablagʻlari xarajatlari hisobidan jami 136 mlrd. 220 mln soʻm mablagʻlar sarflangan.

Sessiya ishida “Meva sabzavotchilik va uzumchilikda oilaviy tadbirkorlikni rivojlantirish, qishloq xoʻjaligi mahsulotlarini ishlab chiqarishda dehqon xoʻjaligining ulushini oshirish chora-tadbirlari toʻgʻrisida”gi qarorning tumandagi ijrosini taʼminlash boʻyicha tuman hokimi oʻrinbosari Islom Matkarimovning, “Sahovat va koʻmak” jamgʻarmasi mablagʻlari hisobidan “Temir daftar”dagi 196 nafar oilalarga 368,3 mln. soʻm moddiy yordam ajratish toʻgʻrisida”gi masala yuzasidan tuman Mahallabay ishlash va tadbirkorlikni rivojlantirish markazi boshligʻi Jasur Davletovning hisobotlari tinglandi.

Sessiya yakunida kun tartibida barcha masalalar boʻyicha fikr-mulohazalarni inobatga olgan holda xalq deputatlari Amudaryo tuman Kengashining tegishli qarorlari qabul qilindi.

Tuman hokimligining Axborot xizmati.