Urugʻlik uchun paxta ekilgan dalalar hosilini aniqlash va gʻalla ekish mavsumini sifatli oʻtkazishga bagʻishlangan koʻrgazmali seminarlar boʻlib oʻtdi

Amudaryo tumanida 2022-yil hosili uchun 2200 gektar maydonda 47 ta fermer xoʻjaliklari tomonidan urugʻlik chigit ekilgan boʻlib, bugungi kunda ushbu maydonlarda aprobatsiya, yaʼni kutilayotgan hosilni aniqlash tadbirini amalga oshirilmoqda. Bu borada tajriba almashish maqsadida Toʻlqin ovulidagi “Ahmedov Rajabboy” fermer xoʻjaligida koʻrgazmali seminar boʻlib oʻtdi. Ushbu xoʻjalikda 80 gektar maydonga urugʻlik paxta ekilgan.

Tadbirga Respublika “Urugʻchilikni rivojlantirish markazi” davlat korxonasining Qoraqalpogʻiston Respublikasi boshqarmasi masʼullari hamda tuman hokimining Qishloq va suv xoʻjaligi masalalari boʻyicha oʻrinbosari Islom Matkarimov, masʼuliyati cheklangan jamiyat shaklidagi “ Amudaryotex” xususiy korxonasi paxta-toʻqimachilik klasteri, tuman Qishloq xoʻjaligi boʻlimi mutasaddilari hamda tumandagi urugʻlik paxta yetishtiruvchi 47 ta fermer xoʻjaligi rahbarlari qatnashdilar.

Tadbirda qishloq xoʻjaligi masʼullari va ishtirokchilar urugʻlik paxta ekilgan daladagi gʻoʻza nihollarining rivojlanishini koʻzdan kechirdilar. Avgust oyida javom etayotgan gʻoʻza parvarishida “Dolzarb-30 kunlik”da belgilangan agrotexnik tadbirlarni oʻz vaqtida amalga oshirish, kasallik va zararkunandalarga qarshi samarali kurashish, oziqlantirish ishlarini yakunlash yuzasidan tushuntirishlar berildi. Shuningdek, ushbu maydonlarni sharbat usulida peshma-pesh sugʻorish hamda kultivatsiya qilish ishlarini tizimli tashkil qilish kabi agrotexnik tadbirlarni oʻz vaqtida bajarish yuzasidan koʻrsatmalar berildi.

Gʻoʻza parvarishida “Dolzarb-30 kunlik”da qoʻshimcha gʻoʻza maydonlarini 2-marta kultivatsiya qilish, gʻoʻza maydonlariga 2-marta biostimulyatorlar sepish, zararkunandalarga qarshi kurashish, maydonlarini 3-marta sharbat usulida sugʻorish, chilpish ishlarini yakunlash kabi tadbirlarni tez fursatlarda yakunlash vazifalari topshirildi. Shuningdek, gʻoʻza qator oralarini suvdan keyingi kultivatsiya qilish ishlari gʻoyatda muhim ekanligi aytildi. Buning uchun tumanda mavjud 365 ta kultivatorlarni otryad usulda ishlatishga alohida eʼtibor qaratilib, 90 ta otryadlar tuzilgani va har bir otryadga tajribali mutaxassislar biriktirilgani taʼkidlandi.

Avgust oyida dehqonlarimiz yana bir muhim palla – rizq-roʻzimiz boʻlgan gʻalla ekish mavsumini ham boshlaydilar. Tumanimizda 2023-yil hosili uchun 355 ta fermer xoʻjaliklari hamda qishloq xoʻjaligi korxonalari tomonidan 7000 gektar maydonga gʻalla ekish rejalashgan. Shundan 2800 gektari ochiq maydonga, 4200 gektari gʻoʻza qator oralariga ekiladi.

Shu yilning 11-avgustida Toshyop ovulidagi “Bekman Allamberganov” fermer xoʻjaligida gʻalla ekish ishlarini namunali tashkil etish masalasiga bagʻishlangan seminar boʻlib oʻtdi.

Seminarda tuman hokimi Sultonboy Yoʻldashev, Oʻzbekiston Respublikasi Qishloq xoʻjaligi vazirining birinchi oʻrinbosari Shuhrat Teshayev, Suv xoʻjaligi vaziri Shavkat Hamroyev, Qoraqalpogʻiston Respublikasi Vazirlar Kengashi Raisi oʻrinbosari Daryoboy Qaypov, qishloq xoʻjaligi sohasining tumandagi masʼullari, fermer xoʻjaliklari raislari ishtirok etdilar.

Tadbirda Daryoboy Qaypov, Shavkat Hamroyev, Shuhrat Teshayev, Sultonboy Yoʻldashevlar 2023-yil hosili uchun gʻalla ekish mavsumini qulay muddatlarda sifatli oʻtkazish yuzasidan fermer xoʻjaliklari rahbarlariga zarur maslahat va tavsiyalarni berib oʻtdilar.

Taʼkidlanganidek, ekish mavsumini oʻz vaqtida, namunali oʻtkazish uchun urugʻlik miqdori hisob-kitob qilinib, gʻamlandi. Har bir gektar yerga 250 kilogrammdan urugʻlik sarflanishi koʻzda tutilgan. Ekish ishlarini 15-avgustda 31-avgustgacha, optimal muddatlarda oʻtkazish uchun fermer xoʻjaliklari kesimida grafiklar ishlab chiqilgan.

Shuningdek gʻalla ekish mavsumi uchun 25 ta otryadlar tashkil etildi va ularga 620 ta turli texnika hamda mexanizmlar biriktirildi.

Tumanda joriy yilda 2023-yil hosili uchun gʻallaning “Alekseyevich”, “Antonino”, “Grom”, “Davr”, “Asr” kabi navlar urugʻi ekilishi va yuqori hosil yetishtirishning barcha choralari amalga oshirilishi taʼkidlandi.

Oygul RAJABOVA.