1-sektor hududida “Ogohlik−davr talabi” mavzusida yigʻilish boʻlib oʻtdi

12-avgust kuni Amudaryo tumani Daryoboʻyi mahalla fuqarolar yigʻini hududida joylashgan 21-sonli Bolalar musiqa va sanʼat maktabi binosida “Ogohlik – davr talabi” mavzusida yigʻilish boʻlib oʻtdi.

Unda tuman hokimi, 1-sektor rahbari − Sultonboy Yoʻldashev, Davlat xafvsizlik xizmati Amudaryo tuman boʻlimi boshligʻi Sanjar Nazarov, hokim oʻrinbosari Goʻzal Saburova hamda 1-sektor hududidagi 12 ta ovul va mahalla fuqarolar yigʻini profilaktika inspektorlari, fuqarolar yigʻinlari raislari, hokim yordamchilari, xotin-qizlar faollari va yoshlar yetakchilari ishtirok etishdi.

Uchrashuvda tuman hokimi Sultonboy Yoʻldashev shu yilning 1-2-iyul kunlari Nukus shahrida boʻlib oʻtgan ommaviy tartibsizliklarning kelib chiqish sabablari va oqibatlari haqida oʻz fikr- mulohazalarini bildirib, mahallalar kesimida yoshlar, ayol-qizlar bilan ishlash tizimini yanada takomillashtirish zarurligini taʼkidladi.

Shuningdek, yigʻilishda soʻzga chiqqanlar jahon miqyosida inson ongi va qalbi uchun kurash shiddat bilan davom etayotganligini, terrorizm va diniy aqidaparastlik oqimi har qanday davlatning rivojiga salbiy taʼsir koʻrsatishini aytib oʻtishdi.

Qolaversa, yoshlarning axborot asrida ijtimoiy tarmoqlarda tarqalayotgan turli xabarlarlarga koʻr-koʻrona ishonib ketmasliklari va buning uchun albatta, mahallalarda faoliyat olib borayotgan yoshlar yetakchilari, xotin-qizlar faollari targʻibot-tushuntirish ishlarini yanada kuchaytirishlari zarurligi, ayniqsa, yoshlar yetakchilari yoshlarning boʻsh vaqtini mazmunli tashkil etishlarida yaqindan koʻmak berishi lozimligi aytib oʻtildi.

Davlat xafvsizlik xizmati Amudaryo tuman boʻlimi boshligʻi Sanjar Nazarov har bir yosh eʼtibor markazida boʻlsa huquqbuzarlik va jinoyatlar sodir etilishining oldi olinishi hamda yurtimizdagi tinchlik va barqarorlik oliy neʼmat ekani, har bir millatning maʼnaviyatini uning tarixi, urf-odatlari, anʼanalari, barhayot qadriyatlari tashkil etishini yoshlarimiz ong shuuriga singdirish lozimligini aytib oʻtdi.

Shuningdek, yot unsurlarning turli vaʼdalariga ishonib aldanib qolmasdan, balki, yurtimizda amalga oshirilayotgan islohotlarga oʻz xissasini qoʻshish, halol mahnat qilishga odatlanish, kelgusida malakali mutaxassis boʻlib yetishishga harakat qilish bugungi yoshlarning asosiy vazifalaridan biri ekanligini taʼkidladi.

Darhaqiqat, bugungi globallashuv va taraqqiyot asri har kimdan kuchli bilim va tafakkur egasi boʻlishni, zamonaviy axborot texnologiyalaridan unumli va maqsadli foydalanishni, sodir boʻlayotgan voqea-hodisalarga mustahkam insoniylik pozitsiyasi bilan yondashishni talab etadi.

Yoshlarni diniy ekstremizm va terorizm, “ommaviy madaniyat” hamda maʼnaviy tahdidlar kabi salbiy illatlar va ularning zararli oqibatlaridan asrash har bir fuqaroning burchidir.

Yigʻilish yakunida tuman hokimi tomonidan mahallalarda yoshlar bilan ishlash borasida ahamiyat qaratilishi lozim boʻlgan tavsiyalar hamda topshiriqlar berildi.

Tuman hokimligining Axborot xizmati