Oʻzbekiston Fermer, dehqon xoʻjaliklari va tomorqa yer egalari Kengashi raisi Aktam Haitov Amudaryo tumanida boʻldi

20-avgust kuni Oʻzbekiston Fermer, dehqon xoʻjaliklari va tomorqa yer egalari Kengashi raisi Aktam Hayitov, Bogʻdorchilik va issiqxona xoʻjaligini rivojlantirish agentligi boshligʻi Husniddin Karimovlar Amudaryo tumani hokimi Sultonboy Yoʻldashev hamrohligida tumanning Doʻrman hamda Xolimbeg ovullaridagi fermer xoʻjaliklarida boʻldi.

Tashrif davomida dastlab mehmonlar Doʻrman ovulining fermer xoʻjaliklaridagi gʻoʻza maydonlarini koʻzdan kechirdi.

Koʻpni koʻrgan, tajribali dehqonlar yoz chillasidagi harorat gʻoʻza nihollarining rivojlanishida va moʻl hosil yetishtirishda muhim oʻrin tutishini yaxshi biladilar. Amudaryolik fermerlar ham gʻoʻza ekilgan 2 ming 200 gektar maydonlarda agrotexnika tadbirlarini oʻz vaqtida amalga oshirib, vegetatsiya davridagi tadbirlarni optimal variantlarda va sifatli oʻtkazishga bor kuch va resursni sarf etmoqdalar.

Uchrashuv davomida Aktam Hayitov gʻoʻza parvarishida belgilangan agrotexnik tadbirlarni oʻz vaqtida amalga oshirish, kasallik va zararkunandalarga qarshi samarali kurashish, oziqlantirish ishlarini yakunlash va ushbu maydonlarni sharbat usulida peshma-pesh sugʻorish hamda kultivatsiya qilish ishlarining tashkil etilishi boʻyicha takliflarini berib oʻtdi.

Shundan soʻng, Xolimbeg ovulida istiqomat qiluvchi aka-ukalar Tursunboy hamda Erkinboy Togʻayevlarning xonadonlariga tashrif buyurildi. Oʻzlarinig ixchamgina tomorqasidan unumli foydalanib, turli poliz ekinlarini yetishtirib katta daromad manbaiga ega boʻlayotgan aka-ukalar yetishtirgan mahsulotlarini bozor rastalariga chiqarib, aholini arzon hamda sifatli mahsulotlar bilan taʼminlashga hissa qoʻshmoqdalar.

Darhaqiqat, tomorqa — rizq-nasiba, moʻmay daromad manbai. Uning dasturxonimiz fayz-u barakasi, aholi turmush farovonligi, yurt obodligini taʼminlashdagi oʻrnining esa qiyosi yoʻq. Hamma gap undan nechogʻli oqilona foydalana olishda.

Tashrif davomida mehmonlar Xolimbeg ovulida istiqomat qiluvchi, oʻzlarining tadbirkorlik faoliyatini qishloq xoʻjaligi mahsulotlarini yetishtirish orqali yoʻlga qoʻygan fuqarolarning dalalarida ham boʻldilar.

Ushbu fuqarolar hokim yordamchisi Akmalbek Xolmuratovning koʻmagi bilan e-auksion tizimi orqali 25 sotixdan ijaraga yer olishib, yer maydonlarida yetishtirilgan ekinlarni agrotexnika qoidalariga rioya qilgan holda parvarishlab, sifatli poliz mahsulotlarini yetishtirdi.

Ekinlarning dastlabki hosilidan 15 mln. soʻm atrofida sof daromad koʻrgan fuqarolar bugungi kunga kelib oʻz dalalariga takroriy ekinlar ekishgan.

Aktam Hayitov hamda Husniddin Karimovlar bir qarich yerdan ham unumli foydalanayotgan paxta dalalaridagi mirishkor dehqonlarimiz, tomorqasida oilasining yillik ehtiyojini qoplash bilan birga qoʻshimcha daromad topayotgan tumanimiz aholisining ishlariga omad tiladilar.

Tuman hokimligining Axborot xizmati.