82-sonli maktabda oʻtkazilgan "Bilimlar kuni" tadbirida tuman hokimi S.Yoʻldoshev ishtirok etdi

Mavzuga oid fotogalereya

5-sentyabr kuni yurtimizdagi barcha umumtaʼlim maktablarda “Bilimlar kuni” keng nishonlanib, “Birinchi qoʻngʻiroq” tadbirlari boʻlib oʻtdi. Amudaryo tumanidagi 85 ta umumtaʼlim maktablarida ham birinchi qoʻngʻiroq sadolari yangrab, taʼlim maskanlari bolajonlarni oʻz bagʻriga chorladi.

Mangʻit shahrining Olmazor mahallasi hududidagi 82-sonli maktabda boʻlib oʻtgan “Birinchi qoʻngʻiroq” tadbirida tuman hokimi Sultonboy Yoʻldashev ishtirok etdi.

Tuman hokimi dastlab barchani Vatanimiz mustaqilligining 31-yilligi bilan qizgʻin muborakbod etib, taʼlim sohasi xodimlarini, mazkur maktab oʻquvchilari siymosida tumanimizdagi umumtaʼlim maktablarda taʼlim oluvchi 37 ming 965 nafar oʻquvchilarni “Bilimlar kuni” – yangi oʻquv yilining boshlanishi bilan samimiy tabrikladi. Shuningdek, joriy yilda tumanimizdagi maktablarning 1-sinfga qabul qilinayotgan 4 ming 390 nafar bolajonlarning kelgusi oʻqishlarida omad tiladi.

Tadbir davomida soʻzga chiqqanlar oʻquvchilarni davlatimiz tomonidan yaratib berilgan shart-sharoitlar, imkoniyatlardan toʻliq foydlanib, shijoat bilan bilim olishga, Vatanimiz koriga yaraydigan munosib farzand boʻlib yetishishga daʼvat etdi. Shuningdek, yangi oʻquv yili barcha oʻqituvchi va murabbiylarga, oʻquvchilarga muvaffaqiyatli, taʼlim sifati va samaradorligi har yildagidan ham yuqori boʻlishiga tilakdosh boʻldilar.

Bugun maktab ostonasiga ilk qadam qoʻygan oʻquvchilarning hayajonlari cheksiz, ularning murgʻak qalblarida Vatan, ona, tinchlik, doʻstlik kabi muqaddas tushunchalar eng avvalo, mana shu maskanda keng quloch yozib, shakllanadi.

Har yili birinchi sinf oʻquvchilariga Prezident sovgʻasi − 14 xildagi oʻquv qurollarini taʼnatanli tarzda topshirish anʼanaga aylangan. 82-sonli maktabning 1-sinfiga qabul qilingan bolajonlarga ham Prezidentimizning ushbu sovgʻalari tuman hokimi, xalq taʼlimi boʻlimi mudiri va boshqa masʼullar tomonidan tantanali ravishda topshirildi.

Shundan soʻng birinchi qoʻngʻiroq sadolari jaranglab, oʻquvchilar jonajon sinfxonalariga kirdilar. “Yangi Oʻzbekistonda el aziz, inson aziz!” shiori ostida oʻtkazilgan Mustaqillik darslarida oʻquvchilarga Vatanimizning shonli tarixi, mustaqillikning qadri va ahamiyati, yurtimizda inson qadrini ulugʻlash, xalq farovonligini taʼminlash yoʻlida amalga oshirilayotgan ishlar haqida keng tushunchalar berildi.

Tuman hokimi sinf xonalarida ilk dars soatlari boshlanishini mushtoqlik bilan kutayotgan bolajonlarni Prezident sovgʻalari bilan tabrikladi. Ularning kelajakda oʻz kasbining yetuk mutaxassisi boʻlib yetishishlariga, ustozlari bergan taʼlim va tarbiyasi oqlab, kelajakda komil insonlar boʻlib voyaga yetishlariga tilakdoshlik bildirdi.

Tuman hokimligining Axborot xizmati.