PAXTA YIGʻIM-TERIM MAVSUMI BOShLANIShIGA BAGʻIShLANGAN TADBIR OʻTKAZILDI

Amudaryo tumanida 2022-yil hosili uchun yetishtirilgan paxta yigʻim-terim mavsumining ramziy boshlanishi hisoblangan “Oq oltin karvoni” tadbiri tashkil etildi. Tadbirda tuman hokimi Sultonboy Yoʻldashev, sektor rahbarlari va qishloq xoʻjaligi sohasi masʼullari, fermer xoʻjaliklar rahbarlari ishtirok etdilar.

 5-sentyabr kuni boʻlib oʻtgan ushbu tadbirda dastlab tuman hokimi Sultonboy Yoʻldashev soʻzga chiqdi va paxtakorlarni erta bahordan urugʻ qadab, agrotexnik tadbirlarni oʻz vaqtida va sifatli bajarib, hosilni yigʻib olish mavsumiga yetib kelganliklari bilan tabrikladi. Mavsum davomidagi paxta terish jarayonlarida kuch-quvvat va gʻayrat-shijoat, “oq oltin”ni nes-nobud qilmasdan yigʻib olishda kuch-quvvat tiladi.

Shuningdek, qishloq xoʻjaligi sohasi vakillari, fermer xoʻjalik rahbarlari ham soʻzga chiqib, paxtakor-dehqonlarni bahor-yoz oylarida barcha agrotexnik tadbirlarni oʻz vaqtida va sifatli bajarib, marraga – hosilni yigʻib olishdek masʼuliyatli mavsumga yetib kelganliklari bilan tabrikladi. Shuningdek, barchani hosilni nest-nobud qilmay yigʻib-terib olishga bor imkoniyatni safarbar qilishga chaqirdi.

Maʼlumot oʻrnida aytish kerakki, joriy yilda amudaryolik paxtakorlar oʻz oldilariga ulkan marralarni qoʻydilar. Masʼuliyati cheklangan jamiyat shaklidagi “Amudaryotex” xorijiy korxonasi klasteri bilan 351 ta paxtachilik fermer xoʻjaliklari oʻrtasida shartnomalar tuzilib, 13 ming 900 gektar yerga tumanimiz iqlim sharoitiga mos serhosil paxta navlari ekildi.

Fermer xoʻjaliklari rahbarlari joriy qishloq xoʻjaligi yilining barcha mavsum yumushlarini agrotexnika qoidalariga muvofiq tashkil etdilar. Yetishtirilgan paxta hosilini qisqa muddatlarda yigʻib-terib olish boʻyicha tumanda terim otryadlari tashkil qilinib, ularga yordamchi-terimchilar biriktirilgan.

Barcha paxta maydonlarida defoliatsiya ishlari sifatli yakuniga yetkazildi. Shuningdek, mavsum boshlanishi oldidan paxta yigʻim-terimini koʻtarinki ruhda, uyushqoqlik va jipslik bilan amalga oshirish, terimchilar va koʻngilli hasharchilar uchun zarur shart-sharoitlar yaratish maqsadida terilgan paxtani qabul punktlariga tashish uchun transport vositalari, tirkama, terim surʼatini bir maromda olib borishni taʼminlash uchun tarozilar taxt qilib qoʻyildi.

Qabul punktlarida ham yongʻin xavfsizligi qoidalariga rioya qilingan holda mavsumga tayyorgarlik ishlari olib borildi va xoʻjaliklardan keltirilgan paxtalarni oʻz vaqtida qabul qilib olishga shay qilib qoʻyildi. Bundan tashqari, terimchilarning sifatli tushlik bilan muntazam taʼminlanishlariga alohida eʼtibor qaratilib, fermer xoʻjaliklari tomonidan qozon-oʻchoqlar, toza ichimlik suvi saqlash idishlari va boshqa zarur ashyolar tayyorlandi.

Tadbirda ishtirok etgan sektorlar rahbarlari ham tumanimiz dalalaridagi paxta xirmoni barakatli boʻlib, amudaryolik paxtakorlar har yilgidek Respublikada birinchilardan boʻlib, moʻl paxta xirmoni bunyod etishlarida omad tiladilar. Marosimdan soʻng, qabul maskanida paxta qabul qilish ishlari boshlab yuborildi.

Tumanimizdagi barcha fermer xoʻjaliklari paxta dalalarida hosil yigʻim-terimi jadal surʼatlarda boshlab yuborildi.

O.Xudoyberganova.