“BESh TAShABBUS OLIMPIADASI” MUSOBAQALARINING IKKINChI MAVSUMIGA START BERILDI

Mamlakatimizda “Besh tashabbus olimpiadasi” nomi bilan yoshlar, oʻsmirlar orasida madaniyat, sanʼat, sport, kitobxonlik, IT kabi 14 ta yoʻnalishlarda oʻtkazilayotgan musobaqalar, aytish joizki, barcha yoshlarni beeʼtibor qoldirmadi. Musobaqalarning ilk mavsumida mamlakat boʻyicha 6 milliondan ortiq ishtirokchilar qatnashgani va oʻz iqtidorlarini sinovdan oʻtkazgani buni dalillab turibdi.

Shu yilning 10-sentyabridan mamlakatimiz boʻylab besh bosqichli “Besh tashabbus olimpiadasi”ning ikkinchi mavsumiga start berildi va unda ilk bosqichdagi barcha musobaqalardan tashqari sportning kurash turi ham oʻrin olgan. Ikkinchi mavsum ham mahalla-sektor-tuman-hudud-respublika boqichida oʻtkaziladi.

10-sentyabr kuni Amudaryo tumanida ham ikkinchi mavsum musobaqalariga start berildi. Sport maktabining Chordara mahallasidagi sport zalida shu munosabat bilan tadbir tashkil etildi. Unda Yoshlar ishlari agentligi tuman boʻlimi boshligʻi Sardor Ismoilov, boʻlim besh tashabbus olimpiadasini muvofiqlashtirish boʻyicha mutaxassisi Javohir Oʻrozboyev, sport sohasi masʼullari va murabbiylar, mahallalar yoshlar yetakchilari ishtirok etdilar.

Sardor Ismoilov “Besh tashabbus olimpiadasi” ikkinchi mavsumi doirasida stol tennisi musobaqalarining boshlanishi bilan barchani qutladi va bellashuvga chiqayotgan Yangiobod, Chordara, Durunki, Boyovul mahallalari tennischilariga omadlar tiladi. Mazkur musobaqalarning ilk mavsumida tumanimiz yoshlari muvaffaqiyatli ishtirok etishganini eʼtirof etdi va joriy mavsumda bu yutuqlar yana ham koʻpayishiga umid bildirdi.

Maʼlumot uchun: ushbu musobaqaning ilk mavsumidagi uchta – yaʼni mahalla-sektor-tuman bosqichlarida tumanimizning 27 mingdan ortiq intiluvchan va iqtidorli yoshlari ishtirok etib, shularning 144 nafari Qoraqalpogʻiston Respublikasi bosqichida iqtidorlarini sinovdan oʻtkazishdi va 41 nafar yoshlar gʻolib  va sovrindor boʻlishdi.

Doʻrman ovulida istiqomat  qiluvchi Oʻrinboyevlar oilasi “Yosh kitobxon oila” yoʻnalishida mutloq gʻoliblikni qoʻlga kiritib, Prezident sovgʻasi – “Spark” avtomobili bilan mukofotlangan edi.

“Besh tashabbus olimpiadasi” musobaqalarining ikkinchi mavsumi sportning stol tennisi turi bilan boshlandi. Chordara, Durunki, Boyovul, Yangiobod mahallalari sportchilari oʻrtasidagi bellashuvlar shiddatli va qizgʻin kechdi. Barcha yoshlar gʻoliblik uchun astoydil intildilar va mahallasi sport sharafini yuksaltirishga harakat qildilar.

Yurtimizda yoshlarning boʻsh vaqtlarini mazmunli tashkil etish maqsadida ularni kitobxonlik, madaniyat va sanʼat, intellektual oʻyinlar, axborot texnologiyalari va sport turlariga keng jalb etish boʻyicha oʻtkazilayotgan “Besh tashabbus olimpiadasi” musobaqalarining ikkinchi mavsumini uyushqoqlik bilan namunali tarzda oʻtkazilishi uchun barcha chora-tadbirlar koʻrilgan.

Musobaqalar tumanimizning iqtidorli va salohiyatli yoshlari, mohir sportchilari aniqlanishiga xizmat qiladi.

O.RAJABOVA.