MAKTABDA SOGʻLOM TURMUSh TARZI AFZALLIGINI TARGʻIB ETIShGA BAGʻIShLANGAN DAVRA SUHBATI OʻTKAZILDI

Bugungi kunda aholi, ayniqsa yoshlar orasida sogʻlom turmush tarzi madaniyatini shakllantirish tibbiyot xodimlarininggina emas, taʼlim muassasalari, sport muassasalari va barcha jamoat tashkilotlari bilan bir qatorda ommaviy axborot vositalarining ham vazifasidir. Sogʻlom turmush turzi madaniyatini shakllantirishdek ulugʻvor maqsadning amalga oshirilishiga Amudaryo tumanining ijtimoiy-siyosiy nashri – “Taraqqiyot koʻzgusi” gazetasi tahririyati xodimlari ham baholi qudrat hissa qoʻshib kelishmoqda.

Tahririyat Oʻzbekiston Respublikasi Oliy Majlisi huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat Fondi tomonidan eʼlon qilingan grant tanlovida oʻzining “Sogʻlom turmush tarzi – farovon hayot asosi” deb nomlangan loyihasi bilan qatnashib, gʻolib boʻldi va 2021-yil dekabr oyidan loyihani amalga oshirish boshlandi.

Shu kungacha loyiha doirasida sogʻlom yashashga targʻib etish, hayotimizdan oʻrin olgan zararli odatlar va ularning oqibatlari xususida, jismoniy faollikning ahamiyati, sport – sogʻlik garovi ekanligi xususida “Amudaryo TV” telekanali, amunews.uz veb-sayti va “Taraqqiyot koʻzgusi”, “Mening oilam” gazetalarida koʻplab turli janrlarda materiallar berib borilmoqda.

Bundan tashqari, ovul va mahallalarda, taʼlim muassasalarida oʻquvchi-yoshlar bilan davra suhbatlari oʻtkazib kelinmoqda. 14-sentyabr kuni Qilichboy ovulida faoliyat yuritayotgan 15-sonli maktabda “Yoshlar oʻrtasida sogʻlom turmush madaniyatini shakllantirish” mavzusida oʻtkazilgan tadbir ham shularning biridir.

Davra suhbatini maktab direktori oʻrinbosari Iskandar Iskandarov ochdi va oʻquvchilarga tadbir maqsadini tushuntirdi. “Taraqqiyot koʻzgusi” gazetasi maxsus muxbiri Oygul Rajabova yoshlarni sogʻlom turmush tarziga amal qilib yashash, zararli odatlardan tiyilishga daʼvat etdi va buning yoshlar sogʻlom boʻlib kamolga yetishidagi ahamiyati haqida, shuningdek, sogʻlom yashash qoidalari haqida tushunchalar berdi.

Davra suhbatida Amudaryo tuman Tibbiyot birlashmasi shifokori Matyoqub Ernazarov sogʻlom yashash qoidalari haqida batafsil maʼlumotlar berdi.

Taʼkidlandiki, sogʻlom turmush tarzi uzoq umr koʻrish garovi ekanligi bugungi kunda koʻpchilikka ayon. Biroq shu qoidalarga amal qilishga koʻpincha eʼtiborsiz boʻlamiz. Aslida sogʻlom turmush tarzi bu har kimning oʻz sogʻligʻi haqida qaygʻurishi, keksaygan chogʻida ham hech kimning yordamiga muhtoj boʻlmay, emin-erkin yashashga zamin hozirlashidir. Buning uchun har kim oʻz salomatligiga xavf soluvchi zararli odatlardan tiyilib, jismoniy faol yashashga odatlanmogʻi lozim.

Shuningdek maʼruzachi bu boradagi qoidalarga ham keng toʻxtaldi.

Tadbir soʻngida oʻquvchilar sogʻlom turmush tarziga oid oʻzlarini qiziqtirgan savollarga shifokordan batafsil javoblar oldilar.

Grant loyihasi doirasida oʻquvchilar bilan oʻtkazilgan davra suhbatida ishtirokchilar yoshlar salomatligiga salbiy taʼsir koʻrsatuvchi omillar va ulardan saqlanishning ahamiyati haqida keng tushunchaga ega boʻldilar.

M.Shomurodov