Xalq deputatlari Amudaryo tuman Kengashining 52-sessiyasi toʻgʻrisida axborot

2022-yil 19-sentyabr kuni Amudaryo tumani hokimligida Xalq deputatlari tuman Kengashining 52-sessiyasi oʻz ishini boshladi.

Sessiya ishida tuman Kengashi deputatlari, sektorlar rahbarlari, hokim oʻrinbosarlari, hokimlik masʼul xodimlari, huquq-tartibot organlari, boʻlimlar, jamoat tashkilotlari rahbarlari hamda ommaviy axborot vositalari vakillari ishtirok etdi.

Sessiyani tuman hokimi – Xalq deputatlari tuman Kengashi raisi Sultonboy Yoʻldashev ochdi va olib bordi.

Sessiya kotibligiga 18-Xitoy saylov okrugidan deputat Muzaffar Yeshchanov saylandi.

Sessiyada dastlab Qoraqalpogʻiston Respublikasini ijtimoiy-iqtisodiy rivojlantirish boʻyicha belgilangan Prezident Farmonlari, Qarorlari va dasturlarining ijrosi hamda yil yakuniga qadar amalga oshirilishi belgilangan vazifalar yuzasidan birinchi va ikkinchi sektor rahbarlarining hisobotlari tinglandi.

1-sektor rahbari – tuman hokimi Sultonboy Yoʻldashev 2022-yilning 8 oyi dvomida 1-sektor hududida amalga oshirilgan ishlar haqida hisobot berdi.

Keltirilishicha, 1-sektor hududida yil boshidan buyon oilaviy tadbirkorlikni rivojlantirish maqsadida 460 nafar fuqaroga 9,6 mlrd.soʻmlik kredit mablagʻlagʻi ajratilib, yengil konstruktsiyali issiqxona va asbob-uskunalar sotib olish uchun 44 nafar fuqaroga 133,4 mln.soʻmlik subsidiyalar ajratildi.

Shuningdek, fuqarolarni kasb-hunarga oʻqitish, kooperatsiyalar tashkil qilishi, asbob-uskuna sotib olishlari uchun ham subsidiyalar ajratilmoqda.

Xususan, Qipchoq ovuli hududida “Amudaryo outlet” ishlab chiqarish kooperativiga 15 nafar xotin-qizlarni aʼzo qilgan holda 60 mln. soʻm subsidiya mablagʻlari ajratildi.

1-sektor rahbari joriy yilning oʻtgan davri mobaynida hududda keng koʻlamli qurilish ishlari amalga oshirilganini, xususan, ichki yoʻllar va avtomobil yoʻllari taʼmirlanib, yangidan transformatorlar, elektr uzatish ustunlari oʻrnatilganini aytib oʻtdi.

Shuningdek, aholini ijtimoiy qoʻllab-quvvatlash boʻyicha joriy yilning 8 oyi davomida 77 nafar fuqarolar reablitatsiya texnik vositalari va kreslo-aravachalar bilan taʼminlandi.

Koʻrsatilgan amaliy yordamlar natijasida 1-sektor hududidagi 597 ta oilalarning 560 tasi “Temir daftar”dan, 933 nafar xotin-qizlarning 853 nafari “Ayollar daftari”dan, 541 nafar yoshlarning 498 nafari “Yoshlar daftari”dan chiqarilgan.

Sessiya ishida 2-sektor rahbari – tuman prokurori Aziz Roʻzmetovning ham sektor hududida 8 oy davomida amalga oshirilgan ishlar boʻyicha hisoboti tinglandi.

Taʼkidlanganidek, sektor hudida aholi bandligini taʼminlash, tadbirkorlikni rivojlantirish hamda aholini ijtimoiy jihatdan qoʻllab-quvvatlash borasida tizimli ishlar amalga oshirilgan.

Jumladan, joriy yilning 8 oyi mobaynida sektor hududida yashovchi 371 nafar xotin-qizlar ish bilan taʼminlandi. Tadbirkorlik qilish istagidagi xotin-qizlarning 140 nafariga kreditlar ajratildi. Shuningdek, hududdagi 227 nafar ayolga tibbiy xizmatlar koʻrsatilib, salomatligini tiklashi uchun sharoitlar yaratib berildi.

Sessiya ishida tumanda millatlararo munosabatlarni mustahkamlash boʻyicha amalga oshirilayotgan ishlar xususida Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenbayevning hisoboti tinglandi.

Taʼkidlanganidek, tumanning Mangʻit shahri, Beshtom, Nazarxon, Kuyuk-koʻpir, Amir Temur kabi ovullarida asosan rus, qozoq, qaraqalpoq, turkman millatiga mansub aholi istiqomat qilishadi. Ushbu ovul va mahallalarda aholining yashash tarzi yaxshi boʻlib, shu paytgacha milliy va etnik nizolar kelib chiqmadi. Aholi tinchlik va hamjihatlikda yashab kelmoqda. Tumanda faoliyat yuritib kelayotgan 85 ta maktablarda taʼlim 5 ta tilda olib boriladi.

Sessiya kun tartibidagi xotin-qizlarni qiynayotgan muammolarni hal qilish hamda jamiyatda ularning nufuzini yanada oshirish boʻyicha koʻrilayotgan choralar samarodorligi boʻyicha tuman hokimining oʻrinbosari, Oila va xotin-qizlar boʻlimi boshligʻi Goʻzal Saburovaning hisoboti tinglandi.

Qayd etilishicha, joriy yilning 8 oyi davomida ijtimoiy himoyaga muhtoj, ishsiz 1 208 nafar ehtiyojmand xotin-qizlardan 1 196 nafarining bandligi taʼminlandi. 907 nafar ehtiyojmand xotin-qizlarning 805 nafariga “Ayollar jamgʻarmasi” tomonidan bazaviy hisoblash miqdorining 4 barobari miqdorida bir martalik moddiy yordamlar koʻrsatildi.

Undan tashqari, ayollarning oʻz tomorqasidan unumli foydalanishlari uchun 70 nafar ayol-qizga hududdagi fermerlar biriktirilib, fermer xoʻjaliklari rahbarlari tamonidan homiylik yordamlari sifatida bugʻdoy, un, yogʻ, parranda va boshqa oziq-ovqat mahsulotlari tarqatildi.

Sessiya ishida birlamchi tibbiy-sanitariya yordamini aholiga yaqinlashtirish va tibbiy xizmatlar samaradorligini oshirish boʻyicha amalga oshirilgan ishlar yuzasidan Amudaryo tuman tibbiyot birlashmasi boshligʻi Faxriddin Abdullayevning hisoboti tinglandi.

Hisobotda shoshilinch tibbiy yordam qabulxonasini tashkil qilish, qizil, sariq va yashil zonalarda tibbiy xizmatlarni sifatli tarzda amalga oshirish, bemorlarga qulaylik yaratish borasida olib borilayotgan ishlar haqida batafsil maʼlumotlar berildi. Shuningdek, aholi orasida yuqumli kasalliklarning oldini olishga qaratilgan targʻibot tadbirlari muntazam oʻtkazib kelinayotgani aytib oʻtildi.

2022-yilning oʻtgan davri mobaynida tuman markaziy shifoxonasida va Respublika tibbiyot markazlarida 87 nafar bemorlar bilan yuqori texnologik operatsiyalar oʻtkazilib, bemorlar ogʻir darddan xolos boʻlishdi.

Sessiya ishida kun tartibida koʻrilgan barcha masalalar boʻyicha xalq deputatlari tuman Kengashining tegishli qarorlari qabul qilindi.

Sessiya 20-sentyabr kuni oʻz ishini davom ettiradi.

Tuman hokimligining axborot xizmati.