Xalq deputatlari Amudaryo tuman Kengashining 52-sessiyasi ikkinchi ish kuni toʻgʻrisida axborot

20-sentyabr kuni Xalq deputatlari Amudaryo tuman Kengashining 52-sessiyasi oʻz ishini davom ettirdi.

Sessiya ishida tuman Kengashi deputatlari, sektorlar rahbarlari, hokim oʻrinbosarlari, hokimlik masʼul xodimlari, huquq-tartibot organlari, boʻlimlar, jamoat tashkilotlari rahbarlari hamda ommaviy axborot vositalari vakillari ishtirok etdi.

Sessiyani tuman hokimi – Xalq deputatlari tuman Kengashi raisi Sultonboy Yoʻldashev ochdi va olib bordi.

Sessiya ishida Qoraqalpogʻiston Respublikasini ijtimoiy-iqtisodiy rivojlantirish boʻyicha belgilangan Prezident Farmonlari, Qarorlari va dasturlarining ijrosi hamda yil yakuniga qadar amalga oshirilishi belgilangan vazifalar yuzasidan uchinchi va toʻrtinchi sektorlar rahbarlarining hisobotlari tinglandi.

 3-sektor rahbari – tuman Ichki ishlar boʻlimi boshligʻi Jamaladdin Yusupov 2022-yilning 8 oyi dvomida 3-sektor hududida amalga oshirilgan ishlar haqida hisobot berdi.

Hisobotda keltirilishicha, hududni ijtimoiy-iqtisodiy rivojlantirish, aholi bandligini taʼminlash, tibbiy xizmat koʻrsatish sifatini yaxshilash hamda tadbirkorlikni rivojlantirish boʻyicha salmoqli ishlar amalga oshirilgan.

Xususan, sektor hududiga qarashli Boyovul, Tor-yop, Qizilcholi, Oʻzbekiston, Kuyuk-koʻpir mahallalaridan oʻtuvchi davlat ahamiyatidagi va ichki yoʻllarda taʼmirlash ishlari olib borilgan. Shuningdek, 814 nafar ehtiyojmand oilalarning 753 nafari “Temir daftar”dan, 532 nafar yoshlarning 329 nafari “Yoshlar daftari”dan chiqarilgan.

Sessiya ishida 4-sektor rahbari − tuman Davlat soliq inspektsiyasi boshligʻi Aydos Seyitovning ham hisoboti tinglandi.

Qayd etilganidek, 2022-yilning oʻtgan davri mobaynida sektor hududida istiqomat qiluvchi vaqtincha ishsiz boʻlgan ayollar va yoshlarning 137 nafari doimiy ishga joylashtirilgan. 65 nafar fuqaroga 171 mln. soʻmlik subsidiyalar ajratilgan.

Undan tashqari, xududdagi xokim yordamchilarining koʻmagi bilan mahalladagi 462 nafar fuqarolarga oilaviy tadbirkorlikni yoʻlga qoʻyishlari uchun 7 mlrd 713 mln soʻmlik kreditlar ajratildi hamda 420 nafar ishsiz fuqarolarning oʻzini oʻzi band qilish orqali bandligi taʼminlandi.

Sektor hududida aholini ijtimoiy qoʻllab-quvvatlash boʻyicha ham tizimli ishlar amalga oshirildi. Ijtimoiy himoyaga muhtoj 49 nafar fuqaro reablitatsiya texnik vositalari va kreslo-aravachalari bilan taʼminlandi.

Sessiya kun tartibida Amudaryo tumanida “Temir daftar”ga kiritilgan oilalarni ijtimoiy himoya qilish boʻyicha amalga oshirilgan ishlar xususida Amudaryo tumani Mahallabay ishlash va tadbirkorlikni rivojlantirish markazi boshligʻi Jasur Davletovning hisoboti tinglandi.

Taʼkidlanganidek, mahallalar va sektor aʼzolari bilan birgalikda hududlarda olib borilgan oʻrganishlar natijasida joriy yilda jami 2 697 ta oilalar kambagʻal oilalar ekanligi aniqlandi. Ularning ijtimoiy himoyasini kuchaytirish maqsadida ushbu oilalar “Temir daftar”ga kiritildi.

Mazkur oilalarga hukumat Farmonlari va qarorlariga asosan jami 5,7 mlrd. soʻmlik moliyaviy koʻmak berildi. Shuningdek, 4 328 nafar mehnatga yaroqli ishsiz fuqarolarning bandligi taʼminlandi. Hisobotda “Temir daftar”ga kiritilgan oilalarga koʻrsatilgan ijtimoiy va moddiy yordam turlari haqida batafsil maʼlumotlar berib oʻtildi.

Koʻrsatilgan amaliy yordamlar natijasida doimiy daromad manbaiga ega boʻlgan 140 ta oilani “Temir daftar”dan chiqarish taklif qilindi.

Sessiya ishida Mahallalarda tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha kelib tushayotgan murojaatlarni tahlil qilgan holda hokim yordamchilari faoliyatining natijadorligini oʻrganish toʻgʻrisida tuman Xalq qabulxonasi mudiri Erkin Rajabovning hisoboti tinglandi.

Qayd etilganidek, Amudaryo tumanidagi Xalq qabulxonasiga 2022-yilning 7 oyi davomida jismoniy va yuridik shaxslar tomonidan 1 236 ta murojaatlar kelib tushgan. Shundan 1 228 ta murojaatlar koʻrib chiqilib, 8 ta murojaatlar oʻrganish jarayonida.

Shuningdek, hokim yordamchilari koʻmagi bilan oilaviy tadbirkorlikni rivojlantirish dasturlari doirasida bugungi kunda 2 ming 242 nafar fuqarolarga 45,9 mlrd. soʻmlik kreditlar ajratilgan. Qolaversa, hokim yordamchilari joriy yilning oʻtgan davri mobaynida 6 ming 951 nafar fuqarolarning bandligi taʼminlanishiga hissa qoʻshdilar.

Sessiya ishida Boʻz yop ovuli hududidan umumiy maydoni 7,9 gektar, shundan ekin maydoni 7,7 gektar boʻlgan uchastkada dexqon xoʻjaliklari tashkil etish, Nazarxon ovuli hududidan umumiy maydoni 185,2 gektar, shundan ekin maydoni 74,1 gektar uchastkada gʻallachilikka ixtisoslashgan elita xoʻjaligini rivojlantirish maqsadida ochiq elektron tanlovga chiqarish boʻyicha tayyorlangan hokim qarori loyihasi koʻrib chiqildi.

Sessiya ishida kun tartibidagi va Kengash vakolatiga kiruvchi boshqa masalalar ham koʻrib chiqilib, Xalq deputatlari tuman Kengashining tegishli qarorlari qabul qilindi.

Shuning bilan sessiya oʻz ishini yakunladi.

Tuman hokimligining Axborot xizmati.