Sport maktabi birinchiligida Amudaryo tumani bokschilari faxrli 1-oʻrinni qoʻlga kiritishdi

Mamlakatimizda bolalar sportini rivojlantirish borasida amalga oshirilayotgan saʼy-harakatlar tufayli sportning olimpiya turlari bilan shugʻullanuvchilar safi yil sayin oshib bormoqda. Bugungi kunda Prezidentimiz tomonidan ilgari surilgan “Besh muhim tashabbus” doirasida oʻtkazilayotgan turli koʻrik-tanlovlar, sport musobaqalari tobora koʻproq yoshlarni qamrab olayotgani fikrimizning yaqqol isbotidir.

Amudaryo tumanida ham oʻsib kelayotgan yosh avlodni jismonan va aqlan yetuk insonlar qilib tarbiyalab, voyaga yetkazish, ularni qiziqish va intilishlari asosida turli xil toʻgaraklarga jalb etish, pirovardida boʻsh vaqtlarini mazmunli oʻtkazishga erishish maqsadida amalga oshirilayotgan chora-tadbirlar eʼtiborga molik.

Tumanda oʻquvchi-yoshlarning boʻsh vaqtlarini mazmunli oʻtkazishlari uchun barcha sharoitlar mavjud. Ayniqsa, sportning olimpiya turlari boʻyicha sportchilar uchun yaratilgan sharoitlardan unumli foydalanayotgan yoshlar mazkur sport turlari boʻyicha sezilarli yutuqlarga erishmoqdalar. Albatta, bunda tuman va respublika miqyosida oʻtkazilayotgan sport musobaqalari muhim ahamiyatga ega.

Joriy yilning 27-30-sentyabr kunlari Amudaryo tumani mezbonlik qilgan boks sporti musobaqalarida ham tumanimizning yosh sportchilari oʻzlarining tengsizligini namoyon etdilar.

Amudaryo tuman Bolalar va oʻsmirlar sport maktabiga qarashli boks sporti zalida oʻsmirlar va yoshlar oʻrtasida boʻlib oʻtgan sport maktabi ochiq birinchiligi musobaqalarida Xorazm viloyati va Qoraqalpogʻiston Respublikasining Qoʻngʻirot, Nukus, Xoʻjayli, Boʻzatov, Taxiatosh, Beruniy hamda Amudaryo tumanlarining boks jamoalari ishtirok etdilar.

205 nafar charm qoʻlqop ustalari ishtirok etgan mazkur musobaqa uch kun davomida biri-biridan qiziqarli taassurolarga boy, murosasiz va doʻstona bellashuvlar asosida oʻtdi.

20 ta vazn toifasida oʻzaro kuch sinashgan sportchilardan eng kuchlilari yakuniy – final bosqichida bellashdilar. Musobaqani halollik va adolat tamoyillari asosida oʻtkazish maqsadida boks boʻyicha tajribali trener bosh hakam Jasur Nurimbetov rahbarligidagi hakamlar hayʼati tomonidan har bir sportchining kuch va imkoniyatlariga munosib baho berildi.

Qizgʻin bellashuvlar asosida va doʻstona vaziyatda oʻtkazilgan musobaqada amudaryolik charm qoʻlqop ustalari umumjamoa hisobida faxrli 1-oʻrinni egalladilar. Amudaryolik sportchilar 8 ta oltin, 4 ta kumush va 4 ta bronza, jami 16 ta medal bilan musobaqaning yuqori pogʻonasidan joy oldilar.

Musobaqa yakunida gʻolib sportchilar, 1-2-3-oʻrinni egallagan boks jamoalari Amudaryo sport maktabi maʼmuriyati va homiy tashkilotlar tomonidan gʻoliblik diplomlari, medallar va esdalik sovgʻalari, tashakkurnomalar bilan taqdirlandi.

Amudaryolik sportchi-yoshlarni erishgan ushbu gʻalabasi bilan chin dildan muborakbod etamiz va kelgusi musobaqalarda ham faol ishtirok etishib, Amudaryo tumani, qolaversa, Qoraqalpogʻiston Respublikasi hamda Oʻzbekiston shuhratini olamga yoyib, ona Vatan bayrogʻini baland koʻtarishlarida kuch-qudrat, omad tilaymiz.

Robiya Yoʻldosheva