MAHORATLI OʻZBEK TILI OʻQITUVChISI

Atoqli maʼrifatparvar bobomiz Abdulla Avloniy “Til millat ruhini yuksaltiruvchi buyuk kuchdir”, degan edilar. Ha, har bir xalqning oʻz ona tili uning shaʼni, gʻururi. Insonning vujudiga ona suti bilan kirgan Vatanga mehr-muhabbat va sadoqat tuygʻulari ona tiliga muhabbatdan boshlanadi. Bunday eʼtiqod oʻzbek xalqining qoniga singib ketgan, desak adashmagan boʻlamiz.

Keyingi yillarda necha asrlar osha ajdodlarimizdan bizga oʻtib kelayotgan ona tilimizning nufuzini oshirishga, uning davlat tili sifatidagi oʻrnini mustahkamlashga alohida eʼtibor qaratilmoqda. Dunyoning 65dan ortiq xorijiy oliy taʼlim muassasalarida oʻzbek tili oʻqitilayotgani, yer yuzida oʻzbek tilida soʻzlashuvchilar soni 50 million kishidan ziyod ekanligi tilimizning dunyo miqyosidagi obroʻ-eʼtiboridan darak beradi.

Bunda 1989-yil 21-oktyabrda “Davlat tili haqida”gi Qonunning qabul qilinib, turmushga tatbiq etilganligi muhim rol oʻynadi. Bu boradagi saʼy-harakatlar izchil davom ettirilib, 2020-yil 10-aprelda Oʻzbekiston Respublikasining “Oʻzbek tili bayrami kunini belgilash toʻgʻrisida”gi Qonuni, Prezidentning “Mamlakatimizda oʻzbek tilini yanada rivojlantirish va til siyosatini takomillashtirish chora-tadbirlari toʻgʻrisida”gi Farmoni qabul qilindi.

2020-yildan boshlab 21-oktyabr oʻzbek tili bayrami kuni sifatida ulkan bayram qilib kelinmoqda. Oʻzbek tilining xalqimiz hayotida obroʻ-eʼtiborini oshirish, unib-oʻsib kelayotgan yosh avlodga puxta oʻrgatishga alohida eʼtibor qaratilmoqda. Albatta, bunda ziyolilarning, xususan, umumiy oʻrta taʼlim maktablarida boshlangʻich taʼlim, ona tili va adabiyot oʻqituvchilarining hissasi zalvorli.

Tumanimizning Kuyuk koʻpir ovulida tugʻilib oʻsgan va umumiy oʻrta taʼlimni 19-sonli maktabda olgan Kumushoy Xolimbetova ham ona tilimizni yosh avlodga sidqidildan oʻrgatib kelayotgan mahoratli oʻqituvchilardan. U Qoraqalpoq davlat universiteti filologiya fakultetining oʻzbek tili va adabiyoti boʻlimini 2007-yilda tugatib, oʻqituvchilik faoliyati 14-sonli maktabda boshladi. Keyinchalik 26-sonli maktabga oʻtdi.

Ushbu maktab darslar samaradorligiga erishish borasida tumandagi yetakchi muassasalardan biri. Joriy yilda bitiruvchilarining 50 foizidan ziyodi mamlakatimizdagi turli oliygohlar talabalari boʻlishdi. Agar oliygohlarga barcha yoʻnalishlarda ham kirish test sinovlarida ona tili va adabiyot majburiy fan sifatida kiritilganini inobatga olsak, muassasada mehnat qilayotgan ona tili va adabiyot oʻqituvchilarining mehnatlari nechogʻlik natijali boʻlayotganini anglash qiyin emas.

Kumushoy Xolimbetovaning oʻqituvchilik faoliyatidagi yutuqlari ham havas qilgulik. Oʻquvchilari Bilimlar bellashuvi, fan olimpiadalari va boshqada turli tanlovlarda qatnashib, faxrli oʻrinlarni egallab kelmoqda. Uning dars ishlanmalari tuman miqyosida ommalashtirilgan. “Yil oʻqituvchisi” koʻrik-tanlovida tumanda faxrli oʻrinni egalladi, oliy toifali oʻqituvchi.

Kumush Xolimbetovaning erishgan yutuqlari sabablaridan biri uning oʻz kasbini juda yaxshi koʻrgani, oʻquvchilarga sidqidildan saboq bergani, badiiy adabiyotlarni koʻp oʻqishga jalb qila olgani boʻlsa, ajab emas. Axir badiiy adabiyotlarni koʻp oʻqigan odam oʻzbek tili qanchalik boy, jozibador ekanligini ham chuqur anglaydi.

U oʻquvchilariga oʻz onasini, Vatanini sevgan odam ona tilini ham sevishi, mukammal oʻrganishi, oʻz tilida bexato yozishni bilishi kerakligini chuqur singdirishga intiladi. Qolaversa, uni oilasida qoʻllab-quvvatlaydigan, yangi-yangi intilishlarga undaydigan, ragʻbatlantiradigan hamkasb turmush oʻrtogʻi bor. Ular uch nafar farzandlarni hamjihatlikda komil insonlar qilib voyaga yetkazishmoqda.

Ayol oilasidan koʻngli tinch, xotirjam boʻlsa, jamoasida, oilasida qoʻllab-quvvatlansa, albatta u koʻp xayrli ishlarga qodir boʻladi. Shu maʼnoda olib qaraydigan boʻlsak, Kumushoy Xolimbetova hali oʻqituvchilik faoliyatida koʻpgina yutuqlarga erishishiga shubha yoʻq.

Sevara ISMOILOVA, QDU talabasi.