Amudaryo tumani fermer va dehqon xoʻjaliklari hamda tomorqa yer egalari kengashining murojaati

Hurmatli va aziz fermerlar, dehqonlar hamda tomorqa yer egalari!

Soʻnggi yillarda mamlakatimizda koʻkalamzorlashtirish, oʻsimliklarni muhofaza qilish hamda yashil maydonlarni kengaytirish borasida keng koʻlamli ishlar amalga oshirilmoqda.

Koʻchat ekib, bogʻ yaratish – xalqimizning azaliy qadriyatlaridan biri. Zero, oʻzimiz yashab turgan joyni obodonlashtirish va koʻkalamzorlashtirish tufayli koʻnglimiz shodlikka toʻladi, turmushimiz fayzli va farovon boʻladi.

Ayni chogʻda bogʻlar, koʻchalar hamda yoʻl chetlarida yashnab turgan daraxtlar tevarak-atrofga koʻrk ulashishi barobarida havo musaffoligini taʼminlab, dasturxonimizni mevalar bilan toʻldiradi.

Daraxtlarga mehr berish, ularni parvarishlash eng ezgu va xayrli amal sanaladi. Koʻchat ekib, bogʻ yaratish, atrof-muhitni toza va ozoda saqlash xalqimizning asrlar sinovidan oʻtgan milliy qadriyatidir. Zero, ajdodlarimiz oilada yangi tugʻilgan farzandga atab yerga nihol qadagan. Oʻsha daraxt bilan birga farzand ham ulgʻaygan.

Demak, xalqimizning ibratli oʻtmishi oʻzimiz yashayotgan muhitda tabiatga oqilona munosabatda boʻlib, uni asrab avaylash, kelgusi avlodlar ham yashashi uchun qulay makon barpo etishga undaydi.

Muhtaram Prezidentimizning joriy yilning 11-oktyabr kuni oʻtkazgan yigʻilishda “Yashil makon” umummilliy loyihasini amalga oshirish borasida bergan koʻrsatmalari ana shunday ezgulik yoʻlidagi juda ham muhim tashabbusdir.

Prezidentimiz raisligida «Yashil makon» umummilliy loyihasini amalga oshirish boʻyicha 2022-yildagi ustuvor vazifalar yuzasidan boʻlib oʻtgan yigʻilishda bu boradagi ishlarni kengaytirib, “Yashil makon” umummilliy loyihasi doirasida joriy yil kuz oyida 434 ming 600 dona daraxt ekish vazifasi belgilab berildi.

Shuningdek, ushbu yigʻilishda «Yashil makon» umummilliy loyihasi bir yillik tadbir emasligi, kelgusi besh yilda 3 million tup daraxti koʻchatini ekish maqsad qilingani taʼkidlandi.

«Yashil makon» umummilliy loyiha amalga oshirilishi har bir hududning iqlimiga mos, kam suv talab qiladigan koʻchatlarni tanlab ularni etishtirish uchun koʻchatxonalar koʻpaytirilishi ayni muddaodir.

Oʻtgan yillar tajribasidan kelib chiqib, yurtimizda 20-oktyabrdan 1-dekabrgacha koʻchat yekish boʻyicha “Dolzarb 40 kunlik” eʼlon qilindi.

Qayd yetish kerakki, oʻtgan yili kuz va joriy yilning bahor oylarida mahallalarda, fermer va dehqonlarimiz dalalari chetlariga va aholi tomorqalarida 150 mingdan ziyod koʻchat ekildi. Albatta, bu savobli ishlarda koʻplab tashkilotlar, mahallalar, umuman, keng jamoatchilik qatori Siz mehnatkash dehqon va fermerlarimizning ham munosib ulushi bor.

Hurmatli fermerlar!

 “Dolzarb 40 kunlik”da Siz ham dalangiz chetidagi boʻsh yerlarga 125 700 tup tut, tok va boshqa daraxt koʻchatlari ekib “Yashil makon” umummilliy loyihasiga oʻz hissangizni qoʻshing.

Buning uchun tumanimizdagi koʻchat yetishtiruvchi fermer, dehqon xoʻjaliklarida va tomorqa yer egalarida tut, tok, tol, yongʻoq va boshqa daraxt nihollari mavjud.

Siz ular bilan hamkorlik qilsangiz, yurtimiz yashillik olamiga oʻzingizning munosib hissangizni qoʻshgan boʻlasiz.

Mehnatkash dehqonlar!

 Muhtaram Prezidentimizning alohida qarorlari bilan joriy yildan boshlab paxta-gʻalladan boʻshagan maydonlardan dehqon xoʻjaliklari uchun yer ajratilib, Sizlar shu yildan boshlab bu yerlardan daromad olishni boshladingiz.

Sizlar har bir qarich erdan unumli foydalangan holda “Bir kontur-bir mahsulot” tamoyilini amalga oshirish doirasida dala chetiga va koʻcha boshiga tut, tok va boshqa koʻchatlarini ekishni tashkil etishga chaqiramiz.

Muhtaram tomorqachilar!

Tumanimizdagi 49 ta mahalla fuqaro yigʻinlarida 39406 dan ziyod tomorqa yer egalari faoliyat yuritadi.

Natijalar hisob-kitoblarda aniq koʻrinadi. Agar har bir tomorqachi oʻz tomorqasiga, mahalla guzariga va koʻcha boshiga 10 tupdan koʻchat eksa, tumanimiz boʻyicha 394 060 tup koʻchat ekiladi. Bunday saxovatpeshalik bilan qilingan ishlaringiz tahsinga sazovor boʻladi!

Sizlarga tut, tok va boshqa koʻchatlar kerak boʻlsa joylardagi Fermer, dehqon xoʻjaliklari va tomorqa yer egalari kengashlariga murojaat etishingiz mumkin.

Ayni paytda Respublika Kengash huzuridagi “Quva ilmiy ishlab chiqarish” markazida 30 milliondan ziyod tok, tut va boshqa mevali daraxt koʻchatlari zahirasi yaratilgan, ushbu koʻchatlarni xarid qilib, mahallangiz guzariga va koʻcha boshlariga hamda tomorqangizga ekib obod qilishga chaqiramiz.

Hurmatli va aziz fermerlar, dehqonlar hamda tomorqa yer yegalari!

Sizlarni hurmatli Yurtboshimizning yuksak ishonchini oqlab, mamlakatimiz ravnaqi va farovonligiga munosib hissa qoʻshish uchun “Yashil makon” umummilliy loyihasi doirasida eʼlon qilingan “Dolzarb 40 kunlik”da faol ishtirok etib tut, tok va boshqa daraxt koʻchatlari ekishga chaqiramiz!

Bu bilan siz xalqimizga xos ezgu fazilatlarga oʻzingizning munosib hissangizni qoʻshgan boʻlasiz! Zero, nafaqat hovli va uylarimiz mana shu, mahalla, shahar va mana shu vatan ham oʻzimizniki. Uning ozodaligi va koʻrkamligiga barchamiz masʼulmiz.

Vatanimiz obodligiga oʻz hissamizni qoʻshaylik!

Amudaryo tumani fermer, dehqon xoʻjaliklari va tomorqa yer egalari kengashi