33-SONLI MAKTABDA BOShLANGʻICh SINFLAR OʻQUVChILARINI SOGʻLOM OVQATLANTIRISh MAVZUSIDA YIGʻILISh BOʻLIB OʻTDI

Oʻzbekiston Respublikasi Prezidentining 2022-yil 28-yanvardagi “2022-2026-yillarga moʻljallangan Yangi Oʻzbekistonning taraqqiyot strategiyasi toʻgʻrisida”gi Farmoni ijrosi yuzasidan Qoraqalpogʻiston Respublikasi va Xorazm viloyatining boshlangʻich sinf oʻquvchilarini bosqichma-bosqich bepul ovqat bilan taʼminlash tizimini yoʻlga qoʻyish belgilab berilgan edi. Bu haqda Oʻzbekiston Respublikasi Vazirlar Mahkamasining 2022-yil 9-fevraldagi “Qoraqalpogʻiston Respublikasi va Xorazm viloyatidagi umumiy oʻrta taʼlim muassasalarida boshlangʻich sinf oʻquvchilarini oziq-ovqat bilan taʼminlashni sifatli tashkil etish chora-tadbirlari toʻgʻrisida”gi qarori qabul qilinib, boshlangʻich sinf oʻquvchilariga bepul yengil nonushta mahsulotlari tarqatish yoʻlga qoʻyilgan edi.

Joriy oʻquv yilida Qoraqalpogʻiston Respublikasi Vazirlar Kengashida tuzilgan ishchi guruh tomonidan oʻtkazilgan tanlovda gʻolib boʻlgan 3 ta tadbirkorlik subʼektlari tomonidan tumandagi 55 ta maktabning boshlangʻich sinf oʻquvchilariga yengil nonushta mahsulotlari tarqatilmoqda. Yaqin kunlarda mavjud 85 ta maktablarning 14 ming 650 nafardan ortiq boshlangʻich sinf oʻquvchilari keytering tashkilotlari tomonidan bepul oziq-ovqat mahsulotlari bilan taʼminlanadi.

Amudaryo tumanidagi 33-sonli maktabda Oʻzbekiston Respublikasi Vazirlar Mahkamasining 2022-yil 9-fevraldagi “Qoraqalpogʻiston Respublikasi va Xorazm viloyatidagi umumiy oʻrta taʼlim muassasalarida boshlangʻich sinf oʻquvchilarini oziq-ovqat bilan taʼminlashni sifatli tashkil etish chora-tadbirlari toʻgʻrisida”gi Qarorida belgilangan vazifalarning ijrosini taʼminlash masalasi muhokamasiga bagʻishlangan yigʻilish boʻlib oʻtdi.

Yigʻilishda tuman hokimi Sultonboy Yoʻldashev, Qoraqalpogʻiston Respublikasi Joʻqorgʻi Kengesi qoʻmita raisi Dauitbay Qurboniyozov, Qoraqalpogʻiston Respublikasi Vazirlar Kengashi Raisi oʻrinbosari Abat Daniyarov, tuman hokimi oʻrinbosari Mahmud Shermetov, tumanda Ichki ishlar boʻlimi, tibbiyot muassasalari boshliqlari, autsorsing asosida oziq-ovqat mahsulotlarini yetkazib beruvchi tadbirkorlar, ovul fuqarolar yigʻini masʼullari, maktab oʻqituvchilari, ota-onalar vakillari qatnashdilar.

Yigʻilishni tuman hokimi Sultonboy Yoʻldashev ochdi hamda ishtirokchilarni kun tartibidagi masala bilan tanishtirdi. U oʻz soʻzida bugungi kunda tumandagi 55 ta maktabda boshlangʻich sinf oʻquvchilarini sifatli va sogʻlom ovqatlantirish boʻyicha yengil nonushta mahsulotlari tarqatilayotganligi, yaqin kunlarda barcha 85 ta maktablarning boshlangʻich sinf oʻquvchilari ham keytering tashkilotlari tomonidan bepul oziq-ovqat bilan taʼminlanishini aytib oʻtdi.

Buning uchun keytering tashkilotini tanlab olish Oʻzbekiston Respublikasi Xalq taʼlimi vazirligi tomonidan tasdiqlangan, texnik talablarga koʻra Oʻzbekiston Respublikasining “Davlat xaridlari toʻgʻrisida”gi Qonuniga muvofiq Qoraqalpogʻiston Respublikasi Vazirlar Kengashining ishchi guruh komissiyasi tender oʻtkazish chora-tadbirlari koʻrilayotganligini maʼlum qildi.

Kun tartibidagi masala boʻyicha Qoraqalpogʻiston Respublikasi Joʻqorgʻi Kengesi qoʻmita raisi Dautbay Qurboniyozov, Qoraqalpogʻiston Respublikasi Vazirlar Kengashi Raisi oʻrinbosari Abat Daniyarovlar oʻz fikrlarini bildirib, maktablarning boshlangʻich sinflari oʻquvchilariga oziq-ovqat mahsulotlari masʼul vazirliklar kelishuvi asosida tasdiqlangan taomnomaga muvofiq berilayotganligi, bunda mahsulotning oʻquvchilar salomatligi uchun foydali, vitaminlarga boy boʻlishiga eʼtibor qaratilganligini taʼkidladilar va bu borada ota-onalar va keng jamoatchilikning ham fikrlari soʻraldi.

Shuningdek, yigʻilishda tuman Tibbiyot birlashmasi boshligʻi Faxriddin Abdullayev, sanitariya-epidemiologik osoyishtalik va jamoat salomatligi boʻlimi boshligʻi Gulmurod Bekiyev, 33-sonli maktab direktori Hanifa Yaxshimovalar soʻzga chiqib, oʻquvchilarga oziq-ovqat mahsulotlari har kuni sifatli yetkazib berilayotganligini bildirdilar.

Yigʻilishda muhokama etilgan masala yuzasidan tegishli qarorlar qabul qilindi.

Oygul RAJABOVA.