49-sonli maktabda xorijiy tillar fan oyligi doirasida maʼnaviy-maʼrifiy tadbir oʻtkazildi

Amudaryo tuman xalq taʼlimi boʻlimiga qarashli 49-sonli umumtaʼlim maktabida noyabr – xorijiy tillar fan oyligi doirasida “Til bilgan – el biladi” deb nomlangan maʼnaviy-maʼrifiy tadbir oʻtkazildi.

Avvalo shuni alohida taʼkidlash kerakki, maktabda xorijiy tillar fan oyligini muvaffaqiyatli oʻtkazish maqsadida xorijiy tillar uslubbirlashma aʼzolari tomonidan chora-tadbirlar rejasi ishlab chiqilib, har haftada alohida mavzulashtirilgan tadbirlar, ochiq darslar, “Zakovatli bolalar” oʻyinlari, sinflararo va guruhlararo bellashuvlar tashkil etildi.

Ingliz tili oʻqituvchisi Goʻzal Saparboyeva 2-sinf oʻquvchilari ishtirokida adabiy-musiqiy tarzdagi ochiq dars tashkil etdi. Darsda oʻquvchilar oʻzlari oʻrgangan inglizcha sheʼrlarni qoʻshiq qilib kuyladilar va raqslar ijro etdilar. Bir-birlari bilan ingliz tilida suhbatlashdilar.

Shuningdek, fan oyligi doirasida rus tili oʻqituvchisi Roza Yernazarova 3-sinf oʻquvchilari ishtirokida ochiq dars oʻtkazdi. Ochiq dars jarayonida oʻquvchilarning rus tilini bilish qobiliyatlari sinovdan oʻtkazilib, aʼlochi oʻquvchilar maʼnaviy ragʻbatlantirildi. Bundan tashqari, rus tilida soʻz oʻyinlari, guruhlararo, sinflararo bellashuvlar ham oʻtkazilib, oʻquvchilarning 1-chorak davomida egallagan bilimlari yanada takomillashtirildi.

Noyabr – xorijiy tillar fan oyligining oxirgi haftasida oylik davomida oʻtkazilgan barcha tadbirlar umumlashtirildi va “Til bilgan – el biladi” deb nomlangan maʼnaviy-maʼrifiy tadbir tashkil etildi.

Mazkur tadbirni oʻtkazish uchun moʻljallangan xona maktabning xorijiy tillar uslubbirlashmasi aʼzolari tomonidan koʻrgazmali vositalar – xususan, ingliz va rus adabiyotining yetuk namoyandalari hayoti hamda ijodiy faoliyatini aks ettiruvchi suratlar, kitoblar, oʻquvchilar tomonidan tayyorlangan suratli albomlar va gullar bilan bezatildi.

Tadbirni maktab direktori Shukurboy Ayimbetov ochdi va oʻz ona tilidan tashqari, xorijiy tillarni oʻrganish insonning dunyoqarashi shakllanishida muhim ahamiyat kasb etishi, mamlakatimizda soʻnggi yillarda xorijiy tillarni oʻqitish, umumtaʼlim maktablarining xorijiy tillar boʻyicha fan xonalarini zamonaviy jihozlar, asbob-anjomlar bilan jihozlash, ayniqsa kompyuter texnologiyalari boʻyicha oʻquvchilarning savodxonligini oshirishga alohida eʼtibor qaratilayotgani haqida batafsil soʻz yuritdi.

Shundan soʻng, maktabning ingliz tili fani oʻqituvchisi Goʻzal Saparboyevaning stsenariysi asosida ingliz tilida tayyorlangan “Til bilgan – el biladi” mavzusidagi maʼnaviy-maʼrifiy tadbirning asosiy qismi boshlandi. Unda oʻquvchilar Goʻzal Saparboyeva rahbarligida Oʻzbekistonda va dunyoning turli nuqtalarida yashovchi turfa millatlarning milliy kiyimlarini kiyib chiqishdi. oʻquvchilar ingliz tilida oʻzaro muloqot qildilar. Qiziqarli savol-javob, kuy va qoʻshiqlar, tez aytishuvlarning ingliz tilida jaranglagani tadbir ishtirokchilariga oʻzgacha zavq bagʻishladi.

Tadbir davomida maktabning rus tili fani oʻqituvchilari Roza Yernazarova hamda Oʻrozboy Aliyevlar tomonidan tayyorlangan, rus tilini mukammal oʻrganayotgan oʻquvchi-yoshlar ishtirokidagi “Rus dunyosiga sayohat” mavzusidagi fan oyligiga bagʻishlangan maʼnaviy-maʼrifiy va adabiy-musiqiy kecha ham tashkil etildi.

Mazkur musiqiy kechada oʻquvchilar oʻz ustozlari Ruslan Bozorboyev, Oʻrozboy Aliyev, Barno Allamberganova, Umida Ayimbetovalar bilan birgalikda rus tilida qiziqarli oʻyinlar tashkil etdilar.

Rus adabiyotining yetuk namoyandalari asarlari haqida fikr yuritishib, ularning mashhur sheʼr va hikoyalaridan aytib berdilar. Rus xalq qoʻshiqlari, raqslarini ijro etishib, barchaning olqishlariga sazovor boʻldilar. Ayniqsa, 2-sinf oʻquvchilari tomonidan ijro etilgan inglizcha qoʻshiq va raqslar, 5-6-7-sinflar oʻquvchilari tayyorlab kelgan ingliz shoirlarining sheʼrlari, 8-sinf qizlari ijrosidagi rus xalq raqsi, 7-sinf oʻquvchi-qizlar talqinidagi inglizcha raqs tadbir ishtirokchilariga oʻzgacha zavq bagʻishladi.

Robiya YOʻLDOShEVA.