2022-yilning 9 oyini tuman mahalliy byudjeti 56 mlrd 322,8 mln soʻm daromad bilan yakunladi

5-dekabr kuni Amudaryo tuman hokimligi majlislar xonasida Xalq deputatlari tuman Kengashining mahalliy byudjet, iqtisodiy islohotlarni amalga oshirish, investitsiyalar va tadbirkorlikni rivojlantirish masalalari boʻyicha doimiy komissiyasining yigʻilishi boʻlib oʻtdi.

Yigʻilishda Qoraqalpogʻiston Respublikasi Joʻqorgʻi Kengesi, xalq deputatlari Amudaryo tuman Kengashi deputatlari, hokimlik maʼsul xodimlari, korxona, tashkilotlar va ovul, mahalla fuqarolar yigʻinlari raislari, ommaviy axborot vositalari xodimlari ishtirok etdi.

Yigʻilishda “Amudaryo tumani mahalliy byudjetining 2022-yil 9 oyi davomidagi ijrosi toʻgʻrisida”gi masala koʻrib chiqildi.

Kun tartibidagi masala yuzasidan tuman moliya boʻlimi mudiri oʻrinbosari Abay Sagʻinbayev hisobot berdi. Hisobotda taʼkidlanishicha, tuman mahalliy byudjetining daromadlar qismi rejasi 52 mlrd 749,3 mln soʻmga belgilangan boʻlib, xaqiqatda 56 mlrd 322,8 mln soʻmga, yaʼni 106,8 foizga bajarilgan. Bu rejaga nisbatan 3 mlrd 573,5 mln soʻmga ortiq deganidir.

2022-yil 9 oyi davomida byudjet xarajatlari rejasi kiritilgan oʻzgarishlardan keyin jami 214 mlrd 759,4 mln soʻmni tashkil qilgan. Hisobot davrida byudjet hisobidan jami 213 mlrd 77,9 mln soʻmlik mablagʻlar sarflangan.

Jumladan, qishloq xoʻjaligi va obodonlashtirish sohasiga jami 14,2 mlrd soʻm sarf qilingan. Bu jami byudjet xarajatlari hajmining 6,6 foizini tashkil qiladi. Maktabgacha taʼlim sohasiga jami 15,2 mlrd soʻm, yoki jami byudjet xarajatlari hajmining 7,12 foizi, taʼlim sohasiga esa 8,8 mlrd soʻm, yoki jami byudjet xarajatlarining 4,11 foizi sarflangan.

Bundan tashqari, madaniyat va sport sohasiga jami 4,33 mlrd soʻm, sogʻliqni saqlash sohasiga jami 63,3 mlrd soʻm, ijtimoiy taʼminot sohasiga jami 79,2 mlrd soʻm mablagʻ sarflangan. Shuningdek, ijtimoiy qoʻllab-quvvatlash jamgʻarmasi, “Yoshlar daftari” va “Ayollar daftari” xarajatlari uchun jami 595 million 200 ming soʻm sarf-xarajat qilingan.

Davlat boshqaruv organlarini saqlash uchun salkam 11 mlrd soʻm sarflangan. Bu jami byudjet xarajatlari hajmining 5,15 foizini tashkil qiladi. Shuningdek, fuqarolarning oʻzini oʻzi boshqarish organlari sohasiga jami 3,7 mlrd soʻm, zaxira jamgʻarmasi mablagʻari uchun jami 1,8 mlrd soʻm, fuqarolar tashabbusli jamgʻarmasi mablagʻlari uchun 10,2 mlrd soʻm, boshqa xarajatlar uchun esa 849 mln 445 ming soʻm sarf-xarajat qilingan.

Xalq deputatlari Amudaryo tuman Kengashining va tuman xokimining tegishli qaror va farmoyishlari asosida byudjet mablagʻlari tasdiqlangan rejasidan tashqari yil boshidagi erkin qoldiq mablagʻlari hisobidan jami 764 mln 989 ming soʻm sarflangan. Qoraqalpogʻiston Respublikasi va tuman mahalliy byudjetlari daromadlar rejasining ortiqcha bajarilgan qismi mablagʻlari hisobidan esa jami 4 mlrd 41,9 mln soʻm sarflangan.

Yigʻilishda tuman mahalliy byudjetining 9 oyi davomidagi ijrosi yuzasidan deputatlar va doimiy komissiya yigʻilishi ishtirokchilari oʻz fikr va mulohazalarini bildirib, savollar bilan murojaat qildilar va tegishli javoblar oldilar.

Oygul Rajabova