Hokim va yoshlar uchrashuvida yoshlarning qiziqishlari, takliflari, muammolari oʻrganildi

Zamonaviy bilim va koʻnikmalarga ega, mamlakatning munosib kelajagi uchun javobgarlikni oʻz zimmasiga ola biladigan barkamol, maqsadga intiluvchan va sergʻayrat yoshlarni tarbiyalash mamlakatni barqaror va ildam rivojlantirishning eng muhim shartidir.

Soʻnggi yillarda yoshlarning intellektual va ijodiy salohiyatini namoyon qilish, ularning fuqarolik javobgarligini va olib borilayotgan islohotlarga daxldorligini oshirish borasida ulkan ishlar amalga oshirildi.

Shu bilan birga, joylarda yoshlarning ijtimoiy-iqtisodiy muammolarini xal qilishga, yosh tadbirkorlarning istiqbolli gʻoyalari va loyihalarini roʻyobga chiqarishga, shuningdek, shu asosda yoshlar bandligini taʼminlashga ham alohida ahamiyat berilib bu saʼy-harakatlar oʻzining ijobiy natijasini koʻrsatmoqda.

Hududlarda yoshlar hayotida uchrayotgan muammolarni tizimli hal qilish maqsadida muntazam ravishda oʻtkazilib kelinayotgan “Hokim va yoshlar uchrashuvi” ham ana shu maqsadlarga qaratilgani bilan ahamiyatlidir.

22-dekabr kuni Qipchoq ovul fuqarolar yigʻini binosida tuman hokimining yoshlar bilan navbatdagi uchrashuvi boʻlib oʻtdi. Unda tuman hokimi Sultonboy Yoʻldashev, tuman Xalq qabulxonasi mudiri Erkin Rajabov, Yoshlar ishlari agentligi tuman boʻlimi boshligʻi Sardor Ismailov hamada ovulning 30 ga yaqin faol yoshlari ishtirok etishdi.

Tuman hokimi yoshlarga murojaat qilib, yakunlanayotgan yilda erishilgan muvaffaqiyatlar hamda 2023-yilda tumanni ijtimoiy-iqtisodiy rivojlantirishga doir istiqbolli rejalar xususida toʻxtalib oʻtdi.

Taʼkidlanganidek, yoshlarning biznes tashabbuslari, START-UPlari, gʻoyalari va loyihalarini roʻyobga chiqarishga koʻmaklashish va qoʻllab-quvvatlash, band boʻlmagan yoshlarni mehnat bozorida talab yuqori boʻlgan mutaxassisliklar va biznes yuritish koʻnikmalariga oʻqitish, umuman yoshlarning ijtimoiy-iqtisodiy faolligini oshirish borasidagi yangidan yangi rejalar amalga oshiriladi.

Uchrashuv davomida yoshlar oʻzlarini qiziqtirgan savol va takliflar bilan tuman hokimiga murojaat qilishdi.

Yoshlardan 1 nafari safarbarlik chaqiruv rezervi badalini toʻlashda, Oliy taʼlim muassasasida taʼlim olayotgan talaba esa kontrakt toʻlovining 50 foizini toʻlashda amaliy yordam soʻrab murojaat qilgan boʻlsa, yoshlardan yana bir nafari subsidiya asosida tikuv mashinasi berilishi boʻyicha amaliy yordam soʻrab murojaat qildi.

Yoshlarning murojaati shu yerning oʻzida ijobiy hal qilindi.

Murojaat egalariga tez orada safarbarlik chaqiruv rezervi badali va kontrakt toʻlovi qoplab berilishi maʼlum qilindi. Bu boʻyicha Yoshlar ishlari agentligi tuman boʻlimi boshligʻi Sardor Ismailovga topshiriqlar berilib, ijrosi nazoratga olindi.

Uchrashuv yakunida tuman hokimi 2023-yilning “Insonga eʼtibor va sifatli taʼlim yili” deb eʼlon qilinishi yoshlar hayotida yangidan yangi sahifalar ochishini hamda taʼlim tizimida katta oʻzgarishlar roʻy berishini aytib, yoshlarni bilim olishga, mehnat qilishga, oʻz ustida muntazam ravishda ishlashga chorladi.

Tuman hokimligining Axborot xizmati