HAR QANDAY DAVLATNING TARAQQIYoTINI TAʼLIM SIFATI BELGILAYDI

Jonajon yurtimizda har bir fuqaro jinsi, irqi, millati, tili, dini, va ijtimoiy mavqeidan qatʼiy nazar, taʼlim olish huquqiga egadir. Bu bosh Qomusimizda kafolatlab qoʻyilgan. Taʼlim tizimi yagona va uzluksiz boʻlib, ular biri-birini toʻldirib turadi.

Jumladan, taʼlimning poydevori boʻlgan maktabgacha taʼlim va tarbiya bolalarni oʻqitish va tarbiyalashga, ularni intellektual, maʼnaviy-axloqiy, estetik va jismoniy jihatdan rivojlantirishga, shuningdek, umumiy oʻrta taʼlimga tayyorlashga xizmat qiladi.

Amudaryo tumanida 128 ta maktabgacha taʼlim tashkiloti mavjud boʻlib, shundan 51 tasi davlat, 4 tasi davlat-xususiy sherikchilik asosidagi hamda 73 tasi oilaviy nodavlat MTTlaridir.

Tumanda bolalarni maktabgacha taʼlim tizimiga qamrov darajasini yanada oshirish, maktabgacha taʼlim muassasalarini yangidan barpo etish, eskilarini rekonstruktsiya qilishga alohida ahamiyat berilmoqda. 2022-yil davomida 5 ta, yaʼni 8-, 18-, 33-, 44-, 47-sonli MTTlarida joriy taʼmirlash ishlari amalga oshirildi.

 Shuningdek, tadbirkorlarni jalb qilgan holda 11 ta oilaviy nodavlat MTTlari tashkil qilindi.

Tumanimizda 3 yoshdan 7 yoshgacha boʻlgan bolalar 16 841 nafar boʻlib, ularning 11 949 nafari, yaʼni 71 foizi MTTlarga qamrab olingan.

Yil yakuniga qadar investitsiya dasturi asosida Yuqori qishloq mahallasida rekonstruktsiya qilinayotgan 28-sonli MTT filialiga 120 nafar, Choykoʻl ovuli hududidagi hamda Oybek nomli mahalladagi oilaviy nodavlat MTTlarga 75 nafar bolalarni qamrab olish rejalashtirilgan.

 2022-yil davomida tumanda maktabgacha taʼlimning uzviy davomi boʻlgan umumiy oʻrta taʼlimni yuqori bosqichga olib chiqish, taʼlim sifatini yuksaltirish, oʻqituvchilar malakasini oshirish, taʼmirtalab maktablarni rekonstruktsiya qilish borasida koʻplab samarali ishlar amalga oshirildi.

Jumladan, yil davomida investitsiya dasturi doirasida Qipchoq ovuli hududidagi 18-sonli maktab binosi, Chordara mahallasi hududidagi 36-sonli maktab binosi, Boy ovul mahallasi hududidagi 56-sonli maktab, binosi rekonstruktsiya qilinib, foydalanishga topshirildi.

Mazkur yilda investitsiya dasturi doirasida 3 ta maktab qayta taʼmirlangan boʻlsa, Prezidentining 2022-yil 23-24-fevral kunlari Qoraqalpogʻiston Respublikasiga tashrifi davomida berilgan topshiriqlar ijrosini taʼminlash maqsadida yana 3 ta maktab joriy taʼmirdan chiqarildi.

Shuningdek, “Obod qishloq” dasturi doirasida Ayoqchi mahallasi hududidagi 69-sonli maktab binosi mukammal taʼmirlandi.

2022-yilda Prezident taʼlim muassasalari agentligi tizimidagi Amudaryo tuman ixtisoslashtirilgan maktabining ish boshlashi quvonchli voqea boʻldi.  Ushbu taʼlim maskanida aniq va tabiiy fanlar yoʻnalishlarida 16-sinfda 384 nafar oʻquvchi taʼlim olmoqda. Ularga oliy toifali, yuqori malakali 34 nafar pedagoglar taʼlim-tarbiya berishmoqda.

Umumtaʼlim maktablarining 9-sinf bitiruvchilarini kasbga oʻrgatish, ularning bandligini taʼminlash masalasiga ham alohida eʼtibor berib kelinmoqda.

Bugungi kunda Qipchoq ovuli hududidagi 1-sonli kasb-hunar maktabida 304 nafar oʻquvchi 11 ta kasb mutaxassisliklari boʻyicha taʼlim-tarbiya olmoqdalar. 2021-2022-oʻquv yilida kasb-hunar maktabini 4 ta mutaxassislik boʻyicha 118 nafar oʻquvchilar bitkazishdi. Shundan 16 nafar oʻquvchi oliy taʼlim muassasasi talabasi boʻldi. Qolgan oʻquvchilar oʻz kasbi boʻyicha tadbirkorlik faoliyatini yoʻlga qoʻydilar.

Mangʻit shahrining Doʻstlik mahallasi hududidagi 2-sonli kasb-hunar maktabida 424 nafar oʻquvchi taʼlim-tarbiya olmoqda. Ularga 24 nafar malakali oʻqituvchi va 13 nafar ishlab chiqarish taʼlimi ustalari taʼlim-tarbiya berib kelishmoqda.

Kasb-hunar maktabida avtomobillarga texnik xizmat koʻrsatish va taʼmirlash, yoʻl harakati qoidalari, payvandlovchi, gaz va suv tizimlarini taʼmirlash, tikuvchilik, elektrotexnika jihozlarini taʼmirlash, oshpaz va qandolatchilik, ustaxonalari mavjud boʻlib, oʻquvchi-yoshlar malakali ustozlaridan olgan bilim va koʻnikmalarini ustaxonalarda amaliyotda qoʻllab, oʻz tajribalarini oshirmoqdalar. Tumandagi umumtaʼlim va kasb-hunar maktablarida oʻquvchilarning bilim olishi, kasb-hunar egallashlari uchun barcha sharoit va imkoniyatlar yaratilgan.

Tuman Xalq taʼlimi boʻlimi tizimidagi umumtaʼlim maktablarida 4064 nafar oʻqituvchi 38 476 nafar oʻquvchiga oʻzlarining bor bilimlarini berib kelishmoqda. Oʻqituvchilarning 185 nafari oliy, 642 nafari birinchi, 1239 nafari ikkinchi toifali hamda 1790 nafari oliy maʼlumotli mutaxassislardir. Ustozlardan olingan bilim va koʻnikmalar asosida 2021-2022 oʻquv yilida 2 572 nafar bitiruvchining 589 nafari oliy taʼlim muassasalariga oʻqishga kirishdi.

Taʼlimga berilayotgan eʼtibor natijasida tumandagi Xalq taʼlimi boʻlimiga qarashli umumtaʼlim maktablari Oʻzbekiston Respublikasi boʻyicha milliy reytingda 200 ta  tuman ichida 110-oʻrinni, Qoraqalpogʻiston Respublikasidagi barcha tumanlar ichida 5-oʻrinni egalladi. 

Maktabdan tashqari taʼlim samaradorligini oshirish maqsadida tashkil qilingan “Barkamol avlod” bolalar maktabi ham samarali tarzda faoliyat yuritib kelmoqda. Maktabga 1 668 nafar oʻquvchi qamrab olingan. Maktabda “Madaniyat va sanʼat”, “Texnika, konstruktorlik va modellashtirish”, “Jismoniy  tarbiya va  sport”, “Hunarmandchilik va qoʻl mexnati”, “Turizm va ekologiya” hamda “Oliy taʼlim muassasalari va maktabga tayyorlov” yoʻnalishlari boʻyicha 66 toʻgarak faoliyati yoʻlga qoʻyilgan. Oʻquvchilar mazkur toʻgaraklarda maktabdan tashqari boʻsh vaqtlarini mazmunli oʻtkazmoqdalar.

Bugungi kunda koʻplab rivojlangan davlatlarning taraqqiyotini oʻsha mamlakat oʻquvchilariga berilayotgan taʼlim sifatiga bogʻlashadi. Yuqori saviyaga, sifatli bilimga ega boʻlgan insonlar jamiyatning iqtisodiy, ijtimoiy va siyosiy oʻsishi, rivojlanishini taʼminlaydigan islohotlarni amalga oshirib, jamiyat taraqqiyotiga hissa qoʻshadilar.

Tumanimizda yakunlanayotgan yilda amalga oshirilgan taʼlim sohasidagi samarali ishlar yuqoridagi ezgu maqsadlarni amalga oshirishga xizmat qilishi shubhasiz. 

F.EShIMBETOVA.