AMUDARYo TUMANI MADANIYaT BOʻLIMINING YIL SARHISOBI BOʻYIChA YIGʻILISh BOʻLIB OʻTDI

Tuman Madaniyat boʻlimining 2022-yil davomidagi faoliyati yuzasidan hisobot va kelgusi yilgi rejalariga bagʻishlangan yigʻilish oʻtkazildi.

2023-yil 9-yanvar kuni boʻlib oʻtgan yigʻilishga Amudaryo tumani Madaniyat boʻlimi mudiri Ikrom Siytimov raislik qildi. Yigʻilish kun tartibidagi birinchi masalaga koʻra, Prezidentimizning  2022-yil 2-fevraldagi  “Madaniyat va saʼnat sohasini yanada rivojlantirishga doir qoʻshimcha chora-tadbirlar toʻgʻrisida”gi Qaroridagi madaniyat va  sanʼat sohasidagi  isteʼdodli yosh ijodkorlarni izlab topish va qoʻllab-quvvatlash, 2022-2026-yillarga moʻljallangan Yangi Oʻzbekistonning taraqqiyot strategiyasidagi  har bandining mazmun-mohiyati, maqsadi yoshlarni madaniyat va sanʼatga boʻlgan qiziqishini yanada oshirish va estetik ruhda  tarbiyalashda  ushbu sohada  faoliyat yuritayotgan har bir mutaxassis yanada faol va shijoat bilan mehnat qilishi kerakligi uqtirildi. Shuningdek, tumanda  madaniyat va sanʼat sohasini yanada rivojlantirish, uning jamiyat hayotidagi oʻrni va taʼsirini oshirish boʻyicha olib borilayotgan ishlarni muhokama qilindi. Milliy madaniyatimizni rivojlantirishda sohani sifat jihatidan yangi bosqichga olib chiqish boʻyicha tizimli islohotlarni amalga oshirish lozimligi taʼkidlandi.

Yigʻilish kun tartibidagi ikkinchi masala yuzasidan I.Siytimov bugungi kundagi dolzarb mavzu boʻlgan korruptsiyaga qarshi kurash boʻyicha ham maʼruza qildi. Korruptsiya xavfli jinoyat ekanligi, bu illatga qarshi kurashish barchaning ishi boʻlishi zarurligini, bu boʻyicha aholining huquqiy ongi va huquqiy madaniyatini yuksaltirish, jamiyatda korruptsiyaga nisbatan murosasiz munosabatni shakllantirish boʻyicha zarur tadbirlar, targʻibot-tashviqot ishlarini olib borish lozimligini aytib oʻtdi. Har bir xodim oʻz vazifasini sidqidildan bajarishi noqonuniy illatlarga chek qoʻyishi odob-axloq qoidalariga rioya etib, madaniyatli shaxsga aylanish davri kelganligini alohida gapirib oʻtdi.

Shundan keyin kasaba uyushmasi boshlangʻich tashkiloti raisi N.Eshchanova soʻzga chiqib, oʻtgan yil davomidagi kasaba uyushmasi tomonidan amalga oshirilgan ishlar toʻgʻrisida gapirdi. Kasaba uyushma aʼzolariga erishilgan yutuqlar, natijalar hisobotini berdi. Tashkilotda kasaba uyushma juda koʻp ijobiy ishlar yoʻlga qoʻyilganligi, madaniy-maʼrifiy, sport tadbirlari muntazam reja asosida  oʻtkazilganligi, xodimlar va ularning farzandlarini sogʻlomlashtirish ishlari amalga oshirilganligini aytib oʻtdi. N.Eshchanova boʻlimdagi ijodiy faoliyatni yanada oshirish maqsadida Madaniyat markazi Nizomida belgilangan bandlariga asosan uslubiy kengash, badiiy kengash, boʻlim kengashi tarkibini tuzish boʻyicha taklif va tavsiya berdi. Bu xususda fikr-mulohazalar tinglandi hamda jamoa tomonidan bir ovozdan maʼqullandi.

Yigʻilish davomida boʻlim hisobchisi S.Qoʻchqorovaning hisoboti tinglandi. Xoʻjalik ishlari boʻyicha mudira G.Sultanova soʻzga chiqib, moddiy-texnik bazani boyitishdagi muhim masala hamda kelgusida qilinadigan ishlar toʻgʻrisida oʻz fikrini bildirdi. Ijro intizomi boʻyicha D.Xolmurodova Qoraqalpogʻiston Respublikasi Madaniyat vazirligining 2022-yil 23-noyabrdagi “Odob-axloq qoidalarini tasdiqlash” toʻgʻrisidagi tegishli buyrugʻining ijrosini taʼminlash yuzasidan maʼlumot berdi.

Undan tashqari, yigʻilishda 2022-yil davomida eng yaxshi faoliyat koʻrsatgan Qangli madaniyat markazi tuman Madaniyat boʻlimi rahbari tomonidan qimmatbaho sovgʻa bilan ragʻbatlantirildi. Qangli madaniyat markazi toʻgarak rahbarlariga Qoraqalpogʻiston Respublikasi Madaniyat vazirligi tomonidan taqdim etilgan milliy cholgʻular, musiqa darsliklari, toʻgaraklar faoliyati uslubiy qoʻllanmalari ham topshirildi. Ishchi-xodimlar esa mehnat qilish uchun qulay shart-sharoit yaratish maqsadida zarur anjomlar bilan taʼminlandi.

Yigʻilish yakunida kun tartibidagi masalalar boʻyicha tegishli qarorlar qabul qilindi.

Nasiba Eshchanova.