Harbiylar kasb bayramini yangi uyda nishonlaydi

Davlatimiz rahbarining 2017-yil 30-martdagi “Oʻzbekiston Respublikasi Mudofaa vazirligining harbiy xizmatchilari uchun uy-joylar qurish dasturi” toʻgʻrisidagi qarori Vatan himoyachilarining yashash sharoitini tubdan yaxshilash va ularning oila aʼzolarini munosib qoʻllab-quvvatlashga xizmat qilmoqda.

Dasturga muvofiq, 10-yanvar kuni Amudaryo tumanining Qilichboy ovul fuqarolar yigʻini hududida joylashgan Davlat xavfsizlik xizmati chegara qoʻshinlariga qarashli 92-02 harbiy qismda hizmat qilayotgan harbiy xizmatchilarga 4 qavatli jami 24 xonadondan iborat uyning kalitini topshirish marosimi boʻlib oʻtdi.

Shu munosabat bilan oʻtkazilgan tadbirda tuman hokimi Sultonboy Yoʻldashev, Mudofaa vazirligi, Shimoliy-Gʻarbiy harbiy okrug va tuman Mudofaa boʻlimi, harbiy qism masʼullari hamda xizmatchilari, ularning oila aʼzolari, fuqarolar yigʻini masʼullari ishtirok etishdi.

Tadbirda soʻzga chiqqanlar mamlakatimiz Qurolli Kuchlarida amalga oshirilayotgan islohotlar milliy armiyamizning jangovar salohiyatini yuksaltirish, harbiy xizmatchilar va ularning oila aʼzolari uchun zamonaviy sharoitlar yaratishda muhim omil boʻlayotganini alohida taʼkidlashdi.

Shuningdek, Qurolli Kuchlarimizni zamonaviy qurol-aslaha, zarur texnikalar bilan taʼminlash, harbiy xizmatchilarning jangovar shayligini oshirish barobarida ijtimoiy jihatdan qoʻllab-quvvatlash, ularni uy-joy va maishiy sharoitlarini yaxshilashga alohida eʼtibor qaratilayotganini mamnuniyat bilan eʼtirof etishdi.

 Shinam, barcha qulayliklarga ega boʻlgan yangi uyning Vatan himoyachilari kuni oldidan harbiylar oilalariga topshirilishi yurtimizni koʻz qorachigʻidek asrab kelayotgan Vatan himoyachilariga va ularning oila aʼzolariga oʻzgacha tuhfa boʻldi. Zero, Vatan himoyachisining uyidan koʻngli toʻq boʻlsa, hirbiy xizmat burchini har qachongidan ham aʼlo darajada oʻtaydi.

Yangi xonadon egasiga aylangan harbiy xizmatchilar Vatan posbonlarini ijtimoiy qoʻllab-quvvatlash borasida koʻplab samarali ishlar amalga oshirilayotganini taʼkidlab, davlatimiz rahbariga oʻzining chuqur minnatdorliklarini bildirdi. Qolaversa, bayramni oila aʼzolari bilan yangi uyda nishonlashini, bundan ayniqsa farzandlari hursandligini aytib oʻtdi.

“Mang‘it invest maksimum” masʼuliyati cheklangan jamiyati tomonidan 7,5 mlrd. soʻm mablagʻ evaziga qurib bitkazilgan mazkur uyning barcha sharoitlarga egaligi, ijtimoiy soha obʼektlariga yaqin va qulay hududda joylashganidan harbiylar mamnun boʻlishdi.

Tadbir davomida mehmonlar yangi xonadonlarga ega boʻlgan harbiy xizmatchilarning uylariga kirib, ularga oilaviy baxt va omad tilashdi.

Qilichboy ovuli hududida joylashgan Davlat xavfsizlik xizmati chegara qoʻshinlarining harbiy xizmatchilari ona Vatanimiz sarhadlarini qoʻriqlab, mustaqil diyorimizda tinchlik va osoyishtalikning barqaror boʻlishiga oʻz hissalarini qoʻshib kelmoqdalar. Biz esa harbiylarimizning mashaqqatli va shu bilan birga sharafli boʻlgan mehnat faoliyatlariga omad va zafarlar tilab qolamiz.

Tuman hokimligining Axborot xizmati.