SAYYoR QABULDA UYShINLIKLARNING MUROJAATLARI TINGLANIB, MUAMMOLARI OʻRGANILDI

Uyshin mahallasida tuman hokimi, 1-sektor rahbari Sultonboy Yoʻldashevning sayyor qabuli boʻlib oʻtdi. 12-yanvar kuni mahalla fuqarolar yigʻini binosida boʻlib oʻtgan sayyor qabulda Prezidentning tumandagi Xalq qabulxonasi boʻlimi mudiri Erkin Rajabov, Yoshlar ishlari agentligi tuman boʻlimi boshligʻi Sardor Ismailov hamda fuqarolar yigʻini masʼullari, faollari va 30 nafarga yaqin fuqarolar ishtirok etishdi.

Tadbirni Prezidentning tumandagi Xalq qabulxonasi boʻlimi mudiri Erkin Rajabov ochib berdi va xalq bilan yaqin boʻlish, muammolarini oʻrganib, yordam koʻrsatish maqsadida sayyor qabul va turli uchrashuvlar oʻtkazilayotganini, bu oʻzining ijobiy samarasini berayotganini aytib oʻtdi.

Tuman hokimi Sultonboy Yoʻldashev ham hududlarni ijtimoiy-iqtisodiy rivojlantirish borasida olib borilayotgan ishlar xususida soʻzlab, xalq orasida boʻlish, aholi bilan yuzma-yuz muloqot qilish, ularning dard-u tashvishlarini tinglash, muammolarni oʻrganish va ularni bartaraf etish, mahallabay tizimida ish yuritish kabilar Davlatimiz rahbari tomonidan tashkil etilgan sektorlar va boshqa mutasaddi idoralar rahbarlari zimmasidagi asosiy vazifa ekanligini taʼkidladi.

Shuningdek, Prezidentimizning “2022-2023-yillarda mahallalar infratuzilmasini yanada yaxshilash boʻyicha qoʻshimcha chora-tadbirlar toʻgʻrisida”gi Qaroriga asosan tumanimizning barcha hududlarida aholini qiynayotgan muammolarni bartaraf etish va infratuzilmani rivojlantirish maqsadida pul mablagʻlari ajratilishi belgilanganligi, ajratilgan mablagʻlarni sektor hududidagi ovul va mahallalarda bosqichma-bosqich ichki yoʻllarni taʼmirlash, fuqarolar yigʻini maʼmuriy binolari va sport maydonchalarini yangidan qurish, elektr tarmoqlarini tortish kabilarga sarflash rejalashtirilganini aytib oʻtdi.

Qabul davomida soʻzga chiqqan mahalladagi hokim yordamchisi va yoshlar yetakchisi aholi turmushini yaxshilash, ayniqsa, yurtimiz kelajagi boʻlgan yoshlarni har tomonlama qoʻllab-quvvatlash, ularning orzu-maqsadlarini roʻyobga chiqarishlariga imkoniyat yaratishga doir masalalarga ham alohida eʼtibor qaratilayotganini gapirib, bu borada hududda bajarilgan amaliy ishlar xususida maʼlumot berib oʻtishdi.

Mavjud muammolarni aniqlash, ularni bevosita joyida bartaraf etish yuzasidan aniq va tezkor choralar koʻrish maqsadida oʻtkazilgan sayyor qabulda fuqarolardan turli masalalar yuzasidan murojaatlar kelib tushdi. Murojaatlar asosan moddiy yordam, farzandining oliy taʼlimda oʻqishi uchun kontrakt puli, bola puli, kadastr hujjatlari, subsidiya asosida tikuv mashinasi berish, muddatli harbiy xizmatni oʻtash uchun badal pulini qoplashga koʻmaklashish kabi masalalarda boʻldi.

Murojaatlarga koʻra mahalla fuqarolari Adolat Tursunboyevaga oliy taʼlimda oʻqishi uchun kontrakt pulini toʻlashda, Nazira Sitboyevaga subsidiya asosida tikuv mashinasini olishda, Qahramon Hayitboyevga muddatli harbiy xizmatni oʻtash uchun badal pulini qoplashda koʻmaklashiladigan boʻldi. Murojaatlar ijrosini tuman hokimi oʻz nazoratiga oldi.

Sektor rahbari hudud aholisini qiynab kelayotgan muammolarni bartaraf etish, kerakli choralarni koʻrish boʻyicha ham tegishli mutasaddilarga aniq topshiriqlar berdi.

O.Xudoyberganova.