Amudaryo tumanida Xalqaro xotin-qizlar kuni keng nishonlandi

Ayolning nafosati va nazokati, aql-zakovati va fidoyiligi asrlar mobaynida hayot davomiyligi va abadiyligiga asos boʻlib keladi. Shu bois ham dunyodagi eng buyuk sanʼat asarlari, qoʻshiq va qasidalar, meʼmoriy obidalar ayollar shaʼniga bagʻishlangandir.

Oila va jamiyat ustuni, hayot fayzi va koʻrki boʻlgan xotin-qizlarni eʼzozlash, hurmat va ehtirom koʻrsatish buyuk qadriyatdir. Ayollar bilan olam munavvar, hayotimiz goʻzal va mazmunli, xonadonlarimiz obod va nurafshon boʻlib, umrimiz fayz va nurga toʻladi.

7-mart sanasida Xalqaro xotin-qizlar bayrami Amudaryo tumanida ham koʻtarinki ruhda nishonlandi. Sana munosabati bilan “Xon” restoranida boʻlib oʻtgan katta tadbirda tumanimizda turli sohalarda samarali mehnat qilayotgan ayollar, oʻz hayotiy tajribasi asosida yoshlar tarbiyasiga, oilalar mustahkamligiga munosib hissa qoʻshayotgan nuroniy onaxonlar, umidli, iqtidorli qizlar ishtirok etdilar.

 “Muqaddas ayol” deb nomlangan ushbu bayram tadbirida tuman hokimi Sultonboy Yoʻldashev barcha ayol-qizlarni bayram bilan samimiy qutlab, oʻzining eng ezgu tilaklarini izhor etdi.

 Tuman hokimi oʻz tabrik nutqida jamiyatning ijtimoiy-siyosiy hayotida ayollarning roli katta ekanligini, ular har jabhada samarali mehnat qilib, Vatanimiz taraqqiyotiga hissa qoʻshib kelayotganligini eʼtirof etib oʻtdi.

Samimiy tabriklardan soʻng navbat tuman Madaniyat boʻlimiga qarashli muassasalar sanʼatkorlariga berildi.

Tuman hokimligi va Madaniyat boʻlimi hamkorligida tashkillashtirilgan tadbirda faol ayol-qizlar toʻkin dasturxon atrofida diltortar qoʻshiqlar tinglab, goʻzal raqslar tomosha qilishdi. Shuningdek, tadbir ishtirokchilari tumanimizning yosh estrada xonandalari ijrosidagi shoʻx qoʻshiqlarga raqsga tushib, madaniy hordiq oldilar.

Ayol muqaddasligini, fidoyiligi, matonati va mehri ummonligini madh etuvchi sheʼrlar, qoʻshiqlar mehmonlarga juda manzur boʻldi.

 “Muqaddas ayol” deb nomlangan musiqiy dastur tomoshasi va oʻzlariga koʻrsatilayotgan hurmat va eʼtibor barcha ayol-qizlarga olam-olam quvonch va iftixor baxsh etdi.

Tuman hokimligining Axborot xizmati.