OʻZBEKISTON ChEMPIONLARIGA ESDALIK SOVGʻALARI TOPShIRILDI

Soʻnggi yillarda jismoniy tarbiya va sportni rivojlantirish, shu orqali oʻsib kelayotgan yosh avlodni barkamol qilib voyaga yetkazish, yot gʻoyalardan, zararli illatlardan asrashga alohida eʼtibor qaratilmoqda. Shu maqsadda mamlakatimizning barcha hududlarida boʻlgani kabi Amudaryo tumanida sport inshootlari, maydonchalari bunyod etilib, sportning ommaviyligini taʼminlash borasida saʼy-harakatlar olib borilayotir. Natijada tumanimiz yoshlari orasidan sportning barcha turlari boʻyicha nufuzli musobaqalar gʻoliblari yetishib chiqayapti.

16-19-fevral kunlari Toshkent shahrida sportning qoʻl jangi turi boʻyicha erkaklar, ayollar va kichik oʻsmirlar oʻrtasida oʻtkazilgan Oʻzbekiston chempionatida tuman Bolalar-oʻsmirlar sport maktabi tarbiyalanuvchisi, 73-sonli umumiy oʻrta taʼlim maktabi oʻquvchisi Elbek Yoʻldoshev 62 kilogramm vazn toifasida ishtirok etib, faxrli 3-oʻrinni egalladi.

9-11-mart kunlari Samarqand viloyatida sportning qoʻl jangi turi boʻyicha oʻsmirlar va professional sportchilar oʻrtasida oʻtkazilgan Oʻzbekiston chemionatida 15-sonli umumiy oʻrta taʼlim maktabi oʻquvchisi Aziza Sotiboldiyeva 53 kilogramm vazn toifasida, 83-sonli maktab oʻquvchisi Lobar Jumaboyeva esa 58 kilogramm vazn toifasida ishtirok etishib, gʻoliblikni qoʻlga kiritdilar va tumanimiz sport sharafi yuksalishiga munosib hissa qoʻshdilar.

Yaqinda tuman Xalq taʼlimi boʻlimi mudiri Iboyim Rajabov, Yoshlar ishlari agentligi tuman boʻlimi boshligʻi Sardor Ismoilov va Bolalar-oʻsmirlar sport maktabi direktori Chorsham Tojimurodovlar gʻolib oʻquvchilar taʼlim olayotgan muassasalarda boʻlishib, ularni gʻalaba bilan qutlab, esdalik sovgʻalarini topshirishdi.

83-maktab binosi oldi bayramona bezatilgan. Yigʻilgan maktab oʻqituvchilari, oʻquvchilari, chempion oʻquvchining ota-onasi, yaqinlarini maktab badiiy havaskorlari dilrabo kuy-qoʻshiqlar, raqslar bilan xushnud etishyapti.

Aziz mehmonlar tashrifi ularga yana ham koʻtarinki kayfiyat bagʻishladi. Tantanani maktab direktori Dilafroʻz Ismoilova ochdi va Lobar Jumaboyevaning gʻalabasi haqida gapirib, barcha oʻquvchilarni undan oʻrnak olishga chaqirdi.

Tuman Bolalar-oʻsmirlar sport maktabi direktori Chorsham Tojimurodov ham chempion qizni erishgan gʻalabasi bilan qutladi. Shundan soʻng unga tuman Xalq taʼlimi boʻlimi, Yoshlar ishlari agentligi tuman boʻlimi, sport maktabining esdalik sovgʻalari topshirildi.

Shu kuni masʼullar Qilichboy ovuli hududidagi 15-sonli maktab oʻquvchisi, tumanimizning yana bir chemion qizi Aziza Sotiboldiyevani ham erishgan gʻalabasi bilan qutlash uchun bordilar.

Shu munosabat bilan tashkil etilgan tadbirni Qilichboy ovuli yoshlar yetakchisi Jasur Oʻtamurodov ochdi va Aziza Sotiboldiyevani sportning qoʻl jangi boʻyicha oʻz vazn toifasida Oʻzbekiston chempioni boʻlganligi bilan tabrikladi.

Tuman Xalq taʼlimi boʻlimi mudiri Ibroyim Rajabov, Yoshlar ishlari agentligi tuman boʻlimi boshligʻi Sardor Ismoilov, tuman Bolalar-oʻsmirlar sport maktabi direktori Chorsham Tojimurodovlar ham chempionni gʻalabasi bilan qutlab, esdalik sovgʻalarini topshirdilar. Koʻrsatilayotgan buningdek eʼtibor-eʼtirof kelgusida ularning yana ham ulkan yutuqlarga erishishiga ragʻbat boʻlsa, ajab emas.

Oygul RAJABOVA.