Farovon mahallasi haqiqatdan ham farovon!

Mahallaning obodligi - ona Vatanning obodligi, tom maʼnoda mamlakat va millat farovonligidir. Mamlakatning har jihatdan taraqqiy etishi uchun mehnat maydonlarida fidoyilik koʻrsatuvchi xalq mahallada yashaydi, ijod qiladi, yangiliklar yaratadi. Kelajagimiz egalari boʻlgan barkamol avlodni voyaga yetkazishdek sharafli vazifani amalga oshiradi. Shuning uchun ham mahalla har davrda oʻzining muqaddasligi bilan eʼtiboru, eʼtirofda boʻlgan.

 Amudaryo tumanining Farovon mahallasi, nomiga yarasha obod va farovon mahalla. Ushbu mahallada 642 xonadonda 2456 nafar fuqaro istiqomat qiladi. Eʼtiborlisi, mahalladagi 710 ta oilada keyingi 3-yil ichida biron marta ajrim yoki jinoyatchilik bilan bogʻliq holatlar sodir boʻlmadi.

Mahalla raisi Madamin Kazakov, xotin-qizlar faoli Sayyora Karabayeva, hokim yordamchisi Muqaddas Beknazarova, profilaktika inspektori Rufat Matnazarov, yoshlar yetakchisi Shoxruh Roʻzmetovlarning oʻzaro hamkorlikda va hamjihatlikda samarali ish faoliyatini yoʻlga qoʻyganligi natijasida oilaviy qadriyatlar mustahkamlanib, mahalla infratuzilmasi tobora yaxshilanoqda, aholi bandligi taʼminlanmoqda.

Jumladan, 2023-yilning dastlabki 3 oyi davomida xotin-qizlar va hokim yordamchisi koʻmagi bilan 5 nafar xotin-qizga tadbirkorlik faoliyatini boshlashi uchun imtiyozli kreditlar ajratildi. 2 nafar ayol ishga joylashtirildi.

Mahalla ahlining oʻzaro birdamligi, ogʻizbirchiligi tufayli hududda kattagina mahalla bogʻi yaratildi. Ushbu bogʻda mevali daraxt koʻchatlari har bahor va kuz mavsumlarida ekilib koʻpaytirib boriladi. Bu yilgi bahor mavsumida ham mahalla ahli 50 tupdan ortiq mevali va manzarali daraxt koʻchatlarini ekishdi. Ahamiyatlisi, ekilgan har bir niholning kelajakda katta daraxt boʻlib yetishishi uchun bir nafar yosh oila biriktirib qoʻyildi. Yosh oilaning endigina kurtak yozayotgan nihollarga biriktirilishda ham qandaydir ramziy maʼno bordek.

 Farovon mahallasida yosh kelinlarga, turmush ostonasida turgan yosh qizlarga oʻrnak va ibrat boʻlib, oilalar mustahkamligiga oʻz hissasini qoʻshib kelayotgan mahallaning 12 nafar yoshi ulugʻ onaxonlaridan tuzilgan “Oqila ayollar harakati” ham samarali tarzda faoliyat olib bormoqda.

 Harakatning faol azolari Dilbar Xoʻjamuratova, Momojon Annamedovalar xotin-qizlar faoli Sayyora Karabayeva bilan hamkorlikda yosh qizlar oʻrtasida kiyinish madaniyati, erta nikoh, erta tugʻruq, sogʻlom turmush tarziga amal qilish kabi mavzularda targʻibot tadbirlarini, davra suhbatlarini olib bormoqda.

 Shuningdek, profilaktika inspektori bilan hamkorlikda yoshlar orasida jinoyatchilikning oldini olish, odam savdosiga qarshi kurashish boʻyicha uchrashuvlar, profilaktik tadbirlar oʻtkazilib kelinmoqda.

Mahallaning faol aʼzosi Momojon Annamedova tashkil etilayotgan ushbu tadbirlarda hamisha faol. U oʻzidagi bor hayotiy tajribani yoshlarga ulashgisi keladi. Bugungi kunda u turmush oʻrtogʻi bilan keksalik gashtini surib nevaralar tarbiyasida boʻlsa ham mahalla ishlariga aralashmasdan turolmaydi. Uzoq yillar mobaynida oʻqituvchilik qilib farzandlarini uyli-joyli qilgan ushbu nuroniylarning uyidan aslo fayz arimaydi.

 Momojon Annamedova oʻz kelinlariga, mahallaning yosh kelinlariga nasihat qilganda eng avvalo, sabrli boʻlish kerakligini, isrofgarchilikka yoʻl qoʻymaslik, har bir narsani tejab ishlatish lozimligini, oilada yuzaga kelgan nohush vaziyatlarda ham muammoni bosiqlik bilan hal qilish lozimligini taʼkidlaydi.

 Mahallada Momojon Annamedova singari onaxonlar juda ham koʻp. Ularning yoshlarga berayotgan oʻgit va nashatlari, boy hayotiy tajribalari tufayli Farovon mahallasi obod, oilalar turmushi farovon.

Tuman hokimligining Axborot xizmati.