“Yangi Konstitutsiya− xalq dardiga quloq soluvchi davlat asosi!" shiori ostida targʻibot tadbiri boʻlib oʻtdi

Ayni kunlarda mamlakatimiz boʻylab umumxalq Referendumi oldidan “Yangi Konstitutsiya − xalq dardiga quloq soluvchi davlat asosi!” shiori ostida targʻibot tadbirlari, kontsert dasturlari oʻtkazilmoqda. Ularda jamoat arboblari, estrada yulduzlari, sportchilar, davlat idoralari vakillari, tadbirkorlar, iqtidorli yoshlar chiqish qilmoqda.

Mana shunday targʻibot tadbiri Amudaryo tumanida ham oʻtkazildi.

10-aprel kuni tumanning chekka hududlaridan biri boʻlgan Xolimbeg ovuli hududida joylashgan 35-sonli maktabda yangilanayotgan Konstitutsiya targʻibotiga bagʻishlangan tadbir boʻlib oʻtdi. Unda respublika ishchi guruh azolari, Oliy Majlis Qonunchilik palatasi deputati Zumrad Bekatova, iqtidorli yoshlar, pedagog xodimlar, faol ayol-qizlar hamda  mahalla ahli ishtirok etishdi.

Tadbirda Oliy Majlis Qonunchilik palatasi deputati Zumrad Bekatova yigʻilganlarga Bosh qomusimizga kiritilayotgan oʻzgartishlarning mazmun-mohiyati, taʼlim rivoji, sogʻliqni saqlash masalalariga doir muhim jihatlar xususida maʼlumotlar berdi.

Deputat oʻz soʻzida Asosiy Qonunimiz mamlakatimizda yangi hayot, yangi jamiyat barpo etish yoʻlida qoʻlga kiritilayotgan barcha yutuq va marralarimizning huquqiy poydevori – kelajagimizning ishonchli kafolati ekanligini taʼkidlab, Oʻzbekiston Respublikasi Oliy Majlisi Qonunchilik palatasi mamlakatimizning yangi tahrirdagi Konstitutsiyasi toʻgʻrisidagi Qonunini qabul qilganligi, ushbu Qonun umumxalq referendumida ovozga qoʻyilishi va unda har bir fuqaro ishtirok etib, oʻz fuqarolik burchini bajarmogʻi lozimligini alohida qayd etib oʻtdi.

Tadbirda ishchi guruh azosi, “Oila va xotin-qizlar” ilmiy tadqiqot instituti direktori oʻrinbosari, pedagogika fanlari doktori, professor Oynisa Musurmanova ham maʼruza qildi.

U yangilanayotgan Konstituttsiyaviy qonun loyihasi matnining 50- va 52-moddalarida maktab  va maktabgacha taʼlimni rivojlantirish boʻyicha qator huquqiy asoslar keltirib oʻtilganini qayd etib, 30-aprel kuni barchani oʻz kelajagimiz va haq-huquqlarimiz kafolati uchun ovoz berishga chaqirdi.

Shundan soʻng, Qoraqalpogʻiston Respublikasi Vazirlar Kengashi Raisi oʻrinbosari Maryam Ahmedova Yangilanayotgan Konstitutsiya mamlakat rivoji, aholining tinch va farovon turmush kechirishi, yurtning taraqqiy etishi uchun muhim huquqiy asos ekanini taʼkidlab oʻtdi. Yangilanayotgan Konstitutsiyada davlat tuzilishi, hokimiyat va boshqaruv organlari tizimi, ularning vakolat hamda majburiyatlari, shakllantirilish tartibi, saylov tizimi, fuqarolarning huquq va erkinliklari, jamiyat va shaxsning oʻzaro munosabatlari, shuningdek, sud tizimi hamda davlat va jamiyatning oʻzaro munosabatlari yanada aniq va ravshan belgilab berilgani alohida eʼtirof etildi.

Tadbir davomida “Zulfiya” nomidagi Davlat mukofoti sohibasi Barno Samandarova Konstitutsiyamizning 44-moddasida majburiy mehnat, bolalarning barkamol rivojlanishiga salbiy taʼsir qiladigan har qanday bolalar mehnati taqiqlanayotganini taʼkidladi. U oʻz nutqida 30-aprel kungi Referendumda tengdoshlarining va oʻzining haq-huquqlari mustahkam kafolatlab qoʻyilayotgan Yangilanayotgan Konstitutsiyamizga ovoz berishini taʼkidladi va yoshlarni ham shunga chorladi.

Targʻibot tadbirida Xolimbeg ovulidagi maktabgacha taʼlim muassasi tarbiyalanuvchilari, 17-, 35-sonli maktablarning iqtidorli oʻquvchilari tomonidan ona Vatan, tinchlik va doʻstlikni tarannum etuvchi goʻzal kuy-qoʻshiqlar ijro etildi.

Shu oʻrinda aytish kerakki, Konstitutsiyaviy qonun loyihasi boʻyicha umumxalq muhokamalarida jami 222 ming 715 ta takliflar kelib tushgan va ularning 25 foizi loyihaga kiritilgan. Loyihani tayyorlashda 400 dan ortiq xalqaro hujjatlar, 190 ga yaqin davlat tajribasi oʻrganilgan. Yangilanayotgan Konstitutsiya moddalari 128 tadan 155 taga koʻpayib, normalar 275 tadan 434 taga oshmoqda hamda Asosiy Qonunimizda Oʻzbekiston huquqiy, ijtimoiy, dunyoviy demokratik davlat ekanligi belgilab qoʻyilmoqda. 

Tadbirdan soʻng, ishchi guruh vakillari tumandagi Ayollarni reabilitatsiya qilish va moslashtirish markazida boʻlib, ayollarni qoʻllab-quvvatlash hamda ijtimoiy-psixologik yordamga muhtoj ayollarga koʻrsatilayotgan eʼtibor bilan yaqindan tanishdilar.

Mahallaning faol onaxonlari, psixologlar bilan kechgan suhbat jarayonida oilaviy ajrimlarning oldini olish, “Ayollar daftari”ga kiritilgan ayollarga psixologik yordam koʻrsatish, tushkunlikka tushib qolgan ayollarni sogʻlom hayotga qaytarish, ularning salomatligini tiklash muhim vazifa ekanligi taʼkidlanib, mahallalarda psixologik treninglar, bepul tibbiy koʻriklarni koʻproq tashkil etish lozimligi qayd etildi.

Uchrashuvda nuroniy onaxonlardan oilalar tinchligini mustahkamlash boʻyicha tavsiya va maslahatlar olindi. 

Tuman hokimligining Axborot xizmati.